ເຈົ້າແຂວງຈຳປາສັກຕ້ອນຮັບຄະນະຜູ້ຕ່າງໜ້າກອງທືນພັດທະນາເສດຖະກິດ EDCF

ຈໍາປາສັກ: ພິທີຕ້ອນຮັບຄະນະຜູ້ຕ່າງໜ້າກອງທືນຮ່ວມມືພັດທະນາເສດຖະກິດຂອງສາທາລະນະລັດເກົາຫຼີ EDCF ນຳໂດຍ ທ່ານ ກູບອນຊູ ໄດ້ຈັດຂື້ນໃນຕອນຄໍ່າຄືນຂອງວັນທີ 20 ກຸມພານີ້ຢູ່ທີ່ໂຮງແຮມເອລະວັນດີເວີໄຊ ນະຄອນປາກເຊ. ໂດຍການເຂົ້າຮ່ວມ ແລະ ຕ້ອນຮັບຂອງທ່ານ ປ ອ ບຸນຖອງ ດີວິໄຊ ເຈົ້າແຂວງຈຳປາສັກ, ພ້ອມດ້ວຍການນຳແຂວງ, ຫົວໜ້າພະແນກໂຍທາທິການ ແລະ ຂົນສົ່ງ, ບໍລິສັດລັດວິສະຫະກິດນຳ້ປະປາແຂວງ, ເມຶອງ ແລະ ພະແນກການກ່ຽວຂ້ອງເຂົ້າຮ່ວມ.

ໃນພິທີຕ້ອນຮັບ,ທ່ານເຈົ້າແຂວງຈຳປາສັກໄດ້ຮັບຟັງລາຍງານການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈຳປາສັກ ແລະ ແຂວງສາລະວັນ ຂອງຄະນະຜູ້ແທນຕ່າງໜ້າກອງທືນຮ່ວມມືພັດທະນາເສດຖະກິດ EDCF ຂອງສ ເກົາຫຼີໃນວັນທີ 19-20 ກຸມພານີ້ ເປັນຕົ້ນແມ່ນໄດ້ມາຕິດຕາມຄວາມຄືບໜ້າໂຄງການພັດທະນາແຄມຂອງແຂວງຈຳປາສັກ, ສຶກສາຄວາມເປັນໄປໄດ້ໃນການກໍ່ສ້າງໂຮງງານນໍ້າປະປາຢູ່ເມຶອງສຸຂຸມາ ແລະ ຢູ່ແຂວງສາລະວັນທີ່ທາງກອງທືນຮ່ວມມືພັດທະນາເສດຖະກິດ ຈະໃຫ້ທືນຊ່ວຍເຫຼືອສຶກສາສຳຫຼວດ ແລະ ທືນກູ້ຢືມກໍ່ສ້າງດ້ວຍອັດຕາດອກເບ້ຍຕໍ່າ.

ຜ່ານມາແຂວງຈຳປາສັກໄດ້ຮັບທຶນຊ່ວຍເຫຼືອ ແລະກູ້ຢືມ ຈາກ DECF ໃນໂຄງການພັດທະນາແຄມຂອງທີ່ສືບຕໍ່ດຳເນີນການກໍ່ສ້າງຢູ່ໃນປະຈຸບັນ,ຈາກນີ້ທາງແຂວງຍັງກໍຕ້ອງການທຶນຊ່ວຍເຫຼືອເຂົ້າໃນໂຄງການກໍ່ສ້າງລະບົບນໍ້າປະປາ ຢູ່ເມືອງສຸຂຸມາ ແລະເມືອງອື່ນໆ ແນໃສ່ໃຫ້ປະຊາຊົນໄດ້ຊົມໃຊ້ນໍ້າປະປາຢ່າງທົ່ວເຖິງແລະ ທຶນເຂົ້າໃນການກໍ່ສ້າງພັດທະນາ ໂຮງໝໍແຂວງໃຫ້ຕອບສະໜອງໄດ້ກັບການປິ່ນປົວຄົນເຈັບ.

ຫຼັງຈາກຟັງລາຍງານແລ້ວຍັງໄດ້ຈັດພິທີບາສີສູ່ຂັວນໃຫ້ຄະນະຜູ້ຕາງໜ້າ ກອງທຶນຮ່ວມພັດທະນາເສດຖະກິດ EDCF ດັ່ງກ່າວຕາມຮີດຄອງປະເພນີວັດທະນະທຳຂອງຊາດລາວ ແລະ ຈັດງານລ້ຽງສັງສັນຕ້ອນຮັບຢ່າງອົບອຸ່ນ.
ຂ່າວ: ເກດສະໜາ ແກ້ວສຸວັນນະແສງ (ສວຈ)

Post a Comment

0 Comments