Header Ads

ກອງປະຊຸມໂປອາວມຸ່ງເນັ້ນການພັດທະນາແບບຍືນຍົງ




ຂປລ. ກອງປະຊຸມເວທີປຶກສາຫາລືໂປອາວເພື່ອອາຊີປະຈໍາປີ 2019 ພາຍໃຕ້ຫົວຂໍ້”ຮ່ວມອະນາຄົດ,ຮ່ວມແຮງຮ່ວມໃຈກັນ ແລະ ຮ່ວມກັນພັດທະນາ” ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 28 ມີນາ 2019 ທີ່ເມືອງໂປອາວ ແຂວງໄຫຫນານ ສປ ຈີນ ໂດຍໃຫ້ກຽດເປັນປະທານກອງປະຊຸມຄັ້ງນີ້ແມ່ນ ທ່ານ ຫລີ ເຄີ້ ສຽງ ນາຍົກລັດຖະມົນຕີແຫ່ງ ສປ ຈີນ, ສະເພາະ ສປປ ລາວນໍາໂດຍ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ພ້ອມບັນດາປະມຸກລັດ, ລັດຖະມົນ, ຄູ່ຮ່ວມມື,ອົງການຈັດຕັ້ງຈາກພາກລັດ-ສາກົນ, ຜູ້ປະກອບການ,ສື່ມວນຊົນ ແລະ ເຈົ້າຫນ້າທີ່ຂ້ອງຈາກ 60 ກວ່າປະເທດກັບ 2.000 ກວ່າຄົນເຂົ້າຮ່ວມ.

ກອງປະຊຸມຈະດໍາເນີນໄປເປັນເວລາ2 ວັນໃນລະຫວ່າງວັນທີ 27-28 ມີນາ 2019 ເຊິ່ງຕາງຄະນະຜູ້ແທນໄດ້ຮ່ວມກັນປຶກສາຫາລື ແລະ ແລກປ່ຽນບັນຫາສໍາຄັນພາຍໃນພາກພື້ນ ລວມທັງບັນຫາສາກົນປິ່ນອອ້ມໂດຍສະເພາະການຮ່ວມມືດ້ານການພັດທະນາເສດຖະກິດ-ສັງຄົມ,ການຄ້າ, ການລົງທຶນ, ການພັດທະນາເຕັກໂນໂລຊີ ແລະ ນະວັດຕະກໍາໃຫມ່, ການເຊື່ອມໂຢງ, ນະໂຍບາຍເປີດກວ້າງ ແລະ ອື່ນໆ.




ໃນໂອກາດດັ່ງນີ້, ທ່ານ ຫລີ ເຄີ້ ສຽງ ນາຍົກລັດຖະມົນຕີແຫ່ງ ສປ ຈີນ ໄດ້ກ່າວໃນເວທີກອງປະຊຸມຄັ້ງນີ້ວ່າ: ຈີນໄດ້ສືບຕໍ່ປັບປຸງກົດຫມາຍ ແລະ  ສ້າງກົດລະບຽບຕ່າງໆເພື່ອສະຫນັບສະຫນູນການຈັດຕັ້ງປະຕິບັດການລົງທຶນຕ່າງປະເທດບົນພື້ນຖານຄວາມສະເຫນີພາບລະຫວ່າງນັກລົງທຶນພາຍໃນ-ຕ່າງປະເທດ,ເປີດໂອກາດໃຫ້ມີການເຂົ້າເຖິງຕະຫລາດຫລາຍຂຶ້ນກວ່າເກົ່າ, ເພີ່ມທະວີການຮ່ວມມື, ສ້າງຄວາມອົກເຂົ້າໃຈ; ເພີ່ມໂອກາດການພັດທະນາດ້ານເສດຖະກິດ-ສັງຄົມ, ການຄ້າ,ການລົງທຶນ, ການເງິນ, ການໄປມາຫາສູ່ກັນ ແລະ ອື່ນໆ.

