ເຊກອງ ສໍາມະນາປັບປຸງກໍ່ສ້າງພະນັກງານການນໍາເພດຍິງ

• ໂດຍ : ນາລີວັນ
ກອງປະຊຸມສໍາມະນາປັບປຸງກໍ່ສ້າງພະນັກງານການນໍາເພດຍິງແຂວງເຊກອງໄດ້ຈັດຂຶ້ນໃນວັນທີ 26 ກຸມພາ 2019 ນີ້ ຢູ່ທີ່ຫ້ອງປະຊຸມຫ້ອງວ່າການແຂວງເຊກອງຫຼັງໃໝ່ ໂດຍການເປັນປະທານຂອງທ່ານ ນາງ ຈັນຫອມ ມະຫາໄຊ ຄະນະປະຈໍາພັກແຂວງ ປະທານກວດກາພັກແຂວງ, ທ່ານ ນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງ, ທ່ານ ນາງ ສີສະຫງ່າ ແກ້ວດວງດີ ຫົວໜ້າພະແນກພາຍໃນແຂວງ, ມີບັນດາກໍາມະການພັກແຂວງ, ຄະນະປະຈໍາພັກເມືອງ, ຄະນະນໍາເພດຍິງທຸກຂະແໜງການທົ່ວແຂວງເຂົ້າຮ່ວມ.


ກອງປະຊຸມໄດ້ຮັບຟັງການສະຫຼຸບລາຍງານການສ້າງພະນັກງານເພດຍິງເຂົ້າເຖິງຕໍາແໜ່ງນໍາພາຄຸ້ມຄອງຂັ້ນຕ່າງໆຢູ່ແຂວງເຊກອງໃນໄລຍະຜ່ານມາ ແລະທິດທາງແຜນການຕໍ່ໜ້າ, ຮັບຟັງເນື້ອໃນທັດສະນະຂອງພັກຕໍ່ວຽກງານແມ່ຍິງ, ບົດຮຽນ ແລະເນື້ອໃນທັດສະນະຕ່າງໆຂອງພັກຕໍ່ການເປັນຜູ້ນໍາທີ່ດີຂອງເພດຍິງ ຈາກນັ້ນຜູ້ເຂົ້າຮ່ວມຍັງໄດ້ພ້ອມກັນສຸມໃສ່ປະກອບຄໍາຄິດເຫັນແລກປ່ຽນບົດຮຽນຮ່ວມກັນຕໍ່ກັບທັດສະນະ ແລະແບບແຜນວິທີເຮັດວຽກຂອງເພດຍິງ ເພື່ອເປັນການຍົກສູງຂີດຄວາມສາມາດແກ່ການຈັດຕັ້ງປະຕິບັດໜ້າທີ່ວຽກງານພະນັກງານການນໍາເພດຍິງຂັ້ນຕ່າງໆ ຢູ່ແຂວງເຊກອງໃຫ້ມີແບບແຜນວິທີເຮັດວຽກທີ່ຄ່ອງຕົວ ແລະມີປະສິດທິຜົນສູງ.


ໂອກາດດັ່ງກ່າວ ທ່ານ ນາງຈັນຫອມ ມະຫາໄຊ ໄດ້ມີຄໍາເຫັນຕໍ່ກອງປະຊຸມ ເຊິ່ງທ່ານໄດ້ຮຽກຮ້ອງໃຫ້ບັນດາພະນັກງານເພດຍິງທຸກທ່ານຈົ່ງເປັນເຈົ້າການຄົ້ນຄວ້າຫັນເອົາເນື້ອໃນສໍາຄັນຕ່າງໆຂອງກອງປະຊຸມດັ່ງກ່າວໄດ້ຊີ້ແນະ-ແນະນໍາຄັ້ງນີ້ເປັນແຜນການອັນລະອຽດ, ຈົ່ງພ້ອມກັນສຸມທຸກສະຕິປັນຍາປະກອບຄໍາຄິດເຫັນຮ່ວມກັນ ແລກປ່ຽນຄວາມຮູ້ເຊິ່ງກັນ ແລະກັນ, ພ້ອມກັນປຶກສາຫາລືຖອດຖອນບົດຮຽນດ້ານຕັ້ງໜ້າທີ່ຕ້ອງໄດ້ສືບຕໍ່ ແລະດ້ານຫຍໍ້ທໍ້ທີ່ຈະຕ້ອງໄດ້ພ້ອມກັນປັບປຸງແກ້ໄຂ ໂດຍນໍາເອົາບັນດາເນື້ອໃນທັດສະນະຕ່າງໆຂອງພັກ ແລະບົດຮຽນການເປັນຜູ້ນໍາທີ່ດີຂອງເພດຍິງ ໄປຈັດຕັ້ງປະຕິບັດ ເພື່ອເປັນບ່ອນອີງໃນການປັບປຸງແກ້ໄຂ-ການນໍາພາໃນຂັ້ນຂອງຕົນໃຫ້ມີຜົນສໍາເລັດຕາມລະດັບຄາດໝາຍ ມີປະສິດທິພາບປະສິດທິຜົນສູງຂຶ້ນກວ່າເກົ່າ.

Post a Comment

0 Comments