Header Ads

ການຮ່ວມມືດ້ານການຄ້າ ຈີນ-ແມ່ນໍ້າຂອງ ບັນລຸ 260 ຕື້ກວ່າໂດລາ




ການພົວພັນການຄ້າລະຫວ່າງ ສປ ຈີນກັບ 5 ປະເທດສະມາຊິກແມ່ນໍ້າຂອງ(ລາວ,ມຽນມາ,ກໍາປູເຈຍ,ຫວຽດນາມ ແລະ ໄທ) ບັນລຸຫລາຍກວ່າ 260 ຕື້ໂດລາສະຫະລັດໃນປີ 2018 ຂະນະທີ່ການຮ່ວມມືໃນຂອບແມ່ນໍ້າຂອງ-ແມ່ນໍ້າລ້ານຊ້າງຕະຫລອດໄລຍະ 3 ປີລະຫວ່າງສປ ຈີນ ແລະ ສະມາຊິກແມ່ນໍ້າຂອງໄດ້ເກີດດອກອອກຜົນ ແລະ ມີຄວາມສໍາເລັດຢ່າງພົ້ນເດັ່ນ.

ການສະເຫລີມສະຫລອງຄົບຮອບ 3 ປີຂອບການຮ່ວມມືລະຫວ່າງແມ່ນໍ້າຂອງ ແລະ ແມ່ນໍ້າລ້ານຊ້າງໄດ້ຈັດຂຶ້ນໃນວັນທີ 22 ກຸມພາ 2019 ທີ່ນະຄອນປັກກິ່ງ ສປ ຈີນໂດຍໃຫ້ກຽດເຂົ້າຮ່ວມຂອງ ທ່ານ ເຈີນ ຊຽວດົງ, ຜູ້ຊ່ວຍລັດຖະມົນຕີຕ່າງປະເທດ ສປ ຈີນ (Mr. Chen Xiaodong, the Assistant Minister of Foreign Affairs), ທ່ານ ນາງ ວັນດີ ບຸດທະສະວົງ (Mrs. Vandy Bouthasavong ) ເອກອັກຄະລາຊະທູດ ສປປ ລາວປະຈໍາ ສປ ຈີນ ພ້ອມ ບັນດາທູດຕານູທູດ,ຜູ້ປະກອບການ,ສື່ມວນຊົນ ແລະ ເຈົ້າຫນ້າທີ່ກ່ຽວຂ້ອງເຂົ້າຮ່ວມ.



ທ່ານ ເຈີນ ຊຽວດົງ, ຜູ້ຊ່ວຍລັດຖະມົນຕີຕ່າງປະເທດ ສປ ຈີນໄດ້ກ່າວຢູ່ພິທີເປີດງານລ້ຽງຄົບຮອບ 3 ປີຂອບການຮ່ວມມືລະຫວ່າງແມ່ນໍ້າຂອງ ແລະ ແມ່ນໍ້າລ້ານຊ້າງວ່າການຮ່ວມມືຕະຫລອດ 3 ປີນັ້ນໄດ້ສະທ້ອນໃຫ້ເຫັນຄວາມພະຍາຍາມທີ່ຫມາຍຫມັ້ນ ແລະ ເກີດດອກອອກຜົນຢ່າງພົ້ນເດັ່ນໃນການຮ່ວມມືລະຫວ່າງ ສປ ຈີນ ແລະ ສະມາຊິກແມ່ນໍ້າຂອງໂດຍສະເພາະມູນຄ່າການຄ້າຂອງຈີນກັບ 5 ປະເທດສະມາຊິກບັນລຸກວ່າ 260 ຕື້ໂດລາສະຫະລັດໃນປີ 2018, ຮຸ້ນສ່ວນລົງທຶນໂດຍກົງຈາກຕ່າງປະເທດຂອງຈີນໃນບັນດາສະມາຊິກແມ່ນໍ້າຂອງບັນລຸ 32 ຕື້ກວ່າໂດລາສະຫະລັດ ແລະ ປະມານ 18.000 ກວ່າຄົນໄດ້ຮັບການຝຶກອົບຮົມດ້ານທັກສະວິຊາຊີບພາຍຫລັງ ສປ ຈີນສ້າງພື້ນຖານຝຶກອົບຮົມ ແລະ ສ້າງວິຊາຊີບໃນບັນດາປະເທດສະມາຊິກແມ່ນໍ້າຂອງ.

