ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດຄັ້ງທີ 4 ສະໄໝ ທີ x ໄດ້ປີດລົງດ້ວຍຜົນສຳເລັດຈົບງາມ.

ສູນກາງແນວລາວສ້າງຊາດໄດ້ດໍາເນີນ ກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດຄັ້ງທີ 4 ສະໄໝທີ X ພາຍໃຕ້ການເປັນປະທານຂອງ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ມີພະເຖລະນຸເຖລະ, ຮອງປະທານສູນກາງແນວລາວສ້າງຊາດ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ປະຈໍາແຂວງ-ນະຄອນຫຼວງທົ່ວປະເທດ ແລະ ຢູ່ຕ່າງປະເທດ, ບັນດາທ່ານຕາງໜ້າກະຊວງ-ອົງການ, ຕາງໜ້າອົງການພາຄີ ພ້ອມດ້ວຍຄະນະກົມ ສນຊ, ແຊກຖືເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ໃນລະຫວ່າງວັນທີ 12 ແລະ 13 ມີນາ 2019 ທີ່ ຫໍປະຊຸມ ITCT ນະຄອນຫຼວງວຽງຈັນ.
ກອງປະຊຸມຄັ້ງນີ້ ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສູນກາງແນວລາວສ້າງຊາດໄດ້ຜ່ານບົດສະຫຼຸບຕີລາຄາການເຄື່ອນໄຫວຂອງຄະນະກໍາມະການສູນກາງແນວລາວສ້າງຊາດ ໃນໄລຍະໜຶ່ງປີຜ່ານມາ (2018) ແລະ ທິດທາງແຜນການໜຶ່ງປີໃນຕໍ່ໜ້າ (2020);


ເຊິ່ງທ່ານໄດ້ຍົກໃຫ້ເຫັນວຽກງານທີ່ພົ້ນເດັ່ນຂອງຄະນະກໍາມະການສູນກາງແນວລາວສ້າງຊາດ ເປັນຕົ້ນແມ່ນວຽກງານສຶກສາອົບຮົມການເມືອງ-ແນວຄິດ, ການເຕົ້າໂຮມ ແລະ ການກໍ່ສ້າງກ້ອນກໍາລັງມະຫາສາມັກຄີປອງດອງທົ່ວວົງສາຄະນາຍາດແຫ່ງຊາດ, ວຽກງານສ້າງຄວາມເຂັ້ມແຂງໃຫ້ແກ່ອົງການແນວລາວສ້າງຊາດແຕ່ລະຂັ້ນ; ວຽກງານເສີມຂະຫຍາຍສິດເປັນເຈົ້າຂອງປະຊາຊົນ ປົກປັກຮັກສາຮີດຄອງປະເພນີອັນດີງາມຂອງຊາດ ແລະ ເອກະລັກຂອງແຕ່ລະຊົນເຜົ່າ ແລະ ວຽກງານອື່ນໆ; ໃນນັ້ນຍັງໄດ້ຮັບຟັງການປະກອບຄໍາເຫັນຂອງອົງການພາຄີ, ຂອງບັນດາກະຊວງ-ອົງ ການ ແລະ ບັນດາແນວລາວສ້າງຊາດແຂວງ-ເມືອງຈໍານວນໜຶ່ງ ເປັນຕົ້ນ ກະຊວງປ້ອງກັນປະເທດ ໃນຫົວຂໍ້ ຂະບວນການກະກຽມ ແລະ ສະເຫຼີມສະຫຼອງ 70 ປີວັນສ້າງຕັ້ງກອງທັບ; ກະຊວງການຕ່າງປະເທດ ໃນຫົວຂໍ້ ນະໂຍບາຍຂອງພັກ ຕໍ່ພີ່ນ້ອງຄົນເຊື້ອຊາດລາວ ທີ່ດໍາລົງຊິວິດຢູ່ຕ່າງປະເທດ; ຮັບຟັງການປະກອບຄໍາເຫັນຂອງແນວລາວສ້າງຊາດ ເມືອງເງິນ ແຂວງ ໄຊຍະບູລີ ກ່ຽວກັບຕົວແບບຂະບວນການສ້າງຄອບຄົວ ແລະ ບ້ານສາມັກຄີປອງດອງ, ພ້ອມນັ້ນ ກໍໄດ້ຮັບຟັງການປະກອບຄໍາເຫັນຂອງກໍາມະການສູນກາງແນວລາວສ້າງຊາດຈາກປະເທດຝຮັ່ງ ໃນວຽກງານແນວລາວສ້າງຊາດຕິດພັນກັບການເຄື່ອນໄຫວຂອງອົງການສໍາພັນຄົນລາວ ທີ່ປະເທດຝຣັ່ງ, ການປະກອບຄໍາເຫັນຕາມການເຈາະຈິ້ມຂອງປະທານກອງປະຊຸມ ແລະ ໄດ້ຮັບຟັງການປະກາດແຕ່ງຕັ້ງ ກໍາມະການສູນກາງແນວລາວສ້າງຊາດ ສະໄໝທີ X ຕື່ມອີກ.




