Header Ads

ຮອງປະທານປະເທດ ເນັ້ນໃຫ້ສະຫວັນນະເຂດ ເອົາໃຈໃສ່ໂຄງປະກອບບຸກຄະລາກອນ

ການພົບປະໂອ້ລົມພະນັກງານຫຼັກແຫຼ່ງຢູ່ແຂວງສະຫວັນນະເຂດ ຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະ ນະເລຂາທິການສູນກາງພັກ ຮອງປະທານປະເທດ ຈັດຂຶ້ນໃນວັນທີ 21 ກຸມພາຜ່ານມາ ທີ່ຫ້ອງປະຊຸມໃຫຍ່ ຫໍວັດທະນະທຳ ໄກສອນ ພົມວິຫານ ໂດຍມີ ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ພ້ອມດ້ວຍຄະນະປະຈຳພັກແຂວງ, ກຳມະການພັກແຂວງ, ບັນດາການນຳຫຼັກແຫຼ່ງໃນທົ່ວແຂວງເຂົ້າຮ່ວມ.

ໂອກາດດັ່ງກ່າວ ທ່ານ ສັນ ຕິພາບ ພົມວິຫານ ຕາງໜ້າໃຫ້ແກ່ພະນັກງານຫຼັກແຫຼ່ງໃນທົ່ວແຂວງ ໄດ້ກ່າວຕ້ອນຮັບທ່ານ ພັນຄຳ ວິພາວັນ ຢ່າງເປັນທາງການ ໃນການມາພົບປະຢ້ຽມຢາມ ແລະ ໂອ້ລົມໃນຄັ້ງນີ້; ຈາກນັ້ນ ທ່ານ ພັນຄຳ ວິພາວັນ ກໍໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຜົນງານໃນການຊີ້ນຳ-ນຳພາວຽກງານຮອບດ້ານ ຂອງອົງຄະນະພັກແຂວງສະຫວັນນະເຂດ ພ້ອມນັ້ນ ທ່ານກໍໄດ້ຍົກໃຫ້ເຫັນການຈັດຕັ້ງປະຕິບັດມະຕິຂອງກອງປະຊຸມໃຫຍ່ ຄັ້ງທີ X ຂອງພັກ ໂດຍເລີ່ມແຕ່ກອງປະຊຸມຄັ້ງປະຖົມມະລຶກ ຈົນເຖິງປັດຈຸບັນ ກໍເຫັນວ່າ: ພັກເຮົາແມ່ນໄດ້ເອົາໃຈໃສ່ແກ້ໄຂບັນຫາຢ່າງຈິງຈັງ ແລະ ມີຜົນສຳເລັດໃນຫຼາຍດ້ານເປັນຕົ້ນ: ຄວາມມີສະຖຽນລະພາບທາງດ້ານການເມືອງ, ມີຄວາມສະຫງົບເປັນລະບຽບຮຽບຮ້ອຍໃນທົ່ວສັງຄົມ, ເສດຖະກິດໄດ້ຮັບການພັດທະນາຢ່າງຕໍ່ເນື່ອງ, ສ່ວນບັນດາປະກົດການຫຍໍ້ທໍ້ໃນສັງຄົມ ກໍໄດ້ຮັບການແກ້ໄຂເຊັ່ນ: ການປະຕິບັດຄຳສັ່ງເລກທີ 15/ນຍ ເຫັນວ່າສ່ວນຫຼວງຫຼາຍແມ່ນໄດ້ດີ, ອີກຢ່າງການປະຕິບັດວິໄນຕໍ່ພະນັກງານສະມາຊິກພັກ ຜູ້ກະທຳຜິດລະບຽບໃນແຕ່ລະດ້ານ ກໍເຫັນວ່າໄດ້ປະຕິບັດຢ່າງຕໍ່ເນື່ອງ ແລະ ມີການກວດກາຫຼາຍຂຶ້ນ, ອັນທີ່ຍັງອ່ອນອີກອັນໜຶ່ງ ເຫັນວ່າພະນັກງານສ່ວນຫຼາຍ ການຮ່ຳຮຽນຢາກໄດ້ແຕ່ໃບປະກາສະນີຍະບັດ ແຕ່ບໍ່ຄຳນຶງເຖິງຄວາມຮູ້ ຄວາມສາມາດ ພໍມາເຮັດວຽກຕົວຈິງ ຊໍ້າພັດພົບຂໍ້ຫຍຸ້ງຍາກ, ກ່ຽວກັບພະນັກງານທີ່ເຮັດວຽກງານບໍລິຫານ ກໍຍັງເຮັດບໍ່ໄດ້ດີ ເຮັດພຽງເອົາໜ້າ.

