ຄຊປປລ ໄດ້ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ແລະໜັກແໜ້ນ

• ຂ່າວ : ສັນຍາ
ພິທີມອບ-ຮັບໃບຢັ້ງຢືນໜ່ວຍພັກຮາກຖານຫ້ອງການຄະນະບໍລິຫານງານຊາວໝຸ່ມປະຊາຊົນປະຕິວັດລາວ (ຄຊປປລ) ແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ ແລະໜັກແໜ້ນປະຈໍາປີ 2018 ແລະຮັບຮອງທິດທາງແຜນການ ປະຈໍາປີ 2019 ໄດ້ຈັດຂຶ້ນໃນວັນທີ 27 ກຸມພາ 2019 ນີ້ ທີ່ຫ້ອງປະຊຸມຫ້ອງວ່າການແຂວງເຊກອງ ໂດຍການເປັນປະທານຂອງສະຫາຍ ນາງ ຈັນຫອມ ມະຫາໄຊ ຄະນະປະຈໍາພັກແຂວງ, ປະທານກວດກາພັກແຂວງ, ມີຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນ ແລະພາກສ່ວນກ່ຽວ ຂ້ອງເຂົ້າຮ່ວມ.

ໃນກອງປະຊຸມໄດ້ຮັບຟັງການຜ່ານບົດສະຫຼຸບຕີລາຄາຜົນຂອງການປະເມີນໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ຂອງໜ່ວຍພັກຮາກຖານ ຄຊປປລ ແຂວງເຊກອງ ປະຈໍປີ 2018 ແລະທິດທາງແຜນການ ປະຈໍາປີ 2019 ໂດຍສັງເຂບຈາກສະຫາຍ ສາກົນ ພອນປະເສີດ ກໍາມະການພັກແຂວງ, ເລຂາໜ່ວຍພັກ ຄຊປປລ ແຂວງເຊກອງ ຊຶ່ງໄດ້ຍົກໃຫ້ເຫັນ : ດ້ານເນື້ອໃນ ແລະຂັ້ນຕອນສະຫຼຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມ ແຂງ ແລະໜັກແໜ້ນ; ຕີລາຄາການຊີ້ນໍາໆພາຮອບ ດ້ານຂອງໜ່ວຍພັກ ຄຊປປລ ແຂວງ, ຜົນການປະເມີນຕີລາຄາແບ່ງປະເດພໜ່ວຍພັກ ແລະສະມາຊິກພັກ.



ພ້ອມກັນນີ້ ກໍໄດ້ຜ່ານມະຕິຕົກລົງຂອງຄະນະປະຈໍາພັກແຂວງເຊກອງ ວ່າດ້ວຍອະນຸມັດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2018 ແລະຮັບຮອງເອົາແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ປະຈໍາປີ 2019. ຈາກນັ້ນ ສະຫາຍ ນາງ ຈັນຫອມ ມະຫາໄຊ ກໍໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະໜັກແໜ້ນໃຫ້ໜ່ວຍພັກຮາກຖານ ຄຊປປລ ແຂວງ.

ໂອກາດດັ່ງກ່າວ ສະຫາຍ ນາງ ຈັນຫອມ ມະຫາໄຊ ໄດ້ມີຄໍາເຫັນໂອ້ລົມ ໂດຍເນັ້ນໃຫ້ໜ່ວຍພັກຮາກຖານ ຄຊປປລ ແຂວງຈົ່ງສືບຕໍ່ປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ໂດຍຖືເອົາການສຶກສາອົບຮົມການເມືອງນໍາພາແນວຄິດ, ເຕົ້າໂຮມຄວາມສາມັກຄີສະມາຊິກພັກ-ພະນັກງານ, ປັບປຸງທາງດ້ານການຈັດຕັ້ງ ແລະຂະຫຍາຍ, ດໍາເນີນຊີວິດການເມືອງພາຍໃນຈຸ-ໜ່ວຍຢ່າງເປັນປົກກະຕິ, ຕໍານິສົ່ງຂ່າວພາຍໃນພັກ, ກໍ່ສ້າງຊ່ວຍເຫຼືອເຊິ່ງກັນ ແລະກັນ, ປັບປຸງແບບແຜນວິທີນໍາພາ-ແບບແຜນວິທີເຮັດວຽກໃຫ້ດີຂຶ້ນກວ່າເກົ່າ; ສໍາລັບສະມາຊິກພັກ ຈົ່ງເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ມີຄຸນສົມບັດສິນທໍາປະຕິວັດ ເພື່ອພ້ອມກັນປະຕິບັດໜ້າທີ່ວຽກງານໃຫ້ໄດ້ຮັບຜົນສໍາເລັດເປັນກ້າວໆ.

ໃນວັນດຽວກັນນີ້ ກໍໄດ້ມີພິທີມອບ-ຮັບບັດສະມາຊິກພັກໃຫ້ສະມາຊິກພັກສົມບູນທີ່ໄດ້ມາດຖານ ທີ່ສັງກັດຢູ່ໜ່ວຍພັກຮາກຖານ ຄຊປປລ ແຂວງເຊກອງຈໍານວນ 6 ສະຫາຍ, ຍິງ 6 ສະຫາຍ ຕາມມະຕິຕົກລົງຂອງຄະນະປະຈໍາພັກແຂວງເຊກອງ ສະບັບເລກທີ 684 ລົງວັນທີ 16 ພະຈິກ 2018.

Post a Comment

0 Comments