ຈຳປາສັກຈັດສຳມະນາກ່ຽວກັບຄວາມປອດໄພທາງຫຼວງແລະຖອດຖອນບົດຮຽນການຂື້ນທະບຽນ-ສອບເສັງໃບຂັບຂີ່

ຈໍາປາສັກ: ໃນລະຫວ່າງວັນທີ 14-15 ກຸມພາ 2019, ທີ່ພະແນກໂຍທາທິການ ແລະ ຂົນສົ່ງແຂວງຈຳປາສັກ, ໄດ້ເປີດກອງປະຊຸມສຳມະນາດ້ານຄວາມປອດໄພທາງຫຼວງ ແລະ ຖອດຖອນບົດຮຽນການຂື້ນທະບຽນ, ການກວດກາເຕັກນິກ ແລະ ການສອບເສັງໃບຂັບຂີ່, ພາຍໃຕ້ການເປັນປະທານຂອງທ່ານ ສະແຫວງ ພູນສະຫວັດ, ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ, ແລະ ໂດຍມີຄະນະນຳຫ້ອງການໂຍທາທິການ ແລະ ຂົນສົ່ງເມືອງ ແລະ ນະຄອນ, ພະນັກງານວິຊາການຂອງພະແນກການ, ຂະແໜງການກ່ຽວຂ້ອງ, ພ້ອມທັງຜູ້ຕາງໜ້າອົງການຈັດຕັ້ງຂອງລັດ ແລະ ສັງຄົມອ້ອມຂ້າງແຂວງເຂົ້າຮ່ວມ.


ທ່ານ ສະແຫວງ ພູນສະຫວັດ, ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງຈຳປາສັກ ໄດ້ກ່າວວ່າ: ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອແນໃສ່ໃຫ້ພະນັກງານຮັບຮູ້ ແລະ ເຂົ້າໃຈແຜນຍຸດທະສາດວຽກງານຄວາມປອດໄພຕາມທາງຫຼວງຂອງແຂວງແຕ່ນີ້ຮອດປີ 2020, 2025 ແລະ 2030, ພ້ອມທັງໂຄສະນາປູກຈິດສຳນຶກໃຫ້ສັງຄົມເຂົ້າໃຈໃນການນໍາໃຊ້ພາຫະນະເພື່ອຄວາມປອດໄພ, ຮັບຮູ້ເຖິງສາເຫດ, ຜົນກະທົບ ແລະ ວິທີປ້ອງກັນ ແລະ ແກ້ໄຂອຸປະຕິເຫດ,ການນໍາໃຊ້ປ້າຍສັນຍານ, ເຄື່ອງໝາຍຕາມທາງຫຼວງ ແລະ ອື່ນໆ, ແນໃສ່ເພື່ອສ້າງສະຕິຄວາມເປັນເຈົ້າການຂອງຜູ້ຂັບຂີ່ໃຫ້ປະຕິບັດກົດໝາຍວ່າດ້ວຍການຈາລະຈອນທາງບົກ, ກົດໝາຍວ່າດ້ວຍທາງຫຼວງ, ບໍ່ໃຫ້ຜູ້ຂັບຂີ່ລ່ວງລະເມີດໄຟອຳນາດ, ປ້າຍສັນຍານຫ້າມຕາມທາງຫຼວງ ເເລະ ເພື່ອສ້າງຄວາມເປັນລະບຽບປອດໄພໃນການສັນຈອນ, ແລະ ຫຼຸດຜ່ອນການເກີດອຸປະຕິເຫດຕາມທາງຫຼວງໃຫ້ໜ້ອຍລົງ.


ພາຍຫຼັງທີ່ໄດ້ຮັບຟັງການເຜີຍແຜ່ເອກະສານຕ່າງໆ, ບັນດາຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄຳຄິດຄຳເຫັນ, ເພື່ອເຮັດແນວໃດຫາວິທີທາງທີ່ເໝາະສົມຮ່ວມກັນ ເພື່ອໃຫ້ທຸກພາກສ່ວນໃນສັງຄົມເປັນເຈົ້າການໃນການເຄົາລົບ ແລະ ປະຕິບັດກົດໝາຍວ່າດ້ວຍທາງຫຼວງຢ່າງເຂັ້ມງວດ ແລະ ປະຕິບັດມາດຕາການເດັດຂາດຕໍ່ຜູ້ລະເມີດ.

ໂດຍ: ເກດສະໜາ ແກ້ວສຸວັນນະແສງ

Post a Comment

0 Comments