ດັ່ງນັ້ນ ຈຶ່ງຝາກເຖິງທຸກພາກສ່ວນ ຈົ່ງພ້ອມກັນນຳໃຊ້ຄວາມຮູ້ ຄວາມສາມາດໃນການພັດທະນາວຽກງານຂອງຕົນ ຢ່າງເຕັມຮູບແບບ, ເຂົ້າສູ່ລະບົບ ເພື່ອກ້າວສູ່ການພັດທະນາປະເທດຊາດ ໃຫ້ມີຄວາມຈະເລີນກ້າວໜ້າໃນອະນາຄົດ. ທ່ານ ພັນຄຳ ວິພາວັນ ຍັງໄດ້ເນັ້ນໜັກໃຫ້ຄະນະພັກທຸກຂັ້ນ ຂອງແຂວງສະຫວັນນະເຂດ ຕໍ່ການດຳເນີນກອງປະຊຸມໃຫຍ່ 3 ຂັ້ນ ໂດຍສະເພາະກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສະຫວັນນະເຂດ ທີ່ຈະເປີດຂຶ້ນໃນກາງປີ 2020. ດັ່ງນັ້ນ ບົດລາຍງານການເມືອງ ຂອງຄະນະພັກແຕ່ລະຂັ້ນ ຕ້ອງໃຫ້ມີຄວາມແທດເໝາະກັບຄວາມຈິງ ມີການວິເຄາະ, ວິໄຈເນື້ອໃນບັນຫາ, ບົດຮຽນໃນດ້ານຕ່າງໆ ເພື່ອມາປຽບທຽບກັບໜ້າທີ່ວຽກງານ ທີ່ໄດ້ປະຕິບັດຜ່ານມາ, ສ່ວນໂຄງປະກອບດ້ານບຸກຄະລາກອນ ຕ້ອງມີການຄັດເລືອກ ຊຶ່ງໃນນັ້ນ ໄດ້ແບ່ງອອກເປັນ 3 ຮຸ່ນຄື: ຮຸ່ນອາວຸໂສ, ຮຸ່ນກາງ ແລະຮຸ່ນໜຸ່ມ, ສຳລັບຊັດສ່ວນໃນແຕ່ລະຮຸ່ນ ກໍຕ້ອງເບິ່ງວ່າ: ຮຸ່ນກາງ ແລະ ຮຸ່ນໜຸ່ມ ຄວນຈະມີອັດຕາສ່ວນຫຼາຍກວ່າຮຸ່ນອາວຸໂສ, ໃນນັ້ນ ໃຫ້ເບິ່ງທັງຄວາມຮູ້, ຄວາມສາມາດ ແລະ ປະສົບການ ຫຼີກລ່ຽງຄົນເຈົ້າ ຄົນຂ້ອຍ, ຍາດພີ່ນ້ອງ, ຄົນໃກ້ຊິດ ຊຶ່ງຈະກໍໃຫ້ເກີດຂໍ້ຂັດແຍ່ງໃນຫຼາຍດ້ານ ເຮັດໃຫ້ການຊີ້ນຳ-ນຳພາພົບຂໍ້ຫຍຸ້ງຍາກ. ບັນຫານີ້ຕ້ອງຝາກເຖິງຄະນະພັກທຸກຂັ້ນ ຕ້ອງເອົາໃຈໃສ່ ເພື່ອໃຫ້ໄດ້ບຸກຄະລາກອນທີ່ມີຄຸນະພາບ. ພາບ-ຂ່າວ: ນສພ ປະຊາຊົນ

No comments

Powered by Blogger.