ບ້ານປາກແຄມ ເມືອງແກ່ນທ້າວ ດໍາເນີນກອງປະຊຸມໃຫຍ່ເພື່ອສະຫຼຸບວຽກງານຮອບດ້ານໃນໄລຍະ 5 ປີ

ກອງປະຊຸມໃຫຍ່ບ້ານປາກແຄມ ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້້ນໃນວັນທີ 6 ມີນາ 2019 ນີ້, ຢູ່ທີ່ຫໍປະຊຸມບ້ານດັ່ງກ່າວ. ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີ ຮອງເຈົ້າເມືອງໆແກ່ນທ້າວ, ທ່ານ ບ່ຽງ ຈວງເທວີ ຫົວໜ້າກອງບັນຊາການ ປກສ ເມືອງ, ມີນາຍບ້ານ, ອົງການປົກຄອງບ້ານ, ຂະແໜງການຂອງບ້ານ ແລະ ປະຊາຊົນພາຍໃນບ້ານທີ່ມີອາຍຸແຕ່ 18 ຂຶ້ນໄປເຂົ້າຮ່ວມ 450 ກວ່າຄົນ.
ໃນກອງປະຊຸມທ່ານ ສະໜິດ ແສງໂສດາ ນາຍບ້ານໆປາກແຄມ ໄດ້ຜ່ານບົດສະຫຼຸບການຈັດຕັ້ງວຽກງານຮອບດ້ານ ປີ 2014-2018 ແລະ ແຜນພັດທະນາບ້ານປີ 2019-2023



ເຊິ່ງບ້ານປາກແຄມຕັ້ງຢູ່ກຸ່ມບ້ານພັດທະນາປາກແຄມ ຫ່າງຈາກເທດສະບານເມືອງປະມານ 32 ກິໂລແມັດ, ມີເນື້ຶອທີ່ທັງໝົດ 1.590 ກວ່າເຮັກຕາ. ອົງການປົກຄອງບ້ານກວມເອົາ 5 ໜ່ວຍງານ, 17 ຈຸງານ, ຈັດຕັ້ງເປັນ 24 ໜ່ວຍຄອບຄົວ, ມີ 300 ກວ່າຄອບຄົວ, ມີພົນລະເມືອງ 1.600 ກວ່າຄົນ, ຍິງ 800 ກວ່າຄົນ. ທົ່ວບ້ານມີເນື້ອທີ່ຜະລິດເຂົ້າທັງໝົດ 240 ກວ່າເຮັກຕາ ຜະລິດເຂົ້າໄດ້ 1.000 ກວ່າໂຕນ. ໃນນີ້, ເນື້ອທີ່ນາປີ 230 ກວ່າເຮັກຕາ ຜົນຜະລິດໄດ້ 1.000 ກວ່າໂຕນ, ເນື້ອທີ່ປູກເຂົ້າໄຮ່ 9 ເຮັກຕາກວ່າ ຜະລິດເຂົ້າໄດ້ 30 ກວ່າໂຕນ, ສະເລ່ຍໃສ່ຫົວຄົນໜຶ່ງໄດ້ 640 ກວ່າກິໂລ/ຄົນ/ປີ. ນອກຈາກການເຮັດນາປູກເຂົ້າແລ້ວປະຊາຊົນຍັງປູກພືດອຸດສາຫະກໍາ ເພື່ອສ້າງລາຍຮັບໃຫ້ຄອບຄົວ ມີເນື້ອທີ່ທັງໝົດ 860 ກວ່າເຮັກຕາ ຜົນຜະລິດໄດ້ 24.700 ກວ່າໂຕນ.


