Header Ads

ປກສ ເມືອງສີໂຄດຕະບອງ ຈັບພວກຄ້າຂາຍຢາເສບຕິດ ໄດ້ 4 ຄົນ ທີ່ເຂດບ້ານໜອງແຕ່ງ ພ້ອມຢາບ້າ



ເຈົ້າໜ້າທີ່ໜ່ວຍງານສະກັດກັ້ນ-ຕ້ານຢາເສບຕິດ ກອງບັນຊາການ ປກສ ເມືອງສີໂຄດຕະບອງ ນວ ໄດ້ສົມທົບກັບອຳນາດການປົກຄອງບ້ານ ລົງແກ້ໄຂຈຸດມົ້ວສຸມ ແລະ ຄ້າຂາຍຢາເສບຕິດພາຍໃນບ້ານໜອງແຕ່ງ
ເໜືອ ສາມາດກັກຕົວຜູ້ຖືກໄດ້ 1 ຄົນຄື ນ. ວາເລນທາຍ ຫຼື ຫຼ້ານ້ອຍ ອາຍຸ 21 ປີ, ຢູ່ບ້ານໜອງແຕ່ງເໜືອ ເມືອງສີໂຄດຕະບອງ ນວ ໃນວັນທີ 8 ມີນາ 2019, ໃນຂະນະທີ່ຜູ່ກ່ຽວຂາຍຢາບ້າໃຫ້ໄວລຸ້ນ.



ນ. ວາເລນທາຍ ຫຼື ຫຼ້ານ້ອຍ ໄດ້ຍອມຮັບສາລະພາບຕໍ່ເຈົ້າໜ້າທີ່ວ່າ: ຢາບ້າທີ່ນຳມາຂາຍນັ້ນ ແມ່ນໄດ້ເອົາມາຈາກເຮືອນຂອງຕົນ; ເຊິ່ງໃນວັນທີ 8 ມີນາ 2019 ຕົນເອງຢາກໄດ້ເງິນໄປໃຊ້ຈ່າຍ, ຈິ່ງເກີດມີແນວຄິດຊອກລັກເອົາເງິນຢູ່ໃນເຮືອນ ແລ້ວພົບເຫັນຖົງທີ່ຫໍມັດຢ່າງຄັກແນ່. ຕົນຈິ່ງໄດ້ແກະເບິ່ງປະກົດວ່າເປັນຢາບ້າ ຈິ່ງໄດ້ລັກເອົາຢາບ້າຈຳນວນໜື່ງ ມາຂາຍຈິ່ງຖືກຈັບ, ໃນຂະນະທີ່ຂາຍຢາບ້າໃຫ້ໄວລຸ້ນ. ຫຼັງຈາກນັ້ນເຈົ້າໜ້າທີ່ກໍໄດ້ເຂົ້າກວດຄົ້ນເຮືອນພົບຢາບ້າຈໍານວນ 15 ມັດ, 9 ຖົງນ້ອຍ 74 ເມັດ ທີ່ຊຸກເຊື່ອງໄວ້ໃນເຮືອນ ຈິ່ງໄດ້ກັກຕົວຜູ່ເປັນເອື້ອຍມາສອບສວນ.

ຜ່ານການສອບສວນ ນ. ເກດສະໜາ ຫຼື ຕຸ່ນ ອາຍຸ 33 ປີ ( ເອື້ອຍ ນ. ຫຼ້ານ້ອຍ ) ໄດ້ຍອມຮັບສາລະພາບວ່າ: ຢາບ້າຈຳນວນທີ່ພົບໃນເຮືອນນັ້ນ ແມ່ນທ້າວ ສົມສະໜຸກ ຫຼື ຈ່ອຍ ແລະ ນ. ຈໍາປີ ຫຼື ແຕ໋ກໄດ້ເອົາມາຝາກໄວ້ກັບຕົນໃນຕົ້ນເດືອນມີນານີ້ ໂດຍບອກວ່າເປັນເຄື່ອງທີ່ສຳຄັນ ໃຫ້ຕົນເອົາໄປເຊື່ອງໄວ້ໃນເຮືອນບໍ່ໃຫ້ໃຜເຫັນ ແລ້ວປະມານ 2-3 ມື້ຈະມາເອົາ; ເຊິ່ງຕົນກໍ່ບໍ່ໄດ້ເປີດເບິ່ງ ແລະ ບໍ່ໄດ້ສົ່ງໃສຫຍັງ. ເພາະຕົນກັບພວກກ່ຽວແມ່ນຮູ້ຈັກຮັກແພງກັນມາດົນແລ້ວ.





ທ. ສົມສະໜຸກ ຫຼື ຈ່ອຍ ອາຍຸ 41 ປີ ແລະ ນ. ຈຳປີ ຫຼື ແຕ໋ກ ອາຍຸ 32 ປີ ໄດ້ຮັບສາລະພາບຕໍ່ເຈົ້າໜ້າທີ່ວ່າ: ຢາບ້າຈຳນວນດັ່ງກ່າວແມ່ນຂອງພວກກ່ຽວແທ້; ເຊິ່ງໄດ້ຮັບມາຈາກຊາຍຄົນໜື່ງ ເອົາມາສົ່ງໃຫ້ພວກກ່ຽວ ແລະ ໃນຕົ້ນເດືອນມີນາ 2019 ຊາຍຄົນດັ່ງກ່າວ ໄດ້ເອົາຢາມາສົ່ງໃຫ້ອີກ; ເຊິ່ງໄດ້ຮູ້ຈັກກັນໃນໄລຍະທີ່ຕົນຖືກດັດສ້າງ ເວລາ 5 ປີ 6 ເດືອນ ( ໃນຄະດີຄ້າຂາຍຢາເສບຕິດ ) ເພື່ອພົ້ນໂທດອອກມາ ຈິ່ງໄດ້ຕິດຕໍ່ພົວພັນຄ້າຂາຍຢາບ້ານໍາກັນ. ຫຼັງຈາກໄດ້ຢາບ້າມາແລ້ວ, ຈິ່ງໄດ້ນຳຢາຈຳນວນດັ່ງກ່າວມາຝາກໄວ້ກັບ ນ. ເກດສະໜາ. ຈາກນັ້ນຕົນກັບ ນ. ຈຳປີ ຈິ່ງໄດ້ໄປເຊົາບ້ານພັກ ຢູ່ແຖວບ້ານທົ່ງປົ່ງ ເມືອງສີໂຄດຕະບອງ ເພື່ອລໍຖ້າສົ່ງຢາໃຫ້ກັບລູກຄ້າ. ມາຮອດວັນທີ 8 ມີນາ 2019 ຈິ່ງຖືກກັກຕົວພ້ອມ ນ. ຈຳປີ ໃນບ້ານພັກ.


ປັດຈຸບັນຄະດີດັ່ງກ່າວ, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສີໂຄດຕະບອງ ນະຄອນຫຼວງວຽງຈັນ ພວມເລັ່ງສືບສວນ-ສອບສວນ ຂະຫຍາຍຜົນຫາພັກພວກຮ່ວມຂະບວນການ ເພື່ອນຳຕົວຜູ້ກະທຳຜິດມາລົງໂທດຕາມລະບຽບກົດໝາຍ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

No comments

Powered by Blogger.