Header Ads

ຊາຍໄວ 45 ເລົ່າປະສົບການຊີວິດ ເຕືອນໃຈ ໄວລຸ້ນ! ລອງກົດອ່ານເບິ່ງ

ສະບາຍດີ ໂທລະໂຄ່ງ ແລະ ທຸກທ່ານທີ່ກໍາລັງອ່ານ ບົດຄວາມນີ້...

ກ່ອນອື່ນ ຂ້າພະເຈົ້າ ຂໍອານຸຍາດແຈ້ງໃຫ້ຮູ້ວ່າ ເລື່ອງລາວທີ່ຈະແບ່ງປັນນີ້ ແມ່ນປະສົບການຕົວຈິງຂອງຕົນເອງ ເຊິ່ງຫຼາຍຄົນອາດຈະພົບພໍ້ຄ້າຍຄືກັນ ຫຼື ອາດແຕກຕ່າງກັນໄປ.

ຈາກປະສົບການ ຂອງຊາຍໄວ 45 ປີ, ຢາກເອົາມາແບ່ງປັນ ຫຼື ເປັນຄະຕິ ເຕືອນໃຈແກ່ ຄົນໜຸ່ມນ້ອຍ ໂດຍສະເພາະ ໄວລຸ້ນ ທີ່ຢູ່ໃນໄວ ກໍາລັງມ່ວນ, ຄົນໜຸ່ມ ທີ່ຢູ່ໃນໄວດຸໝັ່ນ ທີ່ມີພອນສະຫວັນ ແລະ ສາມາດ ຫາລາຍຮັບໄດ້ແດ່ແລ້ວ. ເພື່ອວ່າ ປະສົບການຂອງຂ້າພະເຈົ້າ ຈະຊ່ວຍໃຫ້ ທຸກຄົນ ໄດ້ມີໂອກາດທົບທວນ ເພາະເຊື່ອວ່າ ອີກບໍ່ດົນ ຄົນໄວລຸ້ນ ກໍ່ຈະມີໂອກາດ ກ້າວສູ່ໄວ 45 ປີ ຄືກັບຂ້າພະເຈົ້າ.

ພາບປະກອບຈາກ: Getty Image



ພາຍຫຼັງຈົບການສຶກສາໃນມະຫາວິທະຍາໄລ ເຊິ່ງຕອນນັ້ນ ກໍ່ອາຍຸ ຊາວຫ້າຊາວຫົກປີ, ຂ້າພະເຈົ້າເອງກໍ່ບໍ່ຕ່າງຫຍັງກັບ ນັກສຶກສາຄົນອື່ນໆ ທີ່ຕ້ອງໄດ້ຊອກວຽກເຮັດ ເພື່ອໃຫ້ມີລາຍຮັບ ແລະ ບໍ່ຢາກທີ່ຈະເພິ່ງພາພໍ່ແມ່, ພ້ອມດຽວກັນ ກໍ່ຢາກມີເງິນ ເພື່ອຕອບແທນບຸນຄຸນເພິ່ນ.

ດ້ວຍຄວາມດຸໝັ່ນ ແລະ ຄວາມສາມາດ ຂ້າພະເຈົ້າ ກໍ່ມີວຽກເຮັດທີ່ດີ ເພາະເປັນນັກການຕະຫຼາດ ເຊິ່ງຖືໄດ້ວ່າລາຍຮັບດີຫຼາຍ ເມື່ອທຽບກັບໝູ່ເພື່ອນຫຼາຍໆຄົນ. ຕະຫຼອດໄລຍະເວລາ ທີ່ມີເຫື່ອແຮງ ແລະ ສາມາດ ຫາເງິນໄດ້ນັ້ນ, ຂ້າພະເຈົ້າ ກໍ່ບໍ່ໄດ້ສົນໃຈຫຍັງຫຼາຍ ກັບສຸຂະພາບ ແລະ ອັນອື່ນໆ ເພາະຄິດວ່າ ຕົນເອງຍັງແຂງແຮງ.


