ຊຽງຂວາງ ດຳເນີນກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ຂອງແຂວງ


ຊຽງຂວາງ: ປະຕິບັດ​ຕາມ​ມະຕິ​ຂອງ​ກົມ​ການ​ເມືອງ​ສູນ​ກາງ​ພັກ ​ເລກທີ 032/ກມສພ ​ແລະ ບົດ​ແນະນຳ​ຂອງ​ຄະນະ​ຈັດ​ຕັ້ງ​ສູນ​ກາງ​ພັກ ​ເລກທີ 292/ຄຈສພ ວ່າ​ດ້ວຍ​ການສ້າງ​ແຜນ​ກຳ​ນົດພະນັກງານ​ນຳພາ-ຄຸ້ມ​ຄອງ ​ໃນ​ລະຫວ່າງ​ວັນ​ທີ 13-15 ກຸມພາ 2019 ​(ເປັນເວລາ 3ວັນ) ແຂວງ​ຊຽງຂວາງ​ໄດ້​ດຳ​ເນີນ​ກອງ​ປະຊຸມ​ສ້າງ​ແຜນ​ກຳນົດ​ພະນັກງານ​ນຳພາ-ຄຸ້ມ​ຄອງ​ຂັ້ນ​ສູນ​ກາງ​ຄຸ້ມ​ຄອງ​ຂອງ​ແຂວງ​ຂຶ້ນ ​





ສະຫາຍ ບຸນຕົ້ນ ຈັນທະພອນ ເລຂາພັກແຂວງ ເຈົ້າແຂວງຊຽງຂວາງ




ໂດຍ​ການ​ເປັນ​ປະທານ​ຂອງ​ສະຫາຍ ບຸນ​ຕົ້ນ ຈັນທະ​ພອນ ​ເລຂາ​ພັກ​ແຂວງ, ​ເຈົ້າ​ແຂວງ​ຊຽງຂວາງ, ສະຫາຍ ວັນ​ໄຊ ພອງ​ສະຫວັນ ຮອງ​ເລຂາ​ຄະນະ​ພັກ, ຮອງ​ຫົວໜ້າຄະນະ​ຈັດ​ຕັ້ງ​ສູນ​ກາງ​ພັກ, ສະຫາຍ ບົວ​ສອນ ສີນ​ວນທອງ ຮອງ​ເລຂາ​ພັກ​ແຂວງ, ຮອງ​ເຈົ້າ​ແຂວງ​ຊຽງຂວາງ, ມີ​ສະຫາຍ ນ ບຸດ​ສະ​ດີ ທະນະ​ເມືອງ ຄະນະ​ພັກ, ຫົວໜ້າກົມ​ຄຸ້ມ​ຄອງພະນັກງານ ຄະນະ​ຈັດ​ຕັ້ງ​ສູນ​ກາງ​ພັກ ພ້ອມ​ດ້ວຍ​ທິມງານ​ມາ​ຈາກ​ສູນ​ກາງ, ມີ​ກຳມະການຄະນະ​ປະຈຳ​ພັກ​ແຂວງ, ກຳມະການຄະນະ​ພັກ​ແຂວງ, ​ເລຂາ​ພັກ​ເມືອງ, ​ເລຂາ​ຄະນະ​ພັກ​ຮາກ​ຖານ, ຫົວໜ້າພະ​ແນ​ກ, ຮອງ​ພະ​ແນ​ກການ​ອ້ອມ​ຂ້າງ​ແຂວງ​ເຂົ້າ​ຮ່ວມ 300 ກວ່າ​ສະຫາຍ.





