Header Ads

ສາວໄວ 19 ປີ ຄ້າຂາຍຢາເສບຕິດຄຸກ 10 ປີ ປັບໃໝ 100 ລ້ານກີບ

ສານປະຊາຊົນແຂວງສະ ຫວັນນະເຂດປະກາດສັ່ງ ຈໍາຄຸກ 10 ປີພ້ອມປັບໃໝ ເປັນເງິນ 100 ລ້ານກີບ ນາງ ສຸແພງພັນ ດວງເດດ ຫລື ໝີ ທີ່ກໍາລັງເປັນສາວໄວອາຍຸ 19 ປີ ຢູ່ບ້ານໂພນສະຫວ່າງໃຕ້ ນະຄອນໄກສອນ ພົມວິຫານ ແຂວງສະຫວັນນະເຂດ ຊຶ່ງ ພາຍຫລັງທີ່ເຈົ້າໜ້າທີ່ຕໍາຫລວດ ພົບພິຫລຸດວ່າມີການຮ່ວມຄ້າຂາຍຢາເສບຕິດ ປະເພດຢາບ້າ ນໍາໝູ່ຜູ້ຮ່ວມຂະບວນການ ຊຶ່ງໃນກາງເດືອນມັງກອນ ປີ 2019ນີ້ ສານປະຊາຊົນແຂວງສະຫວັນນະເຂດກໍ່ໄດ້ມີຄໍາພິພາກສາຊີ້ຂາດຢ່າງເປັນທາງການວ່າເປັນການກະທໍາຜິດຈິງທີ່ເປັນການຄ້າຂາຍສິ່ງເສບຕິດ ຊຶ່ງຜູ້ກ່ຽວໄດ້ຖືກເຈົ້າໜ້າທີ່ຈັບແລະກັກຂັງແຕ່ວັນທີ 11 ທັນວາ 2017 ທີ່ຜ່ານມາ.




ໄອຍະການປະຊາຊົນແຂວງສະຫວັນນະເຂດ ໄດ້ສັ່ງຟ້ອງແລະຖະແຫລງວ່າ:ມີຫມູ່ເພື່ອນ ຊາຍຜູ້ຮ່ວມຂະບວນການໄດ້ໂທລະສັບສັ່ງຊື້ຢາບ້າຈໍານວນ 1 ມັດ ໃນລາຄາ 39.000 ບາດ ຈາກນັ້ນນາງ ສຸແພງພັນ ກໍ່ໄດ້ໂທລະສັບຕໍ່ຫາໝູ່ເພື່ອນຕື່ມອີກ ໂດຍບອກວ່າໃຫ້ໝູ່ເພື່ອນຟ້າວເອົາຢາບ້າມາຂາຍໃຫ້ຢູ່ເຮືອນຈໍານວນ 01 ມັດ ໃນເວລາຕໍ່ມາບຸກຄົນທີ່ໂທຫານັ້ນກໍ່ໄດ້ເອົາຢາບ້າມາໃຫ້ໂດຍມີລົດເກັງວີອ໋ອດ ສີຂາວ ໝາຍເລກທະບຽນ ກບ 6105 ກໍາແພງນະຄອນມາໃຫ້ ຕໍ່ຈາກນັ້ນ ນາງສຸແພງພັນ ກໍ່ໄດ້ເອົາຢາບ້າທີ່ໄດ້ຊື້ນັ້ນໄປຂາຍຕໍ່ໃຫ້ທ້າວ ພາສຸກ ຫລື ເປີ້ນ ທີ່ໄດ້ຂັບຂີ່ລົດຈັກຄຣິກໄອ ມາຊື້ຢານໍາ ຈໍານວນ 1 ມັດ ໃນເມື່ອໄດ້ຂາຍຢາບ້າໃນມືເປັນທີ່ຮຽບຮ້ອຍແລ້ວ ບໍ່ພໍເທົ່າໃດຕົນເອງກໍ່ຖືກເຈົ້າໜ້າທີ່ຕໍາຫລວດຈັບ ຊຶ່ງຮູ້ວ່າຜູ້ຮ່ວມຂະບວນການທີ່ຄ້າຂາຍຢາບ້າ 1 ມັດມີທ້າວພາສຸກ,,ທ້າວສັນຕິສຸກ,ທ້າວສົມໄຊ.ທ້າວບົວແກ້ວ ກໍ່ຖືກຈັບຮ່ວມກັນ






ຈາກບັນດາເອກະສານຫລັກຖານຕ່າງໆໃນສໍານວນຄະດີ ພ້ອມທັງຜົນໄຕ່ສວນຢ່າງລະອຽດເຫັນວ່າ: ນາງສຸແພງພັນ ຫລື ໝີ ແມ່ນເປັນຜູ້ກະທໍາຜິດຕໍ່ກົດໝາຍອາຍາໃນຂໍ້ຫາວ່າ:ຄ້າຂາຍຢາເສບຕິດ ປະເພດຢາບ້າ.ທັງນີ້ກໍ່ເນື່ອງຈາກວ່າ:ມີລູກຄ້າກໍ່ຄືເພື່ອນຮ່ວມຂະບວນການໄດ້ໂທລະສັບມາຊື້ຢາບ້າຈໍານວນ 1 ມັດໃນລາຄາ 39.000 ບາດ ຈາກນັ້ນຜູ້ກ່ຽວກໍ່ໄດ້ໂທລະສັບສັ່ງຊື້ຕໍ່ນໍາທ້າວສັນຕິສຸກ ຈໍານວນ 1 ມັດໃນລາຄາ 37.000 ບາດ ແລ້ວທ້າວສັນຕິສຸກກໍ່ໄປຊື້ຢາບ້າຕໍ່ກັບອີກຄົນໜຶ່ງໃນລາຄາ 33.000 ບາດ ເປັນການຊື້ຕິດຫນີ້ ຂາຍແລ້ວຈະສົ່ງເງິນຄືນ.ໃນທີ່ສຸດກໍ່ຖືກຈັບ.




ໄອຍະການປະຊາຊົນແຂວງສະຫວັນນະເຂດມີຄໍາເຫັນວ່າ:ການກະທໍາຂອງນາງ ສຸແພງພັນ ແມ່ນເປັນການກະທໍາທີ່ແຕະຕ້ອງເຖິງຄວາມເສຍຫາຍຕໍ່ລະບົບເສດຖະກິດຂອງຊາດ,ເຮັດໃຫ້ສັງຄົມບໍ່ມີຄວາມສະຫງົບສຸກ,ເປັນການເບື່ອເມົາຊາວໜຸ່ມເຍົາວະຊົນ ແລະເປັນການກະທໍາຜິດຕໍ່ກົດໝາຍອາຍາ ໃນຂໍ້ຫາຄ້າຂາຍຢາເສບຕິດ ປະເພດຢາບ້າ ຕາມທີ່ໄດ້ກໍານົດໄວ້ໃນມາດຕາ 146ຂໍ້2,ວັກ3 ແລະວັກ 4 ຂອງກົດໝາຍວ່າດ້ວຍການປັບປຸງມາດຕາ 146 ຂອງກົດໝາຍອາຍາສະບັບປັບປຸງປີ 2012 .ສ່ວນໝູ່ເພື່ອນທີ່ຖືກຈັບກໍ່ໄດ້ຖືກດໍາເນີນຄະດີພ້ອມກັຍຕົນເອງ.


ຂ່າວຈາກ : ສະຫວັນພັດທະນາ

No comments

Powered by Blogger.