ສປ ຈີນຢືນຢັນຈະເປີດປະຕູສູ່ໂລກພາຍນອກກວ້າງອອກຢ່າງຮອບດ້ານ

ຂປລ. ສປ ຈີນ ຢືນຢັນຈະສືບຕໍ່ສົ່ງເສີມການຮ່ວມມືໃນເວທີພາກພື້ນແລະ ເປີດປະຕູສູ່ພາຍນອກໃຫ້ກວ້າງອອກຢ່າງຮອບດ້ານດ້ວຍບາດກ້າວຫນັກແຫນ້ນ ຂະນະທີ່ຂອບການຮ່ວມມືຂໍ້ລິເລີ່ມຫນຶ່ງແລວຫນຶ່ງເສັ້ນທາງແມ່ນໃນກຸນແຈສໍາຄັນບໍ່ພຽງແຕ່ປະເທດຈີນຝ່າຍດຽວ ແຕ່ຫາກຍັງເປັນຄວາມພະຍາຍາມໃນການພັດທະນາ ແລະ ຂັບເຄື່ອນເສດຖະກິດໃຫ້ກ້າວຕໍ່ໄປໃນຈັງຫວະທີ່ກ້າວຫນ້າພາຍໃຕ້ຕ່າງຝ່າຍຕ່າງມີຜົນປະໂຫຍດຮ່ວມກັນ.

ກອງປະຊຸມສະພາປະຊາຊົນແຫ່ງຊາດຈີນຄັ້ງທີ 2 ສະໄໝທີ 13 ໄດ້ຈັດຂຶ້ນໃນວັນທີ 5 ມີນາ 2019 ນີ້ທີ່ຫໍສະພາປະຊາຊົນແຫ່ງຊາດທີ່ນະຄອນຫລວງປັກກິ່ງ ສປ ຈີນ ໂດຍໃຫ້ກຽດເປັນປະທານຂອງ ສະຫາຍ ສີ ຈິ້ນ ຜີງ ເລຂາທິການໃຫຍ່ ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນ, ມີ ສະຫາຍ ຫລີ ເຄີ້ ສຽງ ນາຍົກລັດຖະມົນຕີແຫ່ງ ສປ ຈີນ ພ້ອມບັນດາຫາຍສະມາຊິກພັກ, ເຈົ້າຫນ້າທີ່ລະດັບສູງ, ຜູ້ອາວຸໂສ, ຜູ້ຊ່ຽວຊານ ແລະ ສື່ມວນຊົນພາຍໃນ-ຕ່າງປະເທດເຂົ້າຮ່ວມຢ່າງພ້ອມພຽງ.

ສະຫາຍ ລີ ເຄິ້ ສຽງຂຶ້ນຜ່ານລາຍງານລະບຸວ່າ: ເພື່ອຮັກສາຈັງຫວະການເຫນັງຕີງເສດຖະກິດຈີນໃຫ້ຢູ່ໃນຂອບເຂດທີ່ສົມເຫດສົມຜົນນັ້ນຈີນຈະສືບຕໍ່ປະຕິບັດນະໂຍບາຍການເງິນເຄັ່ງຄັດ ແລະ ນະໂຍບາຍເງິນຕາໃຫ້ມີຄວາມໝັ້ນທ່ຽງ ໃນນັ້ນ,ອັດຕາອັດຕາຂາດດຸນງົບປະມານໃນປີ 2019 ນີ້ຈະໃຫ້ຢູ່ໃນລະດັບ 2,8% ເຊິ່ງສູງກວ່າງົບປະມານປີ 2018 ຜ່ານມາ 0,2%; ຂະໜາດການລະດົມທຶນທາງສັງຄົມ ຕ້ອງສົມຄູ່ກັບຈັງຫວະການເຕີບໂຕຂອງຈີດີພີ ແລະ ຈະສືບຕໍ່ປັບປຸງກົນໄກອັດຕາແລກປ່ຽນເງິນຕາໃຫ້ສົມບູນຂຶ້ນ, ຮັກສາອັດຕາແລກປ່ຽນເງິນຢວນຈີນໃຫ້ຢູ່ໃນລະດັບທີ່ດຸນດ່ຽງ, ສົມເຫດສົມຜົນ ແລະ ມີຄວາມໝັ້ນທ່ຽງໂດຍພື້ນຖານ.