ສະຫາຍ ຄຳແສງ ພົມມະວັນ ຄະະປະຈຳພັກແຂວງ ຫົວຫນ້າຄະນະຈັດຕັ້ງແຂວງຊຽງຂວາງ




ກອງ​ປະຊຸມ​ໄດ້​ຮັບ​ຟັງ​ການ​ລາຍ​ງານ​ຄືນ​ ກ່ຽວກັບ​ສະພາບ​ການຈັດ​ຕັ້ງ​ປະຕິບັດ​ການ​ຂຶ້ນ​ແຜນ​ກຳນົດ​ພະນັກງານ​ນຳພາ-ຄຸ້ມ​ຄອງ​ ​ແຕ່ລະ​ຂັ້ນ​ຂອງ​ແຂວງ ​ໃນ​ໄລຍະ​ຜ່ານ​ມາ ຈາກ​ສະຫາຍ ຄຳ​ແສງ ພົມມະ​ວັນ ຄະນະ​ປະຈຳ​ພັກ​ແຂວງ, ຫົວໜ້າຄະນະ​ຈັດ​ຕັ້ງ​ແຂວງ ​ແລະ





ສະຫາຍ ບົວສອນ ສີນວນທອງ ຮອງເລຂາຄະນະພັກແຂວງ ຮອງເຈົ້າແຂວງຊຽງຂວາງ




ສະຫາຍ ບົວ​ສອນ ສີນ​ວນທອງ ຮອງ​ເລຂາ​ຄະນະ​ພັກ​ແຂວງ, ຮອງ​ເຈົ້າ​ແຂວງ ​ໄດ້​ຜ່ານ​ມະຕິ​ຂອງ​ກົມ​ການ​ເມືອງສູນ​ກາງ​ພັກ ສະບັບ​ເລກທີ 032/ກມສພ ວ່າ​ດ້ວຍ​ວຽກງານ​ການ​ສ້າງ​ແຜນ​ກຳນົດ​ພະນັກງານ​ນຳພາ-ຄຸ້ມ​ຄອງ ​ແລະ ມະຕິ​ຂອງ​ກົມ​ການ​ເມືອງ ​ເລກທີ 030/ກມສພ ວ່າ​ດ້ວຍ​ມາດຕະຖານ​ຂອງ​ພະນັກງານ​ນຳພາ-ຄຸ້ມ​ຄອງ ​ເພື່ອ​ເຮັດ​ການ​ດຳ​ເນີນ​ກອງ​ປະ​ຊຸມ​ຄັ້ງ​ນີ້ ມີ​ຄວາມໜັກ​ແໜ້ນ ​ເລິກ​ເຊິ​ງ ​ແລະ ​ໄປ​ຕາມ​ແຜນການ​ທີ່​ກຳນົດ​ໄວ້ນັ້ນ





ສະຫາຍ ວັນໄຊ ພອງສະຫວັນ ຮອງເລຂາຄະນະພັກ ຮອງຫົວຫນ້າຄະນະຈັດຕັ້ງສູນກາງພັກ




ສະຫາຍ ວັນ​ໄຊ ພອງ​ສະຫວັນ ຮອງ​ເລຂາ​ຄະນະ​ພັກ, ຮອງ​ຫົວໜ້າຄະນະ​ຈັດ​ຕັ້ງ​ສູນ​ກາງ​ພັກ ​ໄດ້​ມີ​ຄຳ​ເຫັນ​ຕື່ມ​ຕໍ່ຜູ້​ແທນ​ກອງ​ປະຊຸມກ່ຽວກັບ​ຄວາມໝາຍຄວາມ​ສຳຄັນຂອງ​ການ​ສ້າງ​ແຜນ​ກຳນົດ​ພະນັກງານ​ນຳພາ-ຄຸ້ມ​ຄອງ ​ແມ່ນ​ການ​ສ້າງ​ແຫຼ່ງພະນັກງານ ​ເພື່ອ​ເຂົ້າ​ໃນ​ການ​ກຳນົດ​ເປົ້າໝາຍສືບ​ທອດ​ປ່ຽນ​ແທນ ຕາມ​ຕຳ​ແໜ່ງງາມ​ຕ່າງໆ ​ເພື່ອ​ເປັນ​ທິດ​ໃນ​ການ​ກຳນົດ​ບຳລຸງ-ກໍ່ສ້າງ​ໃນ​ສະ​ເພາະໜ້າ ​ແລະ ຍາວ​ນານ ພ້ອມ​ທັງ​ຮັບປະກັນ​ໃຫ້​ກຳນົດ​ນັ້ນ​ມີ​ລັກສະນະ​ໂປ່​ງ​ໃສ, ພາວະ​ວິ​ໄສ​ຮອບດ້ານ ​ເປັນໝູ່ຄະນະ.