ເກືອບວ່າ ເປັນປະຈໍາ ຫຼັງເລີກ ວຽກ ຂ້າພະເຈົ້າ ຈະມັກໄປຊຸມແຊວກັບເພື່ອນຮ່ວມງານ, ຖ້າເປັນວັນສຸກ ກໍ່ຈະເອົາກັນຍາວ ແບບວ່າ ຕໍ່ກັນຈົນເດີກ. ເພາະຊີວິດໂສດ ມັນກໍ່ຍັງມີອິດສະຫຼະ ທີ່ຈະມ່ວນຊື່ນໄປເລື້ອຍໆ. ເພາະຍັງເຊື່ອວ່າຕົນເອງຍັງໜຸ່ມ ແລະ ແຂງແຮງ. ການດຶ່ມສຸລາ ເຮຮາ ແມ່ນເປັນເລື່ອງທໍາມະດາ ແລະ ເວລາໝູ່ຄົນໃດຊວນ ກໍ່ບໍ່ເຄີຍປະຕິເສດ. ຂ້າພະເຈົ້າເອງ ກໍ່ເລີ່ມບໍ່ໄປນໍາໝູ່ທີ່ ເວລາທີ່ຂ້າພະເຈົ້າຊວນ ແລ້ວເຂົາມັກປະຕິເສດ ເພາະຄິດໄປເອງວ່າ ໝູ່ທີ່ບໍ່ໄປຮ່ວມສ້າງສັນກັບ ຕົນນັ້ນ ເຂົາເປັນຄົນບໍ່ເຂົ້າສັງຄົມ ບໍ່ມີຄົນຄົບຄ້າສະມາຄົມ.


ຍ້ອນມີລາຍຮັບ ແລະ ຄິດວ່າຕົນເອງຈະສາມາດຫາເງິນໄດ້ແບບນີ້ຕະຫຼອດໄປ, ບໍ່ວ່າມີງານຢູ່ໃສ ງານດົນຕີ, ງານບຸນ ຂ້າພະເຈົ້າກໍ່ຈະຫາເຫດຜົນໄດ້ໄປຮ່ວມງານ. ຖ້າບໍ່ມີງານ ພໍແຕ່ວ່າ ໄດ້ເງິນຈາກວຽກ ກໍ່ຫາເຫດຜົນໄປສະຫຼອງ ແລະ ໃຊ້ຈ່າຍເງິນ. ພ້ອມນີ້, ຂ້າພະເຈົ້າກໍ່ມັກຄິດເປັນຄົນໃຈໃຫຍ່ ມັກຈະລ້ຽງໝູ່ ຫຼື ຈ່າຍຄາເຫຼົ້າເບຍ ຫຼາຍກ່ອນຄົນອື່ນ. ເວົ້າໄດ້ວ່າ, ເງິນທີ່ໄດ້ມາຈາກການເຮັດວຽກ ຂ້າພະເຈົ້າຜານໄປກັບເລື່ອງຊຸມແຊວ ຈໍານວນມະຫາສານ. ແລະ ຍິ່ງເວລາມືນເມົາ ແລ້ວພົບກັບຜູ່ສາວ ກໍ່ຍິງໃຊ້ຈ່າຍໄປຫຼາຍ.

ຈາກພຶດຕິກໍາ ຫຼິ້ນກິນ ແລະ ເຊື່ອວ່າຕົນເອງຍັງໜຸ່ມ, ແຂງແຮງ, ການມີໝູ່ເພື່ອໃນວົງເຫຼົ້າໄດ້ ຊຸມແຊວ ຕະຫຼອດເວລາ ຫຼາຍປີ, ຂ້າພະເຈົ້າກໍ່ເລີ່ມມີບັນຫາ ເລື່ອງສຸຂະພາບ ໃນໄວ 35 ປີ ທີ່ກ່ຽວພັນກັບໂລກຕັບ ແລະ ຄວາມອ່ອນເພຍຂອງຮ່າງກາຍ. ແນ່ນອນ, ເມື່ອບັນຫາສຸຂະພາບ ເລີ່ມເຂົ້າມາ ບັນຫາອື່ນໆ ກໍ່ເລີ່ມຈະທະຍອຍ ເໝືອນດັງມໍລະສຸມ ເຂົ້າມາໃນຊີວິດ.

