Header Ads

ເຕືອນອີກຄັ້ງ! ນະຄອນຫຼວງປັບ 20 ເທົ່າ ກໍລະນີເມົາແລ້ວຂັບ! ປະຕິບັດ 1 ເມສາ 2019 ເປັນຕົ້ນໄປ


ໃນກອງປະຊຸມເຊື່ອມຊືມຂໍ້ຕົກລົງສະບັັບເລກທີ 1323/ຈນວ, ລົງວັນທີ 21 ທັນວາ 2018 ວ່າດ້ວຍມາດຕະການຫຼຸດຜ່ອນອຸບັດຕິເຫດ ແລະ ຮັກສາຄວາມປອດໄພຕາມຖະໜົນ ທົ່ວນະຄອນຫຼວງວຽງຈັນ, ທີ່ຈັດຂຶ້ນໃນຕອນວັນທີ 19 ມີນາ 2019, ຢູ່ ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ.

ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ເຈົ້າຄອງນະຄອນຫຼວງວຽງຈັນ ໄດ້ກ່າວເນັ້ນໃຫ້ ປກສ ນວ ກໍຄື ຕໍາຫຼວດຈະລາຈອນ ນະຄອນຫຼວງວຽງຈັນ ໃຫ້ເລີ່ມຈັດຕັ້ງປະຕິບັດຂໍ້ຕົກລົງສະບັບດັ່ງກ່າວຕັ້ງແຕ່ວັນທີ 1 ເມສາ 2019 ເປັນຕົ້ນໄປ.

ຂໍ້ຕົກລົງສະບັບນີ້ ປະກອບມີ 7 ໝວດ 29 ມາດຕາ; ເຊິ່ງໃນໝວດທີ III ມາດຕາ 13 ໃນຂໍ້ 3 ໄດ້ລະບຸໄວ້ວ່າ: ເມື່ອກວດພົບທາດເຫຼົ້າ ແລະ ສິ່ງມືນເມົາ ໃນຮ່າງກາຍຂອງຜູ່ຂັບຂີ່ຍານພາຫະນະເກີນປະລິມານທີ່ກໍານົດໄວ້ໃນມາດຕາ 20 ຂອງກົດໝາຍ ວ່າດ້ວຍການຈະລາຈອນທາງບົກ ໃຫ້ປະຕິບັດມາດຕະການຕໍ່ຜູ່ຂັບຂີ່ດັ່ງນີ້:

- ຄັ້ງທີ 1: ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 1 ເດືອນ ແລະ ປັບໃໝຕໍ່າສຸດຕາມມາດຕາ 5 ຂອງດໍາລັດເລກທີ 188/ນຍ, ລົງວັນທີ 03 ກໍລະກົດ 2007 ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ສະບັບເລກທີ 028/ສປ ນວ, ລົງວັນທີ 06 ກັນຍາ 2018.

- ຄັ້ງທີ 2: ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 3 ເດືອນ ແລະ ປັບໃໝ 10 ເທົ່າ ຕາມມາດຕາ 5 ຂອງດໍາລັດເລກທີ 188/ນຍ ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ສະບັບເລກທີ 028/ສປ ນວ, ລົງວັນທີ 06 ກັນຍາ 2018.

- ຄັ້ງທີ 3: ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 6 ເດືອນ ຫາ 1 ປີ ແລະ ປັບໃໝ 20 ເທົ່າ ຕາມມາດຕາ 5 ຂອງດໍາລັດເລກທີ 188/ນຍ ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ສະບັບເລກທີ 028/ສປ ນວ, ລົງວັນທີ 06 ກັນຍາ 2018.

- ຄັ້ງທີ 4: ຂຽນໃບຮັບສາລະພາບລະເມີດກົດຈະລາຈອນ, ຢຶດໃບຂັບຂີ່ເລີຍ 1 ປີ ຈິ່ງອະນຸຍາດໃຫ້ໄປເສັງເອົາໃບຂັບຂີ່ຄືນໃໝ່ ແລະ ປັບໃໝ 20 ເທົ່າ ຕາມມາດຕາ 5 ຂອງດໍາລັດເລກທີ 188/ນຍ ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ສະບັບເລກທີ 028/ສປ ນວ, ລົງວັນທີ 06 ກັນຍາ 2018.

- ກໍລະນີຜູ່ຂັບຂີ່ຍານພາຫະນະ ດື່ມເຄື່ອງດື່ມທີ່ມີທາດເຫຼົ້າ ແລະ ເສບສິ່ງມືນເມົາ ເປັນຕົ້ນເຫດພາໃຫ້ເກີດອຸບັດຕິເຫດ ແມ່ນໃຫ້ນໍາໃຊ້ມາດຕະການສູງສຸດ ຕາມຄັ້ງທີ 4 ຂ້າງເທີງ ແລະ ດໍາເນີນຄະດີຕາມກົດໝາຍທີ່ກ່ຽວຂ້ອງ, ຖ້າບໍ່ໄດ້ເປັນຕົ້ນເຫດ ກໍໃຫ້ນໍາໃຊ້ມາດຕະການຕາມລໍາດັບຂ້າງເທີງນັ້ນ.


ຂໍ້ຕົກລົງ










------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Powered by Blogger.