ສກຂ ຫຼວງພະບາງ ຢ້ຽມຢາມ ສກຂ ຫຼວງນໍ້າທາ

ຄະນະນໍາ ພະແນກສຶກສາທິການ ແລະ ກິລາແຂວງ ຫຼວງພະບາງ ຢ້ຽມຢາມ ພະແນກສຶກສາທິການ ແລະ ກິລາແຂວງ ຫຼວງນໍ້າທາ ເພື່ອຖອດຖອນບົດຮຽນກ່ຽວກັບ ທຶນການສຶກສາຈາກ ສປ ຈີນ ແລະ ຂັ້ນຕອນໃນການຈັດສົ່ງນັກສຶກສາໄປຮຽນຕໍ່ທີ່ ສປ ຈີນ.
ການຢ້ຽມຢາມດັ່ງກ່າວໄດ້ມີຂື້ນ ໃນຕອນແລງຂອງວັນທີ 21 ກຸມພາ 2019 ເຊິ່ງນໍາທີມໂດຍ ທ່ານ ປອ ວົງເພັດ ອຸດົມລິດ ຮອງຫົວໜ້າພະແນກສຶກສາທິການ ແລະ ກິລາແຂວງ ຫຼວງພະບາງ ແລະ ໃຫ້ກຽດຕ້ອນຮັບຂອງທ່ານ ບຸນໂຮມ ຈິດດາລາ ຮອງຫົວໜ້າ ພະແນກສຶກສາທິການ ແລະ ກິລາແຂວງ ຫຼວງນໍ້າທາ ພ້ອມດ້ວຍ ຫົວໜ້າ-ຮອງຫົວໜ້າຂະແໜງ ທີ່ກ່ຽວຂ້ອງທັງສອງຝ່າຍເຂົ້າຮ່ວມ.



ໃນການພົບປະຄັ້ງນີ້ ທ່ານ ບຸນໂຮມ ຈິດດາລາ ໄດ້ລາຍງານ ສະພາບຈຸດພິເສດ ທີ່ຕັ້ງຂອງແຂວງຫຼວງນໍ້າທາ, ສະພາບການສຶກສາ, ການຍາດແຍ່ງທຶນ ການສຶກສາຈາກ ສປ ຈີນ, ຂັ້ນຕອນການພົວພັນເຊັນສັນຍາກັບບັນດາສະຖາບັນການສຶກສາຕ່າງໆ, ການຈັດສົ່ງນັກຮຽນໄປຮຽນຕໍ່ທີ່ ສປ ຈີນ ເຊິ່ງໃນ ສົກຮຽນ 2018-2019 ນີ້ໄດ້ຈັດສົ່ງນັກຮຽນ ໄປຮຽນຕໍ່ຢູ່ ສສ ຫວຽດນາມ ຈໍານວນ 105 ຄົນ, ສປ ຈີນ 700 ກວ່າຄົນ, ສະເພາະຢູ່ແຂວງ ຫຼວງນໍ້າທາ 300 ກວ່າຄົນ ເທົ່າກັບ 49 ເປີເຊັນ, ມີນັກຮຽນ ກຽມພາສາຈີນຢູ່ ພະແນກສຶກສາທິການ ແລະ ກິລາແຂວງ ຫຼວງນໍ້າທາ ຈໍານວນ 150 ຄົນ,



ແຕ່ລະປີໄດ້ຈັດສອບເສັງທຽບລະດັບພາຈີນ( HSK ) 3G 4G 5G 6G ໂດຍສົມທົບກັບມະຫາວິທະຍາໄລ ຊູໂຈ ປີຜ່ານມາ ມີນັກຮຽນເຂົ້າສອບເສັງ 400 ກວ່າຄົນ, ໄດ້ພົວພັນກັບ 5 ແຂວງຄື: ແຂວງ ຢຸນນານ, ກຸຍໂຈ, ເສສວນ, ເຫີ່ນານ ແລະ ຈຽງຊູ, ມີ 23 ສະຖາບັນການສຶກສາໃນນີ້ມີ ມະຫາວິທະຍາໄລ 10 ແຫ່ງ, ວິທະຍາໄລ 13 ແຫ່ງ ແລະ ຍັງໄດ້ຮັບການຊ່ວຍເຫຼືອ ໃນດ້ານອື່ນໆເຊັ່ນ: ອຸປະກອນການຮຽນ-ການສອນ, ອຸປະກອນກິລາ, ເຄື່ອງນຸ່ງຫົ່ມ ແລະ ເງີນສົດຈໍານວນໜຶ່ງ, ພ້ອມດຽວກັນນີ້ ບັນດາຫົວໜ້າ-ຮອງຫົວໜ້າຂະແໜງທີ່ກ່ຽວຂ້ອງ ກໍ່ໄດ້ສົນທະນາ ຖາມເຈາະຈີ້ມ ກ່ຽວກັບລາຍລະອຽດຂອດປະສານງານ ລະຫວ່າງ ບັນດາສະຖາບັນ ຫຼື ໂຮງຮຽນ ວິທະຍາໄລ, ມະຫາວິທະຍາໄລແຫ່ງຕ່າງໆຈາກ ສປ ຈີນ ກັບ ພະແນກສຶກສາທິການ ແລະ ກິລາແຂວງ ຫຼວງນໍ້າທາ, ການຄັດເລືອກ, ການຄຸ້ມຄອງນັກສຶກສາ, ຂັ້ນຕອນການປະກອບເອກະສານ, ດ້ານງົບປະມານ, ການຕ້ານປະກົດການຫຍໍ້ທໍ້ໂດຍສະເພາະ ການໂຄສະນາ, ການຊື້ທຶນໂດຍບໍ່ຖືກລະບຽບການ.



ໃນໂອກາດນີ້ ທ່ານ ປອ ວົງເພັດ ອຸດົມລິດ ກໍ່ໄດ້ສະແດງຄວາມຂອບອົກຂອບໃຈ ທີ່ທາງ ຄະນະນໍາ ພະແນກສຶກສາທິການ ແລະ ກິລາແຂວງ ຫຼວງນໍ້າທາ ທີ່ໃຫ້ການຕ້ອນຮັບຢ່າງອົບອຸ່ນ,ໃຫ້ການຮ່ວມມື,ໃຫ້ຄວາມກະຈ່າງແຈ້ງ, ໃຫ້ບົດຮຽນຫຼາຍໆຢ່າງ ດ້ວຍຄວາມຈິງໃຈ ແລະ ພ້ອມແລ້ວ ຈະນໍາເອົາບົດຮຽນທີ່ໄດ້ສົນທະນາຖອດຖອນບົດຮຽນໃນຄັ້ງນີ້ ໄປຈັດຕັ້ງປະຕິບັດໃຫ້ໄດ້ຮັບຜົນດີ.

Post a Comment

0 Comments