Header Ads

ປກສ ໄຊທານີ ຈັບຜູ່ຕ້ອງຫາ 4 ຄົນມີທັງຢາເສບຕິດ ແລະ ປືນ



ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງໄຊທານີ ໃຫ້ຮູ້ວ່າ:ຜ່ານການຕິດຕາມກຸ່ມເປົ້າໝາຍເຄື່ອນໄຫວຄ້າຂາຍຢາເສບຕິດຢູ່ເຂດບ້ານໄຊສະຫວ່າງ ເມືອງໄຊທານີ ນວ ຈື່ງໄດ້ແຕ່ງຕັ້ງເຈົ້າໜ້າທີ່ລົງຕິດຕາມກວດກາສະຖານທີ່ຕົວຈິງ ແລະ ກໍ່ສາມາດກັກຕົວ ທ້າວປະສິດ ອາຍຸ 42 ປີຢູ່ບ້ານຂົວຫຼວງ ເມືອງຈັນທະບູລີ ນະຄອນຫຼວງວຽງຈັນ ພ້ອມຂອງກາງຢາບ້າ 5000 ກວ່າເມັດ, ຢາໄອ້ 100 ກຣາມໄດ້ໃນຂະນະລໍຖ້າສົ່ງຢາ. ເມື່ອຂະຫຍາຍຜົນກໍສາມາດກັກຕົວພັກພວກໄດ້ອີກ 3 ຄົນໃນເວລາຕໍ່ມາພ້ອມຢາບ້າ 12.204 ເມັດ, ຢາໄອ້ 100 ກຣາມ ແລະ ປືນສັ້ນ 1 ກະບອກພ້ອມລູກ 15 ລູກ.



ຜ່ານການສືບສວນ-ສອບສວນທ້າວປະສິດໄດ້ໃຫ້ການຕໍ່ເຈົ້າໜ່າທີ່ວ່າ: ໃນໄລຍະຜ່ານມາຕົນເອງແມ່ນໄດ້ເລີ່ມຊື້-ຂາຍຢາເສບຕິດມາແຕ່ເດືອນພະຈິກ 2018 ຢາທີ່ນຳມາຂາຍນັ້ນແມ່ນຊື້ມາທ້າວມຸກສະຫວັນ ຢູ່ບ້ານດົງນາໂຊກ ເມືອງສີໂຄດຕະບອງ; ຊື້-ຂາຍນຳກັນມາແລ້ວຫຼາຍຄັ້ງ; ມາຄັ້ງວັນທີ 26 ກຸມພາ 2019 ຕົນເອງຈື່ງໄດ້ເອົາຢາຈຳນວນ 5.000 ກວ່າເມັດ, ຢາໄອ້ 100 ກຣາມໄປສົ່ງໃຫ້ຜູ້ສັ່ງຊື້ຢູ່ຈຸດນັດພົບເຂດບ້ານໄຊສະຫວ່າງ ເມືອງໄຊທານີ ຈື່ງຖືກເຈົ້າໜ້າທີ່ ປກສ ເມືອງໄຊທານີ ກັັກຕົວພ້ອມຢາຈຳນວນດັ່ງກ່າວ ແລະ ປືນສ່ວນການຄ້າຂາຍຜ່ານມາຍັງໄດ້ຮ່ວມກັບ ທ້າວ ວັນນະສອນ ອາຍຸ 40 ປີ ຢູ່ບ້ານໂພນແກ້ວ ເມືອງທຸລະຄົມ ແຂວງວຽງຈັນ ທ້າວ ມຸກສະຫວັນ ອາຍຸ 30 ປີ ຢູ່ບ້ານດົງນາໂຊກ ເມືອງສີໂຄດຕະບອງ ແລະ ທ້າວ ຕິ່ງຄຳ ອາຍຸ 23 ປີ ຢູ່ບ້ານສີໄຄທ່າ ເມືອງສີໂຄດຕະບອງ ນະຄອນຫຼວງວຽງຈັນ.






ເມື່ອຮູ້ຄືແນວນັ້ນເຈົ້າໜ້າທີ່ກໍນຳກຳລັງເຂົ້າກັບຕົວທ້າວ ວັນນະສອນໄດ້ຢູ່ເຂດບ້ານນາ ເມືອງໄຊທານີ ວັນທີ 27 ກຸມພາ 2019 ໃນຂະນະທີ່ຜູ້ກ່ຽວກຳລັງເອົາຢາບ້າມາຈຳໜ່າຍໃຫ້ກຸ່ມໄວໜຸ່ມພ້ອມຂອງກາງຢາ 204 ເມັດ. ຕໍ່ມາວັນທີ 28 ກຸມພາ 2019 ກໍຈັບຕົວທ້າວ ມຸກສະຫວັນ ໄດ້ຢູ່ໜ້າຮ້ານອາຫານແຫ່ງໜື່ງເຂດບ້ານທ່າງ່ອນ ເມືອງໄຊທານີ ພ້ອມຂອງກາງຢາບ້າ 12.000 ເມັດ ແລະ ປືນສັ້ນ 1 ກະບອກລູກປືນ 2 ລູກ ແລະ ໃນວັນທີ 1 ມີນາ 2019 ເຂົ້າກັກຕົວທ້າວ ຕິ່ງຄຳ ຢູ່ສັງວຽນຕີໄກ່ຫຼັກ 10 ເມືອງຫາດຊາຍຟອງ ພ້ອມຂອງກາງຢາໄອ້ 100 ກຣາມ ແລະ ປືນສັ້ນ 1 ກະບອກພ້ອມລູກປືນ 15 ລູກ.




ຫຼັງຈາກທັງ 3 ຄົນຖືກກັກພ້ອມຂອງກາງຢາເສບຕິດ ແລະ ອາວຸດ(ປືນສັ້ນ) ກໍໃຫ້ການຮັບສາລະພາບວ່າ: ໄດ້ຮ່ວມກັນຄ້າຂາຍຢາບ້າແທ້; ສຳລັບປືນສັ້ນທັງ 2 ກະບອກ ແລະ ລູກປືນ 17 ລູກນັ້ນເປັນຂອງພວກຕົນແທ້ ແລະ ໄດ້ຊື້ຈາກຊາຍຄົນໜື່ງຢູ່ ເມືອງບົວລະພາ ແຂວງຄຳມ່ວນ, ສ່ວນອີກ 1 ກະບອກແມ່ນ ເກັບໄດ້ຈາກສະຖານທີ່ບັນເທີງແຫ່ງໜື່ງ ພາຍໃນເມືອງສີໂຄດຕະບອງ; ເຊີ່ງພວກກ່ຽວອ້າງວ່າມີໄວ້ເພື່ອປ້ອງກັນຕົວ.





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Powered by Blogger.