ທ່ານລັດຖະມົນຕີກະຊວງການຕ່າງປະເທດ ລົງເຄື່ອນໄຫວຢ້ຽມຢາມ ແລະ ພົບປະກັບປະຊາຊົນທີເມືອງສະໜາມໄຊ


ລັດຖະບານ: ໃນວັນທີ 06 ກຸມພາ 2019, ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ລົງໄປເຄື່ອນໄຫວຢ້ຽມຢາມພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກເຫດການໄພພິບັດນຳຖ້ວມຢູ່ເມືອງສະໜາມໄຊ, ແຂວງອັດຕະປື ໂດຍ ໄດ້ຮັບການຕ້ອນຮັບຢ່າງອົບອຸ່ນຈາກອຳນາດການປົກຄອງແຂວງ, ເມືອງ ແລະ ພໍ່ແມ່ປະຊາຊົນ ເປັນຢ່າງດີ.
ຈຸດປະສົງຂອງການລົງເຄື່ອນໄຫວຢ້ຽມຢາມແຂວງອັດຕະປື ຂອງທ່ານລັດຖະມົນຕີ ແລະ ຄະນະໃນຄັ້ງນີ້ ແມ່ນເພື່ອນຳ ເອົາເງິນສົດຈຳນວນ 950,000,000 ກີບ ແລະ ເຄື່ອງອຸປະໂພກບໍລິໂພກອີກຈຳນວນໜຶ່ງໄປມອບໃຫ້ແກ່ປະຊາຊົນຜູ້ໄດ້ຮັບຜົນກະທົບຈາກໄພພິບັດນໍ້າຖ້ວມ ຢູ່ເມືອງສະໜາມໄຊ, ແຂວງອັດຕະປື ໃນທ້າຍເດືອນກໍລະກົດ 2018 ຜ່ານມາ, ຊຶ່ງເງິນ ແລະ ເຄື່ອງດັ່ງກ່າວແມ່ນໄດ້ຮັບການປະກອບສ່ວນຈາກພີ່ນ້ອງຄົນເຊື້ອຊາດລາວຢູ່ປະເທດຕ່າງໆ, ລວມທັງ ຈາກພະນັກງານກະຊວງການຕ່າງປະເທດ ທັງຢູ່ພາຍໃນ ແລະ ປະຈຳການຢູ່ຕ່າງປະເທດ ແລະ ຈາກບັນດາອົງການຈັດຕັ້ງສາກົນ ປະຈຳ ສປປ ລາວ ອີກຈຳນວນໜຶ່ງ.






ຕາງໜ້າໃຫ້ແກ່ອຳນາດການປົກຄອງແຂວງ ຮັບເອົາເຄື່ອງຊ່ວຍເຫຼືອດັ່ງກ່າວ ແມ່ນ ທ່ານ ບຸນຮຽນ ແກ້ວບົວພາດ, ກຳມະການໃຍຄະນະປະຈຳພັກແຂວງ, ປະທານກວດກາພັກ-ລັດແຂວງອັດຕະປື, ຊຶ່ງທ່ານໄດ້ລາຍງານສະພາບຄວາມຄືບໜ້າໃນການແກ້ໄຂ ແລະ ຟື້ນຟູ ຊີວິດການເປັນຢູ່ຂອງ ພໍ່ແມ່ປະຊາຊົນທີ່ໄດ້ຮັບຜົນກະທົບຈາກເຫດການໄພພິບັດດັ່ງກ່າວໃຫ້ຄະນະ ຊາບວ່າ: ມາຮອດປະຈຸບັນ ແມ່ນໄດ້ຮັບການແກ້ໄຂໂດຍພື້ນຖານ, ປະຊາຊົນທີ່ໄດ້ຮັບຜົນກະທົບທັງໝົດແມ່ນໄດ້ຍົກຍ້າຍເຂົ້າ ພັກເຊົາຢູ່ເຮືອນພັກເຊົາຊົ່ວ ຄາວທີ່ທາງການໄດ້ຈັດສັນໃຫ້, ແລະ ໄດ້ຮັບການສະໜອງເຂົ້າກິນ, ເງິນອົດໜູນ, ການບໍລິການດ້ານສາທາລະນະສຸກ ແລະ ອື່ນໆ.









ສຳລັບວຽກງານຈຸດສຸມໃນສະເພາະໜ້າ ແມ່ນການສ້າງເຮືອນຖາວອນ, ຟື້ນຟູພື້ນຖານໂຄງລ່າງ, ພື້ນຖານການຜະລິດ ເພື່ອຊຸກຍູ້ປະຊາຊົນຫັນເຂົ້າສູ່ການຜະລິດໂດຍໄວ ແນ່ໃສ່ເລັ່ງລັດປົວແປງຊີວິດການເປັນຢູ່ຂອງເຂົາເຈົ້າ ໃຫ້ກັບເຂົ້າສູ່ສະພາບປົກກະຕິ. ໃນໂອກາດດັ່ງກ່າວ, ທ່ານລັດຖະມົນຕີກະຊວງການຕ່າງປະເທດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ອຳນາດການປົກຄອງແຂວງ ແລະ ເມືອງທີ່ໄດ້ຕັ້ງຫນ້າເອົາໃຈໃສ່ ເບິ່ງແຍງຊີວິດການເປັນຢູ່ຂອງພໍ່ແມ່ປະຊາຊົນທີ່ໄດ້ຮັບຜົນກະທົບໃນໄພພິບັດໃນຄັ້ງນີ້.









ຈາກນັ້ນ, ທ່ານລັດຖະມົນຕີ ແລະ ຄະນະ​ ຍັງໄດ້ຖືເອົາໂອກາດນີ້ລົງໄປພົບປະໂອ້ລົມກັບປະຊາຊົນ ແລະ ໄດ້ອວຍ ພອນໃຫ້ນາຍ ແລະ ພົນທະຫານ ທີ່ພວມປະຈຳການຢູ່ກອງພັນ 21 ແຂວງອັດຕະປື ເນື່ອງໃນໂອກາດທີ່ທົ່ວພັກທົ່ວກອງທັບ ແລະ ປວງຊົນ ພວມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຢ່າງມີຄວາມໝາຍອັນເລິກເຊິ່ງ ອີກດ້ວຍ.





ຂ່າວ:ພາບ: ກົມການຂ່າວ ກະຊວງການຕ່າງປະເທດ


Post a Comment

0 Comments