ພ້ອມດຽວກັນນີ້, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວໄດ້ກ່າວໃນເວທີກອງປະຊຸມໂປອາວວ່າ: ປັດຈຸບັນ ພວກເຮົາໄດ້ດໍາລົງຊີວິດໃນທາມກາງສະພາບການຂອງໂລກຜັນແປຢ່າງວອ່ງໄວ ເຊິ່ງໄດ້ຄວາມກາງວົນຕໍ່ປະຊາຄົມໂລກໂດຍສະເພາະຄວາມຫມັ້ນຄົງດ້ານການເມືອງ, ສັນຕິພາບ, ຄວາມໄວ້ເນື້ອເຊື່ອໃຈເຊິ່ງກັນ-ກັນ ແລະ ອື່ນໆໄດ້ກາຍເປັນບັນຫາອອ່ນໄຫວຄວນລະມັດລະວັງ ແລະ ຄວນມຸ່ງຫມັ້ນເພີ່ມການຮ່ວມມື ຄວາມເຂົ້າໃຈ ແລະ ເພື່ອນມິດສະຫາຍເພື່ອການພັດທະນາຍືນຍົງ. ເສັ້ນທາງແຫ່ງການເປີດກວ້າງເຊິ່ງກັນ-ກັນຈະເປັນນະໂຍບາຍທິ່ດີ ແລະ ເປັນເງື່ອນໄຂໃຫ້ປະເທດດ້ອຍພັດທະນາ, ປະເທດກໍາລັງພັດທະນາ ແລະ ພັດທະນາແລ້ວໄດ້ມີໂອກາດເຂົ້າເຖິງນະໂຍບາຍເປີດກວ້າງເພື່ອການພັດທະນາ, ການເຂົ້າເຖິງແຫລ່ງທຶນ, ການພັດທະນາເຕັກໂນໂລຊີໃຫມ່ ພວກເຮົາມຸ່ງຫນ້າສູ່ການເຊື່ອມໂຍງ ແລະ ການເຊື່ອມຈອດກັນຖືກເປັນຫົວໃຈສໍາຄັນໃນການຮ່ວມແຮງຮ່ວມໃຈ ແລະ  ຮ່ວມການພັດທະນາເພື່ອກ້າວໄປສູ່ການຮ່ວມອະນາຄົດທີ່ຈະເລີນກ້າວຫນ້າ, ຮຸ່ງເຮືອງ ແລະ ວັດທະນາຖາວອນຮ່ວມກັນຂອງບັນດາປະຊາຊາດຂອງພວກເຮົາຢ່າງເປັນຮູບປະທໍາ. 




ສປປ ລາວ ແລະ ສປ ຈີນເປັນປະເທດເພື່ອນມິດທີ່ຍາວນານ, ຄູ່ຮ່ວມຍຸດທະສາດທີ່ຫມັ້ນຄົງຍາວນານບົນຫລັກການ 4 ດີ ແລະ ເປັນເພື່ອນຮ່ວມຊະຕາກໍາທີ່ມຸ່ງໄປສູ່ອະນາຄົດທີ່ຮ່ວມແຮງຮ່ວມໃຈ, ຮ່ວມການພັດທະນາ ແລະ ໃຫ້ຄວາມສໍາຄັນຕໍ່ການແບ່ງປັນ,ເອື້ອເຟື້ອ, ຊ່ວຍເຫລືອເກື້ອກຸນເຊິ່ງກັນ ແລະ ກັນ ແລະ  ນັບຖືກັນຖານມິດສະຫາຍເປັນອ້າຍນ້ອງໂດຍຕ່າງຝ່າຍຕ່າງໄດ້ຮັບຜົນປະໂຫຍດ.

ທ່ານ ນາຍົກລັດຖະມົນຕີຢືນຢັນວ່າສປປ ລາວໄດ້ຮັບຜົນປະໂຫຍດຢ່າງຫລວງໂດຍກົງກັບນະໂຍບາຍເປີດກວ້າງຢ່າງສະເຫມີຕົ້ນສະເຫມີປາຍຂອງ ສປ ຈີນຕະຫລອດມາ ໃນນັ້ນລວມເຖິງນະໂຍບາຍບ້ານໄກ້ເຮືອນຄຽງທີ່ດີ, ຂໍ້ລິເລີ່ມຫນຶ່ງແລວຫນຶ່ງເສັ້ນທາງຂອງ ປະທານ ສີ ຈິ້ນ ຜີງໄດ້ສົ່ງຜົນກໍ່ໃຫ້ເກີດໂຄງການກໍ່ສ້າງເສັ້ນລົດໄຟລາວ-ຈີນຈາກຊາຍແດນຈີນເຖິງນະຄອນຫລວງວຽງຈັນຍາວ 400 ກວ່າກິໂລແມັດ ແລະ ຄາດວ່າຈະສໍາເລັດພາຍປີ 2021 ເຊິ່ງທາງລົດໄຟດັ່ງກ່າວຈະສາມາດຜ່ານໄທ ແລະ ອອກສູ່ບັນດາປະເທດສະມາຊິກອາຊຽນ ລວມທັງປ່ຽນສະຖານະຂອງ ສປປ ລາວຈາກປະເທດບໍ່ຕິດຈອດກັບທະເລກາຍເປັນປະເທດທີ່ເຊື່ອມຈອດກັບບັນດາປະເທດອື່ນໆໃນພາກພື້ນ ແລະ ສາກົນໃນເວລາອັນໄກ້ນີ້.

ລາຍງານໂດຍ: ເກີດຂວັນໃຈ ມາລີຈັນສີ, 
ຈາກເມືອງໂປອາວ ແຂວງໄຫຫນານ
Powered by Blogger.