ທ່ານ ຜູ້ຊ່ວຍລັດຖະມົນຕີຕ່າງປະເທດ ສປ ຈີນຍັງກ່າວບາງຕອນວ່າ: ບັນດາປະເທດສະມາຊິກແມ່ນໍ້າຂອງຄື: ເພື່ອນບ້ານທີ່ດີ,ຄູ່ຮ່ວມມືທີ່ດີ ແລະ ເພື່ອນທີ່ດີ, ສປ ຈີນພ້ອມຈະຮ່ວມມືກັບບັນດາທ່ານຢ່າງຫ້າວຫັນໂດຍສະເພາະຮ່ວມກັນສ້າງແລວພັດທະນາເສດຖະກິດ, ສ້າງເປັນປະຊາຄົມຮ່ວມໂຊກຊະຕາກໍາໃນຂົງເຂດແມ່ນໍ້າຂອງໃຫ້ເບັ່ງບານ ແລະ ສີວິໄລຂຶ້ນເປັນກ້າວໆ.



ທ່ານ ນາງ ວັນດີ ບຸດທະສະວົງ (Mrs. Vandy Bouthasavong ) ເອກອັກຄະລາຊະທູດ ສປປ ລາວປະຈໍາ ສປ ຈີນຍັງໄດ້ກ່າວຈາກການຮ່ວມມື ແລະ ເພື່ອນທີ່ໄກ້ຊິດລະຫວ່າງສປ ຈີນກັບບັນດາປະເທດສະມາຊິກແມ່ນໍ້າຂອງໂດຍຜ່ານລັກສະນະພູມີປະເທດ,ວັດທະນະທໍາ, ການໄປມາຫາສູ່ລະຫວ່າງກັນ ແລະ ອື່ນໆ ເຊິ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ,ການຄ້າ,ການລົງ, ຄົມມະນາຄົມ, ທອ່ງທ່ຽວຢ່າງພົ້ນເດັ່ນໃນຕະຫລອດ 3 ປີຜ່ານມາໂດຍສະເພາະຫມາກຜົນຂອງການຈັດຕັ້ງປະຕິບັດຖະແຫລງການຊັນຍາ, ຖະແຫລງການພະນົມເປັນ ແລະ ແຜນໄລຍະ 5 ປີຂອງການຈັດຕັ້ງປະຕິບັດກ່ຽວກັບການຮ່ວມມືຂອງເອັມແອວຊີ 2018-2022. ນອກຈາກນັ້ນ ໂຄງການກອງທຶນພິເສດເອັມແອວຊີ,ໂຄງການເກັບກ່ຽວສຸກເສີນ ແລະ ອື່ນໆໄດ້ປະກອບສ່ວນ ແລະ ເພີ່ມທະວີການປັບປຸງຊີວິດການເປັນຂອງປະຊາຊົນບໍ່ຫນ້ອຍໃນບັນດາສະມາຊິກແມ່ນໍ້າຂອງເປັນຕົ້ນຂໍ້ລິເລີ່ມຫນຶ່ງແລວຫນຶ່ງເສັ້ນທາງ ແລະ ແລວພັດທະນາເສດຖະກິດເອັມແອວຊີ.



ທ່ານ ເອກອັກຄະລາຊະທູດ ສປປ ລາວປະຈໍາ ສປ ຈີນຍັງກ່າວຕື່ມອີກວ່າດ້ວຍຄວາມເຊື່ອໃນອະນາຄົດຂອງການຮ່ວມມື ແລະ ຍຸດທະສາດແມ່ຂອງ-ແມານໍ້າລ້ານຊ້າງ 6 ປະເທດຈະກະຕຸກຊຸກຍູ້ການພັດທະນາ ແລະ ນໍາຜົນປະໂຫຍດອັນໃຫຍ່ຫລວງມາສູ່ເອັມແອວຊີ ແລະ ຂົງເຂດດັ່ງກ່າວຢ່າງຕັ້ງຫນ້າ.

ພ້ອມດຽວກັນນີ້ ສປປ ລາວ ແລະ ສປ ຈີນໃນນາມເປັນປະທານຮ່ວມກັນກ່ຽວກັບເອັມແອວຊີ 2018-2020 ຈະເຮັດໃຫ້ສາມາດຍົກລະດັບການຮ່ວມມືສູງຂຶ້ນກວ່າເກົ່າ ແລະ ຈະສ້າງຜົນປະໂຫດຍເປັນຮູບປະທໍາຕໍ່ປະຊາຄົມໃນຂົງເຂດດັ່ງກ່າວ. ໂດຍ: ເກີດຂວັນໃຈ ມາລີຈັນສີ,ລາຍງານຈາກປັກກິ່ງ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Powered by Blogger.