Header Ads

ຍທຂ ແຂວງເຊກອງ ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X

ໂດຍ:ນາລີວັນ
ພະແນກໂຍທາທິການ ແລະຂົນສົ່ງ (ຍທຂ) ແຂວງເຊກອງ ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ໃນວັນທີ 21 ມີນາ 2019 ນີ້ ທີ່ຫ້ອງປະຊຸມພະແນກດັ່ງກ່າວ ໂດຍການເປັນປະທານ ແລະບັນຍາຍຂອງທ່ານ ສຸດສະນະ ສີຫາວົງ ກໍາມະການພັກແຂວງ ຫົວໜ້າພະແນກ ຍທຂ ແຂວງ ເຊກອງ, ມີບັນດາຄະນະພັກ-ຄະນະນໍາພະແນກ, ສະມາຊິກພັກ-ພະນັກງານ ທົ່ວພະແນກ ຍທຂ ແລະລັດວິສາຫະກິດນໍ້າປະປາ ແຂວງເຊກອງເຂົ້າຮ່ວມເຊື່ອມຊຶມ.

ກອງປະຊຸມໄດ້ນໍາເອົາ 2 ເອກະສານສຳຄັນມາຈັດຕັ້ງເຊື່ອມຊຶມຄື: ມະຕິກ່ຽວກັບການເພີ່ມທະວີການນຳພາແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະສ້າງຄວາມເຂັ້ມແຂງຂອງການຄຸ້ມຄອງມະຫາພາກ ແລະມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງແລະໜັກແໜ້ນ ເຊິ່ງທ່ານ ສຸດສະນະ ສີຫາວົງ ກໍາມະການພັກແຂວງ ຫົວໜ້າພະແນກ ຍທຂ ແຂວງ ເຊກອງ ໄດ້ຍົກໃຫ້ເຫັນບັນຫາ ແລະບັນດາສາເຫດຕົ້ນຕໍ ຂອງສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ປະເທດເຮົາພວມປະເຊີນຢູ່ໃນປັດຈຸບັນ ໂດຍສະເພາະການຈັດເກັບລາຍຮັບເຂົ້າງົບປະມານແຫ່ງລັດ ບໍ່ບັນລຸຕາມລະດັບຄາດໝາຍ, ບັນຫາໜີ້ສິນຄຸມເຄືອ, ການຂາດດຸນງົບປະມານ, ການລະເມີດລະບຽບວິໄນ ແຜນການ-ການເງິນ ແລະອື່ນໆ ລວມທັງທິດທາງ ແລະມາດຕະການຈຸດສຸມໃນການແກ້ໄຂສະເພາະໃນຕໍ່ໜ້າ.




ທັງນີ້ກໍເພື່ອແນໃສ່ໃຫ້ສະມາຊິກພັກ-ພະນັກງານລັດຖະກອນທົ່ວພະແນກ ຍທຂ ແລະລັດວິສາຫະກິດນໍ້າປະປາ ແຂວງ ເຊກອງ ໄດ້ຮັບຮູ້ເຂົ້າໃຈແຈ້ງຕໍ່ກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງິນຂອງປະເທດເຮົາໃນໄລຍະຜ່ານມາ ແລະຜົນສະທ້ອນໃນສະເພາະໜ້າ ແລະຍາວນານ, ກໍາແໜ້ນ ແລະຊື່ອມຊຶມຢ່າງເປັນເອກະພາບໃນລະດັບສູງກັບທັດສະນະຫຼັກໝັ້ນການເມືອງຂອງພັກ, ທິດທາງ, ວິທີການ ແລະມາດຕະການທີ່ສູນກາງວາງອອກ; ສ້າງຄວາມຕັດສິນໃຈເດັດດ່ຽວ ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນຕໍ່ໜ້າ; ພ້ອມທັງຄົ້ນຄວ້າກຳນົດບັນດາມາດຕະການໃຫ້ແທດກັບຕົວຈິງ ແລະມີປະສິດທິຜົນສູງ ເພື່ອແກ້ໄຂສະພາບການດັ່ງກ່າວ, ສ້າງຂະບວນການຈັດຕັ້ງປະຕິບັດຢ່າງແຂງແຮງທົ່ວເຖິງ ກໍ່ໃຫ້ເກີດການຫັນປ່ຽນຕົວຈິງ ທີ່ມີລັກສະນະບຸກທະລຸໃນທຸກຂົງເຂດວຽກງານ ເພື່ອຍູ້ແຮງດ້ານການພັດທະນາໃນດ້ານຕ່າງໆ ໃຫ້ບັນລຸຄາດໝາຍທີ່ກອງປະຊຸມໃຫຍ່ ຄັ້ງທີ X ຂອງພັກວາງອອກ.




ພ້ອມນີ້, ກອງປະຊຸມຍັງໄດ້ເຊື່ອມຊຶມມະຕິກອງປະຊຸມເປີດກວ້າງຄົບຄະນະບໍລິຫານງານພັກແຂວງ ເຊກອງ ຄັ້ງທີ 8 ສະໄໝທີ IX ຕື່ມອີກ ເພື່ອສຶກສາອົບຮົມການເມືອງແນວຄິດ ໃຫ້ແກ່ພະນັກງານ, ສະມາຊິກພັກ ທົ່ວພະແນກ ຍທຂ ແລະລັດວິສາຫະກິດນໍ້າປະປາ ແຂວງ ເຊກອງ, ກໍາແໜ້ນທັດສະນະຂອງພັກ ແລະບັນດາເນື້ອໃນສໍາຄັນຂອງມະຕິກອງປະຊຸມ ພ້ອມກັນເອກະພາບຫັນເອົາມະຕິດັ່ງກ່າວໃຫ້ກາຍເປັນແຜນການ, ໂຄງການອັນລະອຽດ ເພື່ອໄປຈັດຕັ້ງປະຕິບັດໃຫ້ມີຜົນສໍາເລັດໃນຂົງເຂດວຽກງານທີ່ຕົນຮັບຜິດຊອບ.

No comments

Powered by Blogger.