ລັດຖະບານຈີນຈະຫລຸດສ່ວຍສາອາກອນໃຫ້ຫລາຍກວ່າເກົ່າໂດຍສຸມໃສການຫລຸດອາກອນໃນຂະແໜງຂອງອຸດສາຫະກຳການຜະລິດ ແລະ ວິສາຫະກິດຂະໜາດນ້ອຍ, ລົງເລິກການປະຕິຮູບອາກອນມູນຄ່າເພີ່ມ ເຊິ່ງຈະເຮັດໃຫ້ອັດຕາອາກອນຂອງຂະແໜງການຕ່າງໆ ເຊັ່ນ: ອຸດສາຫະກຳການຜະລິດເປັນຕົ້ນຫລຸດລົງຈາກ 16% ເຫລືອ 13%; ຈະເພີ່ມທະວີການດຶງດູດທຶນຕ່າງປະເທດ, ຫລຸດຜ່ອນຂໍ້ຈຳກັດເຂົ້າເຖິງຕະຫລາດຕື່ມອີກ, ຫລຸດຜ່ອນບັນຊີດ້ານລົບສຳລັບທຶນຕ່າງປະເທດ, ອະນຸຍາດໃຫ້ທຶນຕ່າງປະເທດດຳເນີນທຸລະກິດດ້ວຍທຶນຝ່າຍດຽວໃນແຕ່ລະຂົງເຂດຫລາຍກວ່າເກົ່າ; ສືບຕໍ່ຈັດຕັ້ງປະຕິບັດມາດຕະການປະຕິຮູບ ແລະ ເປີດປະຕູສູ່ພາຍນອກໃນຂະ ແໜງການການທະຄານ ແລະ ອື່ນໆ, ປັບປຸງນະໂຍບາຍເປີດປະຕູສູ່ພາຍນອກຂອງຕະຫລາດໜີ້ສິນ, ເລັ່ງລັດການເຊື່ອມໂຍງດ້ານລະບຽບການເສດຖະກິດການຄ້າທົ່ວໄປກັບສາກົນ,ສ້າງສະພາບແວດລ້ອມດ້ານການຕະຫລາດທີ່ເປັນວິສາຫະຈີນ ແລະ ວິສາຫະກິດທຶນຕ່າງປະເທດໃຫ້ມີຄວາມສະເໝີພາບກັນ ແລະ ສາມາດແຂ່ງຂັນກັນໄດ້ຢ່າງຍຸຕິທຳ.



ເພີ່ມທະວີການປົກປ້ອງສິດ ແລະ ຜົນປະໂຫຍດທີ່ຖືກຕ້ອງຕາມກົດໝາຍຂອງນັກທຸລະກິດຕ່າງປະເທດ; ຈີນຈະເພີ່ມເຂດທົດລອງການຄ້າເສລີຊຽງໄຮເຂດໃໝ່, ຊຸກຍູ້ການກໍ່ສ້າງເຂດທົດລອງການຄ້າເສລີໄຫຫລໍ, ຄົ້ນຄວ້າທ່າກຳປັ່ນການຄ້າເສລີທີ່ມີສີສັນພິເສດຂອງຈີນ ແລະ ການຈັດຕັ້ງປະຕິບັດໃນຂອບການຮ່ວມມືຂໍ້ລິເລີ່ມຫນຶ່ງແລວຫນຶ່ງເສັ້ນພາຍໃຕ້ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນນັ້ນເຫັນວ່າມີຄວາມຄືບຫນ້າ ແລະ ເປັນກຸນແຈສໍາຄັນບໍ່ພຽງແຕ່ຈີນຝ່າຍດຽວ ຫາກຍັງສະທ້ອນໃຫ້ເຫັນຄວາມພະຍາຍາມ ຄວາມມຸ່ງຫມັ້ນໃນການພັດທະນາເສດຖະກິດ-ສັງຄົມ ແລະ ຂັບເຄື່ອນການພັດທະນາຢ່າງຍືນຍົງໃນອະນາຄົດ ຕົວຢ່າງໂຄງການກໍ່ສ້າງເສັ້ນທາງລົດໄຟລາວ-ຈີນ, ໂຄງການລົດໄຟໄທ-ຈີນ ແລະ ເຂດພັດທະນານິຄົມອຸດສາຫະກໍາອື່ນໆຢູ່ຕ່າງປະເທດພາຍໃຕ້ການຮ່ວມມືກັນຢ່າງໃກ້ຊິດນັ້ນເຫັນວ່າມີຄວາມຄືບຫນ້າ ແລະ ເພີ່ງພໍໃຈຢ່າງຈະແຈ້ງ ເຊິ່ງທັງຫມົດເຫລົ່ານັ້ນຈະເຮັດພາກພື້ນມີຄວາມເຂັ້ມແຂງດ້ານເສດຖະກິດ, ການຄ້າ,ການລົງທຶນ, ການບໍລິການ, ການທ່ອງທ່ຽວ ແລະ ອື່ນໆ.