ສະຫາຍ ນາງ ບຸດສະດີ ທະນະເມືອງ ຄະນະພັກ ຫົວຫນ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ




ພ້ອມກັນ​ນັ້ນ, ສະຫາຍ ນ ບຸດ​ສະ​ດີ ທະນະ​ເມືອງ ກໍ​ໄດ້​ເນັ້ນ​ຕື່ມ​ໃນ​ແງ່​ວິຊາ​ການ ສ້າງ​ຄວາມ​ເຂົ້າ​ໃຈ​ຕໍ່ວຽກງານດັ່ງກ່າວ​ນີ້​ວ່າ ການ​ຂຶ້ນ​ແຜນ​ກຳນົດ​ກ່ອນ​ອື່ນ​ຕ້ອງ​ໄດ້​ເຂົ້າ​ໃຈ​ວ່າ​ເປັນ​ຫຍັງ​ຈຶ່ງ​ຕ້ອງ​ມີ​ແຜນ​ກຳນົດ, ​ແຜນ​ກຳນົດ​ຮັບ​​ໃຊ້​ໃຫ້​ແກ່​ອັນ, ມາດຕະຖານ​ຕັ້ງ​ໄວ້​ເພື່ອ​ຫຍັງ.









ຈາກນັ້ນ ຜູ້ແທນກອງປະຊຸມກໍໄດ້ໃຊ້ສິດປະຊາທິປະໄຕສຸມແນວຄິດສະຕິປັນຍາຂອງຕົນຢ່າງພາວະວິໄສໃນການປ່ອນບັດສ້າງແຜນພະນັກງານນຳພາ-ຄຸ້ມຄອງ ເພື່ອກຳນົດເອົາເປົ້າໝາຍ.









ສະຫຼຸບລວມແລ້ວ, ການສ້າງແຜນກຳນົດພະນັກງານນຳພາ-ຄຸ້ມຄອງ ເປັນບ່ອນອີງໃຫ້ແກ່ຄະນະພັກ ແຕ່ລະຂັ້ນໃນການຄົ້ນຄວ້າການສ້າງແຜນບຳລຸງ-ກໍ່ສ້າງພະນັກງານ ແນ່ໃສ່ເພື່ອຮັບປະກັນໂຄງປະກອບພະນັກງານໃຫ້ມີ 3 ຮຸ້ນ ແລະ ຈຳນວນເພດ, ເຜົ່າຕິດພັນກັບການປັບປຸງກົງຈັກການຈັດຕັ້ງ, ການບັນຈຸ, ສັບຊ້ອນພະນັກງານເຂົ້າໃນໂຄງປະກອບກົງຈັກການຈັດຕັ້ງໃນຕຳແໜ່ງນຳພາ-ຄຸ້ມຄອງໃຫ້ຖືກຕ້ອງສອດຄ່ອງຕາມທິດທີ່ກຳນົດໄວ້ ທັງເປັນການກະກຽມບຸກຄະລາກອນໃຫ້ແກ່ກອງປະຊຸມໃຫຍ່ຂອງອົງຄະນະພັກແຂວງຊຽງຂວາງ ຄັ້ງທີ VIII ​ໃນ​ປີ 2020.




ພາບແລະຂ່າວ: ເພັດສະລິນ

Post a Comment

0 Comments