Header Ads

ຕີນລົດແຕກ ສາເຫດຂອງອຸບັດຕິເຫດໄຟໄໝ້ລົດເສຍຊີວິດ 2 ຄົນ ສາຫັດ 1 ທີ່ສະຫວັນນະເຂດ

ເກີດອຸບັດຕິເຫດຢູ່ເສັ້ນທາງເລກ 9 ນະຄອນໄກສອນພົມວິຫານ ແຂວງສະຫວັນນະເຂດ ໂດຍລົດເກັງຮຸນໄດອີແລນຕຣາແລ່ນດ້ວຍຄວາມໄວເກີດລົດຕີນແຕກ ເສຍຫຼັກເຈືອກໄປຕໍາໃສ່ຂອບທໍ່ລະບາຍນໍ້າ ເຮັດໃຫ້ລົດປິ້ນແລ້ວເກີດໄຟໄໝ້ລົດ, ອຸບັດຕິເຫດຄັ້ງນີ້ ມີຜູ້ເສຍຊີວິດ 2 ຄົນ ແລະ ບາດເຈັບສາຫັດ 1 ຄົນ.



ຮອ ຈໍາປາ ສີສົມວົງ ຫົວໜ້າກອງຄະດີອຸບັດຕິເຫດ ພະແນກຕໍາຫຼວດຈະລາຈອນ ປກສ ແຂວງສະຫວັນນະເຂດໃຫ້ຮູ້ວ່າ: ອຸບັດຕິເຫດດັ່ງກ່າວເກີດຂຶ້ນໃນເວລາປະມານ 15:00 ໂມງ ຂອງວັນທີ 19 ມີນາ 2019 ຢູ່ເສັ້ນທາງເລກ 9 ເຂດບ້ານນາຈະຫຼີດ ນະຄອນໄກສອນ, ລົດຄັນເກີດເຫດ ໝາຍເລກທະບຽນ ກຈ 3422 ສະຫວັນນະເຂດ ຂັບຂີ່ໂດຍທ້າວ ພຸດທະເພັງ ອາຍຸ 36 ປີ, ບ້ານຈອມແກ້ວ ນະຄອນໄກສອນ ມີຜູ້ຢູ່ໃນລົດທັງໝົດ 3 ຄົນ ຍິງ 2 ຄົນ,



ຂັບຂີ່ມາແຕ່ເຊໂນ ມຸ່ງໜ້າເຂົ້າສູ່ສະຫັວນນະເຂດ ( ທິດຕາເວັນອອກ ຫາ ທິດຕາເວັນຕົກ ) ດ້ວຍຄວາມໄວ; ພໍມາຮອດຈຸດເກີດເຫດ ຕີນລົດແຕກຈິ່ງເສຍຫຼັກເຈືອກລົງແຄມທາງ ຫົວລົດໄປຕໍາໃສ່ຂອບທໍ່ລອດທາງລົດປິ້ນ 1 ຮອບ, ແລ້ວເຮັດໃຫ້ນໍ້າມັນຮົ່ວໄຫຼຈົນເກີດໄຟລຸກໄໝ້, ແຕ່ຜູ້ເຫັນເຫດການໄດ້ພາກັນຊ່ອຍເຫຼືອເອົາຜູ້ທີ່ຕິດຢູ່ໃນລົດອອກມາໄດ້ທັນກ່ອນໄຟລຸກໄໝ້ໝົດຄັນ.



ຈາກອຸບັດຕິເຫດທີ່ໃນຄັ້ງນີ້ ເຮັດໃຫ້ ທ້າວ ພຸດທະເພັງ ແລະ ນາງ ປາລີນາ ອາຍຸ 34 ປີ ບ້ານໄຊຍະພູມ ນະຄອນໄກສອນ ເສຍຊີວິດຄາທີ່, ສ່ວນອີກຄົນໜຶ່ງໄດ້ຮັບບາດເຈັບສາຫັດ.





No comments

Powered by Blogger.