ຊາວພຸດທະສາສະນິກະຊົນບ້ານປາກແຄມ ເມືອງແກ່ນທ້າວ ຮ່ວມບຸນຍົກຍອດຊໍ່ຟ້າ

ໃນມື້ຂື້ນ 6 ຄໍ່າ,ເດືອນ 4 ພສ 2561 ເຊິ່ງກົງກັບວັນທີ 11 ມີນາ ປີ 2019 ນີ້,ຢູ່ວັດໂພທິໄຊວະນາຣາມ ບ້ານປາກແຄມ,ເມືອງແກ່ນທ້າວ ແຂວງໄຊຍະບູລີ. ໄດ້ຈັດພິທີຍົກຍອດຊໍ່ຟ້າສິມວັດດັ່ງກ່າວ ໂດຍມີພຸດທະສາສະນິກະຊົນ ຜູ້ມີຈິດໃຈໃສສັດທາ ເຂົ້າຮ່ວມຢ່າງຫຼວງຫຼາຍ.




ສິມວັດໂພທິໄຊວະນາຣາມ ບ້ານປາກແຄມສ້າງຂື້ນດົນນານສົມຄວນ ໄດ້ 92 ປີແລ້ວ ເຊິ່ງມາຮອດໄລຍະໜຶ່ງ ໂຄງສ້າງດ້ານເທິງສິມ ຊຸດໂຊມຫຼາຍ,ມີບາງສ່ວນຫັກພັງຍ້ອນການເວລາ. ດ້ວຍເຫດນີ້ ທາງວັດ ແລະ ບ້ານຈຶ່ງໄດ້ປຶກສາຫາລືກັນເພື່ອປະຕິສັງຂອນຄືນໃໝ່,ມາຮອດປີ 2015 – 2016 ທາງບ້ານໄດ້ຊອກຫາແຫຼ່ງທຶນ ດ້ວຍການສ້າງກອງກະຖິນຂື້ນ 1 ກອງເພື່ອສົມທົບທຶນໃນການກໍ່ສ້າງ ແລະ ເລີ່ມຈັດຕັ້ງປະຕິບັດ ຈົນຮອດ ທ້າຍປີ 2018 ຈຶ່ງສຳເລັດ.ລວມມູນຄ່າທັງໝົດ 540,000,000 ກີບ.




ຍອດຊໍ່ຟ້າຄືຍອດທີ່ຊີ້ຂື້ນເທິງທ້ອງຟ້າ ເປັນເຄື່ອງໝາຍ ເພື່ອບູຊາພະລັດຕະນະໄຕ ແລະ ເທວະດາຟ້າແຖນ ທັງປວງ.ພິທີຍົກຍອດຊໍ່ຟ້າຖືເປັນພິທີສຳຄັນ ເປັນການຍົກຍອດຫຼືສ່ວນທີ່ສູງສຸດຂອງສິມ ມີຄວາມເຊື່ອກັນວ່າ: ຖ້າຫາກໃຜໄດ້ຮ່ວມບຸນຍົກຍອດຊໍ່ຟ້າແລ້ວ ນັບວ່າເປັນບຸນກຸສົນອັນຍິ່ງໃຫຍ່,ຈະເຮັດໃຫ້ຊີວິດ ແລະ ໜ້າທີ່ວຽກງານສູງສົ່ງ,ມີບຸນບາລະມີ,ມີຈິດໃຈດີງາມ ເປັນບຸນເປັນກຸສົນຢ່າງຍິ່ງ ເພາະເປັນໂອກາດທີ່ຫາຍາກສຸດ ເພາະການສ້າງສິມວັດແຫ່ງໜຶ່ງສຳເລັດ ຈະມີພິທີຍົກຍອດຊໍ່ຟ້າພຽງຄັ້ງດຽວເທົ່ານັ້ນ.





Post a Comment

0 Comments