ຈາກທີ່ເຄີຍໄປຊຸມແຊວ ຫຼັງເລີກວຽກ, ຂ້າພະເຈົ້າກໍ່ຕ້ອງໄດ້ເລີກລາ ກັບບ້ານ ແຕ່ສິ່ງທີ່ປ່ຽນແທນ ຈາກລາຍຈ່າຍ ໄປຊື້ເຫຼົ້າເບຍ, ຂ້າພະເຈົ້າຕ້ອງໄດ້ຫາເງິນ ເພື່ອປິ່ນປົວສຸຂະພາບຂອງຕົນເອງ. ທີ່ຮ້າຍແຮງໄປກວ່ານັ້ນ, ຈາກທີ່ເຄີຍເຮັດວຽກ ໄດ້ຢ່າງຫ້າວຫັນ ແລະ ສາມາດເຮັດວຽກ ນອກເວລາ ໄດ້ຫຼາຍ ຂ້າພະເຈົ້າ ກໍ່ບໍ່ສາມາດເຮັດໄດ້ຄືແຕ່ກ່ອນ ແລະ ແນ່ນອນ ນັ້ນມັນໄດ້ສົ່ງຜົນກະທົບຕໍ່ ລາຍຮັບຂອງຂ້າພະເຈົ້າກໍ່ຫຼຸດນ້ອຍຖອຍລົງ. ອັນທີ່ໜັກໄປກວ່ານັ້ນ, ຂ້າພະເຈົ້າຖືກໄລອອກວຽກ ເພາະບໍ່ສາມາດເຮັດວຽກໄດ້ຕາມເປົ້າ. ຈົນຕ້ອງໄດ້ດິ້ນຮົນໄປຊອກວຽກບ່ອນໃໝ່.

ຕອນເວລາທີ່ຂ້າພະເຈົ້າມີເງິນ, ຕອນທີ່ໂທຫາໝູ່ ແລະ ພາພວກເຂົາໄປລ້ຽງນັ້ນ ແມ່ນຫຼາຍແທ້ໆ. ແຕ່ທຸກທ່ານຮູ້ບໍ່ ພາຍຫຼັງທີ່ຂ້າພະເຈົ້າສຸຂະພາບບໍ່ດີຂຶ້ນມາ ໝູ່ເພື່ອນຈໍານວນເຫຼົ່ານັ້ນ ແມ່ນຫາຍໄປໝົດ. ແຕ່ສິ່ງທີ່ຄາດບໍ່ເຖິງ ແມ່ນເພື່ອນເກົ່າຂອງຂ້ອຍ ທີ່ຂ້ອຍເຄີຍເຫີນຫ່າງເຂົາ ຍ້ອນລາວບໍ່ໄປຊຸມແຊວນໍາ, ເປັນຄົນທີ່ຍັງຕິດຕໍ່ ແລະ ມາຢ້ຽມຢາມ. ສິ່ງທີ່ຂ້ອຍຕ້ອງນໍ້າຕາໄຫຼ ແລະ ເປັນໜີ້ບຸນຄຸນ ແກ່ເພື່ອນຄົນນັ້ນ ອີກເມື່ອຕອນທີ່ ຂ້ອຍບໍ່ມີເງິນຈັກກີບ ເພາະຕ້ອງຈ່າຍຄ່າປິ່ນປົວ, ລາວໄດ້ຍືນມືເຂົ້າຊ່ວຍ ບໍ່ແມ່ນການໃຫ້ຢືມ ແຕ່ລາວຊ່ວຍລ້າໆ. ດັ່ງນັ້ນ, ຂ້າພະເຈົ້າຈິງຢາກຝາກ ໄວລຸ່ນທຸກຄົນວ່າ: ຢ່າໄປເວົ້າໃຫ້ເພື່ອນທີ່ບໍ່ດຶ່ມເຫຼົ້າເບຍ ວ່າບໍ່ຮັກຕົນເອງ. ພວກເຂົາເປັນຕົວແບບທີ່ດີ ທີ່ຮູ້ຮັກສຸຂະພາບ ແລະ ເພື່ອນແບບນີ້ ເຈົ້າຄວນຮັກສາເຂົາໄວ້ໃຫ້ດີ. ເພື່ອນທີ່ຊວນເຈົ້າໄປເມົາທຸກມື້ນັ້ນ ເຂົາບໍ່ໄດ້ຫວັງດີກັບເຈົ້າດອກ, ເຂົາພຽງຢາກມ່ວນຊື່ໆ.