ພົ້ນເດັ່ນກວ່າໝູ່ແມ່ນ ມັນຕົ້ນ ເນື້ອທີ່ 800 ກວ່າເຮັກຕາ ຜົນຜະລິດໄດ້ 24.500 ກວ່າໂຕນ, ສາລີ 24 ເຮັກຕາກວ່າ ຜົນຜະລິດໄດ້ 130 ກວ່າໂຕນ, ຖົ່ວແດງ ເນື້ອທີ່ 10 ກວ່າເຮັກຕາ ຜົນຜະລິດໄດ້ 45 ໂຕນ, ປູກໄມ້ສັກ 8 ເຮັກຕາກ່ວາ ແລະ ໄມ້ກິນໝາກອື່ນໆອີກ. ຄຽງຄູ່ກັນນັ້ນ, ປະຊາຊົນພາຍໃນບ້ານຍັງປູກຫຍ້າພັນ 140 ຕອນ ເນື້ອທີ່ 190 ກວ່າເຮັກຕາ, ມີສວນຫຍ້າທໍາມະຊາດ 26 ຕອນ ເນື້ອທີ່ 30 ກວ່າເຮັກຕາ, ມີສັດລ້ຽງປະເພດງົວ 400 ກວ່າໂຕ, ຄວາຍ 340 ກວ່າໂຕ, ໝູ 150 ກວ່າໂຕ, ສັດປີກ 10.000 ກວ່າໂຕ, ມີໜອງປາ 30 ກວ່າໜອງ ປ່ອຍປາແລ້ວ 65.000 ກວ່າໂຕ. ສາມາດສ້າງລາຍຮັບໄດ້ທັງໝົດ 43 ຕື້ກວ່າກີບ ທຽບໃສ່ປີ 2013 ເພີ່ມຂຶ້້ນ 15 ຕື້ກວ່າກີບ ເທົ່າກັບ 40 ສ່ວນຮ້ອຍ, ສະເລ່ຍໃສຫົວຄົນໜຶ່ງໄດ້ (GDP) 26 ລ້ານກວ່າກີບ ຫຼື ເທົ່າກັບ 3.000 ກວ່າໂດລາ/ຄົນ/ປີ.





ຮອດປີ 2023 ເຮັດໃຫ້ຄອບຄົວມີລາຍຮັບສະເລ່ຍໃສ່ຫົວຄົນໜຶ່ງໃຫ້ໄດ້ 28 ລ້ານກີບ/ຄົນ/ປີ ຫຼື ເທົ່າກັບ 3.300 ກວ່າໂດລາ/ຄົນ/ປີ.


ໃນກອງປະຊຸມຄັ້ງນີ້, ປະຊາຊົນພາຍໃນບ້ານທີ່ມີອາຍຸແຕ່ 18 ຂຶ້ນໄປ ໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບ້ານຊຸດໃໝ່ ເຊິ່ງມີຜູ້ສະໝັກທັງໝົດ 7 ທ່ານ, ຍິງ 1 ທ່ານ. ເລືອກເອົາ 5 ທ່ານ ຄື: ທ່ານ ສະໜິດ ແສງໂສດາ ເປັນນາຍບ້ານ, ທ່ານ ບຸນແກມ ມາໄລວັນ, ທ່ານ ນາງ ຄໍາຝ່ຽນ ໄຊຍະລາດ, ທ່ານ ບຸນທະນາ ສີສຸວັນ ແລະ ທ່ານ ຄໍາຫຼ້າ ສິງຄໍາ ເປັນຮອງນາຍບ້ານ.




ໃນຕອນທ້າຍກອງປະຊຸມ ທ່ານ ອໍາຄາ ລັດສະໝີ ຮອງເຈົ້າເມືອງໆແກ່ນທ້າວ ໄດ້ໃຫ້ກຽດໂອ້ລົມຕໍ່ກອງປະຊຸມເຊິ່ງທ່ານໄດ້ເນັ້ນໜັກໃຫ້ຄະນະບ້ານ, ອົງການປົກຄອງບ້ານເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ອົງການຈັດຕັ້ງບ້ານ ແລະ ພໍ່ແມ່ປະຊາຊົນໃຫ້ມີຄວາມເຂົ້າໃຈຢ່າງໜັກແໜ້ນ, ນໍາເອົາແຜນພັດທະນາເສດຖະກິດ-ສັງຄົມຂອງບ້ານໄປຈັດຕັ້ງປະຕິບັດໃຫ້ປະກົດຜົນເປັນຈິງ, ປຸກລະດົມພໍ່ແມ່ປະຊາຊົນເຮັດການຜະລິດໃຫ້ຫຼາຍກວ່າເກົ່າ, ຈັດຕັ້ງເປັນກຸ່ມປູກ, ກຸ່ມລ້ຽງ ໃຫ້ປະກົດຜົນເປັນຈິງ ແລະ ປຸກລະດົມພໍ່ແມ່ປະຊາຊົນປະກອບສ່ວນເຂົ້າໃນວຽກງານລວມຂອງບ້ານ ໃຫ້ເປັນຂະບວນຟົດຟື້ນ, ກະຕຸກຊຸກຍູ້ແຕ່ລະໜ່ວຍງານ, ຈຸງານ ໃຫ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ ແລະ ເອົາໃຈໃສ່ປຸກລະດົມ ພໍ່ແມ່ປະຊາຊົນພາຍໃນບ້ານ ໃຫ້ເຂົ້າຮ່ວມໃນວຽກງານ ປກສ-ກອງຫຼອນ ໃຫ້ມີການເຄື່ອນໄຫວ ແລະ ເປັນເຈົ້າການປະຕິບັດລະບຽບບ້ານໃຫ້ເຂັ້ມງວດ.



Post a Comment

0 Comments