ສິ່ງທີ່ບໍ່ງາມຕາພາໃຫ້ບໍ່ງາມໃຈໃນປະເທດເຮົາ…


ຄືດັ່ງຮູ້ກັນດີແລ້ວວ່າ: ການສ້າງສາພັດທະນາປະເທດຊາດ ໃນໄລຍະປັດຈຸບັນ ພວມຢູ່ໃນໄລຍະຂຸ້ນຂ້ຽວໃນຫຼາຍຂົງເຂດເສດຖະກິດສັງຄົມ.










ຄຽງຄູ່ກັບສິ່ງດັ່ງກ່າວ ປະກົດວ່າກໍ່ຍັງມີສິ່ງນ້ອຍໆທີ່ເກີດເກາະຕ່ອງຫ້ອຍຢູ່ໃນສັງຄົມ ແລະ ອາດຈະກາຍເປັນບັນຫາປົກກະຕິແບບ “ນົກລຶ້ງຜຽກ” ເສີຍໃຜເສີຍມັນ ປ່ອຍໃຫ້ວັນເວລາກາຍໄປເອງ ພາໃຫ້ມີສຽງຈົ່ມວ່າຕາມສື່ອອນລາຍຈຶ່ງແກ້ໄຂ ເພາະສິ່ງດັ່ງກ່າວເຖິງເປັນເລື່ອງນ້ອຍຖ້າສະສົມກໍ່ໃຫຍ່ ແຕ່ກໍ່ຍັງແມ່ນສີສັນຂອງສັງຄົມ, ແມ່ນໜ້າທີ່ຂອງທຸກຄົນ ແລະ ບາງຢ່າງກໍ່ເປັນໜ້າທີ່ການຈັດຕັ້ງກ່ຽວຂ້ອງອີກເປັນຕົ້ນແມ່ນ.





-ທາງໃນເທດສະບານເພນ້ອຍປ່ອຍໃຫ້ເພຫຼາຍ 5-6 ເດືອນຈຶ່ງແປງ, ຄວນເນັ້ນແຕ່ຫົວທີໂລດ.





-ໄຟແດງຕາຍດົນນານປ່ອຍໃຫ້ຄວາມສັບສົນອົນລະມ່ານ ໃນການຈະລາ­ຈອນບ່ອນນັ້ນ.





-ການແຕ້ມເສັ້ນແບ່ງໃຈກາງທາງຈະລາຈອນ, ປ້າຍຈະລາຈອນ ແລະ ອື່ນໆກ່ຽວກັບການຈະລາຈອນຍັງບໍ່ທັນຫຼາຍ ແລະ ພຽງພໍ.









-ການຫຼີ້ນເຕະບານມິດຕະພາບ ຫຼື ແຂ່ງຂັນຈິງ, ຕີບຸນມິດຕະພາບກໍ່ຕາມ ມັກຈະສະຫຼຸບກັນດ້ວຍການດື່ມເຫຼົ້າເບຍຂ້າງສະໜາມ, ສັບເພເຮໂລ… ບາງກໍ່ເສື້ອກີລາບໍ່ທັນແກ້, ເຫັນເບີ, ເຫັນຊື່ທິມ ຫຼັ່ງເຂົ້າຮ້ານເຫຼົ້າຮ້ານເບຍຍືດໆ…ເຮັດແບບນີ້ການພັດທະນາກິລາຊິລອດບໍ, ເປັນການປູກຈິດສຳນຶກທີ່ບໍ່ເໝາະໃຫ້ຄົນລຸ້ນໃໝ່ຕາມມາ.





-ກາງຄືນຍັງມີການເປີດເພງເສບເພງ (ຕ່າງປະເທດ ແຕ່ຜັດບອກວ່າເພງອາຊຽນ) ໃນຄຸ້ມໃນບ້ານລົບກວນໝູ່ຫຼັບນອນຄືບໍ່ມີລະບຽບ ຫຼື ລະດັບການສຶກສາ ເພາະທຸກຄົນບໍ່ແມ່ນຈະຟັງແລ້ວມ່ວນນຳ ສຳຄັນວັນໜ້າຍັງມີວຽກງານເຮັດ ຖ້າໄດ້ພັກຜ່ອນນອນຫຼັບກໍ່ມີແຮງສະບາຍ…ຖ້າວ່າມີການກິນດອງເຊັ່ນກັນ ຫຼື ເສບງັນສ່ວນບຸກຄົນກໍ່ບໍ່ຄວນກາຍສິບໂມງ ແລະ ບໍ່ໃຫ້ສຽງດັງໄກ.









-ການຖິ້ມຂີ້ເຫຍື້ອ ການເຮັດອະນາໄມອ້ອມແອ້ມສະຖານທີ່ພັກເຊົາ, ເຮືອນຊານລານແປ້ນ (ສະເພາະຕົວເມືອງ) ຄວນເຮັດຈິງຈັງຄັກແນ່.





-ການໃຊ້ລົດໃຊ້ຖະໜົນຕ້ອງມີສະຕິ ປະຕິບັດຕາມກົດລະບຽບຈະລາຈອນເພື່ອຄວາມປອດໄພ ໂດຍສະເພາະທາງຮ່ອມຄັບແຄບບໍ່ຄວນຂັບໄວ ເພາະບໍ່ແມ່ນທາງຫຼວງແຫ່ງຊາດ ເຖິງວ່າຈະປູຄອນກີດກໍ່ຕາມ ກໍ່ຕ້ອງປະຕິບັດເພາະມັນແຄບ ເມື່ອຂະໂມະກັນເອົາຍາກ





-ສ່ວນຜູ້ຮັບຜິດຊອບມ້ຽນຂີ້ເຫຍື້ອ, ລົດມ້ຽນຂີ້ເຫຍື້ອຕ້ອງປະຕິບັດຕາມຕາຕະລາງການນັດເວລາມື້ວັນໄປເອົາ ເພາະເວລາເອົາອອກປະໄວ້ແຄມທາງໜ້າບ້ານ ຄົນກໍ່ຄົ້ນຫາຂອງ ແລະ ບໍ່ມ້ຽນ ໝາກໍ່ຄົ້ນຊອກກິນ ເຮັດໃຫ້ແຕກຊະເປິະເປື້ອນ.










ສິ່ງບໍ່ງາມຕາພາໃຫ້ບໍ່ງາມໃຈຍັງມີຫຼາຍ ໂດຍສະເພາະ ສິ່ງທີ່ພາໃຫ້ເກີດປະກົດການຫຍໍ້ທໍ້ນັ້ນ ຖ້າທຸກຄົນມີຈິດໃຈໄຂຄວາມຮັບຜິດຊອບຕໍ່ສັງຄົມໃຫ້ກວ້າງ ກໍ່ຄືການຈັດຕັ້ງເຄັ່ງໂສ້ເຂົ້າຕື່ມບໍ່ໃຫ້ຍານ ເຊື່ອແນ່ວ່າບ້ານເມືອງພວກເຮົາຈະມີສີສັນສວຍງາມເພີ່ມຂຶ້ນ.
ຂອບໃຈທີ່ມາ: .blogspot.com


Post a Comment

0 Comments