ຂ້າພະເຈົ້າຕ້ອງໃຊ້ເວລາຫຼາຍປີ ເພື່ອບໍາບັດຕົນເອງ ເພາະຄິດວ່າຍັງມີໂອກາດ ແລະ ຄວາມຫວັງ, ເພາະເມື່ອພິຈາລະນາໄປແລ້ວ ສິ່ງທີ່ລໍ້າຄ່າທີ່ສຸດຂອງຄົນ ແມ່ນການມີສຸຂະພາບທີ່ດີ ແຂງແຮງ, ເມື່ອໃດ ຮ່າງກາຍຖືກທໍາລາຍ ຍ້ອນເຫຼົ້າເບຍແລ້ວ ອັນອື່ນໆ ກໍ່ຈະຈາງຫາຍໄປ. ປົວຕົນເອງຈາກ ອາຍຸ 35 ປີ ຈົນຮອດ 40 ປີ, ສຸຂະພາບຂອງຂ້າພະເຈົ້າກໍ່ເລີ່ມດີຂຶ້ນ. ການໄປຊຸມແຊວກັບໝູ່ເພື່ອນ ຂ້າພະເຈົ້າກໍ່ໄດ້ພໍ່ຈອກສອງຈອກ ແຕ່ບໍ່ມີພຶດຕິກໍາ ດຶ່ມເມົາຈົນຫົວລາກດິນຄືແຕ່ກ່ອນ.


ຂ້າພະເຈົ້າຍັງໂຊກດີ ທີ່ພໍຄິດໄດ້ທັນ ແລະ ກັບມາເບິ່ງແຍງສຸຂະພາບໃຫ້ດີ, ສາມາດກັບມາເຮັດວຽກ ແລະ ມີໂອກາດ ໄດ້ສ້າງຄອບຄົວຕອນອາຍຸ 40 ກັບຜູ່ຍິງທີ່ໃຫ້ໂອກາດຂ້າພະເຈົ້າ. ພວກເຮົາມີລູກສາວ ນໍາກັນ ຄົນໜື່ງ ແລະ ຕອນນີ້ກໍ່ກໍາລັງຈະມີລູກຊາຍ.

ສິ່ງທີ່ ຊາຍໄວ 45 ປີ ຢາກຝາກປະສົບການ ແລະ ບົດຮຽນຊີວິດນີ້ໃຫ້ກັບ ໄວລຸ້ນທຸກຄົນໃຫ້ຮັບຮູ້ວ່າ