ບົດລາຍງານໃນລະຫວ່າງກອງປະຊຸມຄັ້ງນີ້ຍັງເປີດເຜີຍວ່າ:
ປີ 2019 ນີ້ ຈີນວາງແຜນຈະຫລຸດຈຳນວນຜູ້ທຸກຍາກໃນຊົນນະບົດໃຫ້ໄດ້ 10 ລ້ານຄົນ; ຈະໃຊ້ມາດຕະການຫລາຍຢ່າງພ້ອມກັນ ເພື່ອຊຸກຍູ້ໃຫ້ປະຊາຊົນໃນຕົວເມືອງ ແລະ ຊົນນະບົດມີລາຍຮັບເພີ່ມຂຶ້ນ, ເພີ່ມຄວາມສາມາດໃນການບໍລິໂພກ, ຕອບສະໜອງການປ່ຽນແປງໃໝ່ແຫ່ງຄວາມຕ້ອງການດ້ານການບໍລິໂພກ, ເພີ່ມການສະໜອງສິນຄ້າ ແລະການບໍລິການຄຸນນະພາບດີໂດຍຜ່ານຫລາຍຊ່ອງທາງ; ຈະພັດທະນາຂະແໜງການເບີ່ງແຍງດູແລຜູ້ເຖົ້າຜູ້ອາວຸໂສ, ຈະພັດທະນາຂະແໜງການທ່ອງທ່ຽວໃຫ້ແຂງແຮງ, ຮັກສາການບໍລິໂພກໃນດ້ານລົດຍົນໃຫ້ໝັ້ນທ່ຽງ, ສືບຕໍ່ປະຕິບັດນະໂຍບາຍການຊື້ລົດຍົນພະລັງງານໃໝ່ໃນລາຄາສົມເຫດສົມຜົນ.
ແນວໃດກໍດີ ປີ 2018 ຜ່ານມາເຫັນການເປີດປະຕູສູ່ພາຍນອກຂອງຈີນເຫັນວ່າກວ້າງອອກຢ່າງຮອບດ້ານ, ສະພາບແລດລ້ອມການດຳເນີນທຸລະກິດຖືກຈັດອັນດັບໃນສາກົນຖີບສູງຂຶ້ນຢ່າງປະຈັກຕາ, ການຮ່ວມມືກັນສ້າງໜຶ່ງແລວໜຶ່ງເສັ້ນທາງໄດ້ຮັບການພັດທະນາ ແລະ ມີຄວາມຄືບຫນ້າຢ່າງຕໍ່ເນື່ອງ; ສາມາດດຶງດູດການລົງທຶນຂອງຕ່າງປະເທດ 138 ກວ່າຕື້ໂດລາສະຫະລັດ, ອັດຕາສ່ວນພາສີຫລຸດດລົງຈາກ 9,8% ເຫລືອ 7,5% ແລະ ອື່ນໆ.



ຂ່າວ: ເກີດຂວັນໃຈ, ລາຍງານຈາກ: ປັກກິ່ງ

Post a Comment

0 Comments