ທ່ານ ປອ ໄຊສົມພອນ ພົມວິຫານ ປະທານສູນກາງແນວລາວສ້າງຊາດໄດ້ໂອ້ລົມຕໍ່ກອງປະຊຸມຄັ້ງນີ້ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວລວມຂອງກໍາມະການສູນກາງແນວລາວສ້າງຊາດທັງຢູ່ ສູນກາງ ແລະ ທ້ອງຖິ່ນ ແລະ ກໍາມະການແນວລາວສ້າງຊາດຢູ່ຕ່າງປະເທດທີ່ໄດ້ເອົາໃຈໃສ່ເຄື່ອນໄຫວຕາມພາລະບົດບາດຂອງຕົນດ້ວຍຄວາມຮັບຜິດຊອບ, ເປັນການປະກອບສ່ວນເຮັດໃຫ້ການປະຕິບັດໜ້າທີ່ການເມືອງຂອງແນວລາວສ້າງຊາດໄດ້ມີຜົນງານພົ້ນເດັ່ນຂຶ້ນໃນໄລຍະທີ່ຜ່ານມາ ໄດ້ຮັບຜົນສໍາເລັດເປັນກ້າວໆ, ແຕ່ທ່ານໄດ້ເໜັ້ນໜັກຕື່ມ ໂດຍສະເໜີໃຫ້ແນວລາວສ້າງຊາດແຕ່ສູນກາງຮອດທ້ອງຖິ່ນ, ສົບທົບກັບຄະນະພັກ, ອົງການປົກຄອງທ້ອງຖິ່ນຂັ້ນຂອງຕົນເອົາໃຈໃສ່ກະກຽມສ້າງຂະບວນການຕ້ອນຮັບວັນສ້າງຕັ້ງແນວລາວສ້າງຊາດຄົບຮອບ 70 ປີ ( 13 ສິງຫາ 1950-13 ສິງຫາ 2020) ໃຫ້ກວ້າງຂວາງດ້ວຍຫຼາຍຮູບການຕ່າງໆ,



ຄະນະປະຈໍາສູນກາງແນວລາວສ້າງຊາດກໍຄືຫ້ອງການ ແລະ ກົມກ່ຽວຂ້ອງຂອງສູນກາງແນວລາວສ້າງຊາດເອົາໃຈໃສ່ ກະກຽມກອງປະຊຸມໃຫຍ່ໜ່ວຍພັກຂັ້ນຕົນ, ສ່ວນປະທານແນວລາວສ້າງຊາດນະຄອນຫຼວງ, ບັນດາແຂວງເອົາໃຈໃສ່ຄົ້ນຄ້ວາປະສານສົມທົບກັນຄະນະພັກຂັ້ນຂອງຕົນໃນການກະກຽມບຸນຄະລາກອນ ໃຫ້ແກ່ກອງປະຊຸມໃຫຍ່ສາມຂັ້ນຂອງອົງການແນວລາວສ້າງຊາດ ໂດຍສົມທົບແໜ້ນກັບຄະນະພັກຂັ້ນຂອງຕົນໃນການ ຄົ້ນຄວ້າດ້ານບຸກຄະລາກອນຜູ້ທີ່ມີເງື່ອນໄຂຄົບຖ້ວນ ຕາມມາດຕະຖານ ແລະ ກົດໝາຍຂອງແນວລາວສ້າງຊາດກໍານົດໄວ້; ພ້ອມນັ້ນ, ອົງການແນວລາວສ້າງຊາດ, ກໍາມະການແນວລາວສ້າງຊາດແຕ່ລະຂັ້ນ ໃຫ້ເພີ່ມທະວີປະຕິບັດພາລະບົດບາດຕິດຕາມກວດກາຂອງແນວລາວສ້າງຊາດໃຫ້ເຂັ້ມແຂງ; ຄຽງຄູ່ກັນນັ້ນ ແນວລາວສ້າງຊາດທຸກຂັ້ນໃຫ້ສືບຕໍ່ຊີ້ນໍາ-ນໍາພາຕໍ່ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ ໃຫ້ເປັນຂະບວນກວ້າງຂວາງ ຕິດພັນກັບການສ້າງຄອບຄົວ, ສ້າງບ້ານພັດທະນາຢູ່ທ້ອງຖິ່ນຮາກຖານ ຕາມມະຕິສາມສ້າງຂອງພັກ-ລັດ.




ກອງປະຊຸມຄັ້ງນີ້ ຍັງໄດ້ຮັບຟັງ ບົດແນະນໍາທີ່ກ່ຽວກັບການຜັນຂະຫຍາຍຜົນສໍາເລັດກອງປະຊຸມພົບປະຜູ້ຊົງຄຸນວຸດທິບັນດາເຜົ່າທົ່ວປະເທດ ຄັ້ງທີ 3 ປີ 2018 ແລະ ຮັບຟັງການສະເໜີແຕ່ງຕັ້ງກໍາມະການສູນກາງແນວລາວສ້າງຊາດ ສະໄໝທີ X ເພີ່ມເຕີມ ແລະ ປ່ຽນແທນຈໍານວນ 9 ທ່ານຕື່ມອີກ.

Post a Comment

0 Comments