1. ສຸຂະພາບຂອງທ່ານ ບໍ່ມີຂາຍໃນຕະຫຼາດ ສະນັ້ນ ທ່ານຕ້ອງຮັກສາໃຫ້ດີ. ແພດທີ່ປິ່ນປົວ ກໍ່ປົວໄປຕາມອາການພະຍາດ ແລະ ເຈົ້າຕ້ອງໄດ້ຈ່າຍເງິນຄ່າປິ່ນປົວ. ດັ່ງນັ້ນ, ເຈົ້າຕ້ອງໃສ່ໃຈສຸຂະພາບ. ຢ່າເຮັດວຽກຫັກໂຫມ ຈົນສຸຂະພາບຊຸດໂຊມ, ເພາະນາຍຈ້າງ ສາມາດຫາຄົນອື່ນມາເຮັດວຽກແທນທ່ານໄດ້ຢູ່ແລ້ວ ເວລາທີ່ທ່ານເຮັດວຽກບໍ່ໄດ້. ດັ່ງນັ້ນ, ຕ້ອງຮັກສາສຸຂະພາບໃຫ້ດີ.

2. ເງິນຄົນອື່ນ ກໍ່ຄືເງິນຄົນອື່ນ, ມັນບໍ່ແມ່ນເລື່ອງງ່າຍ ທີ່ເຂົາຈະເອົາໃຫ້ເຈົ້າ. ເພາະສະນັ້ນ, ການທີ່ຮູ້ຈັກປະຢັດ ແລະ ທ້ອນເງິນໄວ້ ເປັນສິ່ງຈໍາເປັນ ເພາະເຈົ້າຈະມີພະລະຕ່າງໆ. ຍິ່ງເຈົ້າຈະມີການສ້າງຄອບຄົວ ຍິ່ງຈະມີລາຍຈ່າຍຫຼວງຫຼາຍ.

3. ບໍ່ຈໍາເປັນຕ້ອງມີເພື່ອນຫຼາຍ ແຕ່ ຈົ່ງຮູ້ຄັດສັນ ເພື່ອນທີ່ດີ, ບໍ່ພາທ່ານໄປໃນທາງລົບ, ບໍ່ພາໄປຊຸມແຊວ ຫຼາຍເກີນໄປ. ເພາະຄໍາສຸພາສິດບູຮານກ່າວບອກວ່າ: ຕົກໝູ່ແຮ້ງເປັນແຮ້ງ ຕົກໝູ່ກາເປັນກາ ນັ້ນ ແມ່ນຖືກແທ້ໆ 

4. ຢ່ານອກໃຈ ຄົນຮັກຂອງທ່ານ, ໂດຍສະເພາະຜູ່ຊາຍເຮົາ ທີ່ມັກຄິດໄປວ່າ ການໄດ້ນອນນໍາຍິງຫຼາຍຄົນ ນັ້ນມັນເທ້ ຫຼື ເປັນການໄດ້ກໍາໄລ. ເພາະຫາກທ່ານຫາກ ບໍ່ຊື່ສັດໃນຄອບຄົວແລ້ວ ເລື່ອງອື່ນໆ ທ່ານກໍ່ຈະຖືກເບິ່ງໃນທາງບໍ່ດີ. ຍິງເຈົ້າເປັນຄົນເຮັດທຸລະກິດ ກໍ່ຈະເຮັດໃຫ້ຄົນອື່ນໆ ບໍ່ຢາກຄົບ, ລູກຄ້າກໍ່ບໍ່ຢາກສະໜັບສະໜູນ.


ສຸດທ້າຍ ຂໍໃຫ້ໄວລຸ້ນທຸກຄົນ ຈົ່ງຮູ້ຈັກ ປະຢັດ ອົດອອມ ມີເປົ້າໝາຍ ໃນຊີວິດ,​ ຮັກສຸຂະພາບຕົນເອງ ອອກກໍາລັງກາຍ. ເພາະເຊື່ອວ່າບໍ່ດົນ ທ່ານຈະອາຍຸ 45 ຄືຂ້າພະເຈົ້າ ແລ້ວທ່ານຈະເຂົ້າໃຈວ່າມັນເປັນແນວໃດ....


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Powered by Blogger.