Header Ads

ໄຊຍະບູລີ ປັບປຸງຫຼາຍຕໍາແໜ່ງງານ ຢູ່ບັນດາພະແນກການອ້ອມຂ້າງ



ເພື່ອເຮັດໃຫ້ກົງຈັກການຈັດຕັ້ງ ແລະ ການຈັດບຸກຄະລາກອນເຂົ້າໃສ່ຕໍາແໜ່ງງານ  ຢູ່ບັນດາພະແນກ ແລະ ຂະແຫນງການອ້ອມຂ້າງແຂວງໄຊຍະບູລີ ມີຄວາມເໝາະສົມ ແລະ ເພື່ອເຮັດໃຫ້ວຽກງານຢູ່ບັນດາພະແນກການ, ແລະ ຂະແຫນງການ ໄດ້ເຄື່ອນໄຫວ ແລະ ເຮັດສໍາເລັດຕາມເປົ້າໝາຍທີ່ຂັ້ນເທິງວາງໄວ້ນັ້ນ, ໃນ ຕອນເຊົ້າຂອງວັນທີ 29 ມີນາ 2019 ນີ້, ທີ່ສະໂມສອນຫ້ອງວ່າການແຂວງ ໄຊຍະບູລີ ໄດ້ຈັດພິທີປະກາດການຈັດຕັ້ງຂຶ້ນ, ໂດຍການໃຫ້ກຽດເຂົ້າຮ່ວມຂອງ ທ່ານ ປອ ສົມລິດ ເປືອກແກ້ວ, ຮອງເລຂາພັກແຂວງ, ປະທານສະພາປະຊາຊົນແຂວງ, ແລະ ໂດຍມີຮອງເຈົ້າເມືອງ ໄຊຍະບູລີ, ຜູ້ຕາງໜ້າພະແນກການ, ຂະແຫນງການອ້ອມຂ້າງແຂວງ ແລະ ພະນັກງານຫຼັກແຫຼ່ງພາຍໃນຫ້ອງວ່າການແຂວງເຂົ້າຮ່ວມ 60 ກວ່າຄົນ.





ໃນພິທີ, ທ່ານ ຄໍາພຽນ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານ ຂໍ້ຕົກລົງຂອງທ່ານເຈົ້າແຂວງ, ວ່າດ້ວຍການໂຍກຍ້າຍພະນັກງານໄປຮັບໜ້າທີ່ໃໝ່ຢູ່ຂະແໜງການອື່ນ ຈໍານວນ 6 ສະບັບຄື: ສະບັບເລກທີ່ 294, 296, 297, 302, 298, ແລະ 299/ຈຂ.ຊຍ, ລົງວັນທີ 21 ມີນາ 2019, ໂດຍເຈົ້າແຂວງ ໄຊຍະບູລີ ຕົກລົງ ໂຍກຍ້າຍ ທ່ານ ບຸນຍອງ ອາລິລັກ ຮອງເລຂາຄະນະບໍລິຫານງານຊາວໜຸ່ມແຂວງ ໄປຮັບໜ້າທີ່ໃໝ່ຢູ່ໂຮງຮຽນການເມືອງ-ການປົກຄອງແຂວງ, ໂຍກຍ້ານ ທ່ານ ສຸລິສັກ ຄໍາອ່ອນ ຮອງເລຂາຄະນະບໍລິຫານງານຊາວໜຸ່ມແຂວງ ໄປຮັບໜ້າທີ່ໃໝ່ຢູ່ສະຫະພັນກໍາມະບານແຂວງ, ໂຍກຍ້າຍ ທ່ານ ອານຸສິດ ມະໂນສິນ ຫົວໜ້າຂະແໜງກໍ່ສ້າງພັກ ຄະນະຈັດຕັ້ງແຂວງ ໄປຮັບໜ້າທີ່ໃໝ່ຢູ່ຄະນະບໍລິຫານງານຊາວໜຸ່ມແຂວງ, ໂຍກຍ້າຍ ທ່ານ ນາງ ແສງທອງ ແພງດີ ຄະນະພັກຮາກຖານ, ເລຂາໜ່ວຍພັກ, ຫົວໜ້າຂະແໜງສົ່ງເສີມ ພະແນກກະສິກໍາ ແລະ ປ່າໄມ້ ໄປຮັບໜ້າທີ່ໃໝ່ຢູ່ຄະນະບໍລິຫານງານຊາວໜຸ່ມແຂວງ, ໂຍກຍ້າຍ ທ່ານ ສົມເດັດ ວົງພູທອນ ຫົວໜ້າຂະແໜງເລຂາການນໍາ ຫ້ອງວ່າການແຂວງ ໄປຮັບໜ້າທີ່ໃໝ່ຢູ່ຫ້ອງວ່າການເມືອງ ໄຊຍະບູລີ ແລະ ໂຍກຍ້າຍ ທ່ານ ເມກ ເກດຕາໄຊ ຮອງປະທານສະຫະພັນກໍາມະບານແຂວງ ໄປຮັບໜ້າທີ່ໃໝ່ຢູ່ຫ້ອງວ່າການແຂວງ;




 ພ້ອມນີ້, ຍັງໄດ້ຜ່ານຂໍ້ຕົກລົງຂອງທ່ານເຈົ້າແຂວງ ສະບັບເລກທີ່ 65/ຈຂ.ຊຍ, ລົງວັນທີ 24 ມັງກອນ 2019 ວ່າດ້ວຍການແຕ່ງຕັ້ງຮອງຫົວໜ້າຫ້ອງວ່າການແຂວງ, ເຈົ້າແຂວງຕົກລົງແຕ່ງຕັ້ງ ທ່ານ ໂອນາ ທອງນາ, ອາດີດຄະນະປະຈໍາພັກເມືອງ, ຮອງເຈົ້າເມືອງ ຊຽງຮ່ອນ ເປັນຮອງຫົວໜ້າຫ້ອງວ່າການແຂວງ ແລະ ຜ່ານມະຕິຂອງຄະນະປະຈໍາພັກແຂວງ 4 ສະບັບຄື: ສະບັບເລກທີ 200, 201, 202, ແລະ 300/ຄພຂ.ຊຍ, ລົງວັນທີ 21 ມີນາ 2019, ຄະນະປະຈໍາພັກແຂວງ ໄຊຍະບູລີ ຕົກລົງແຕ່ງຕັ້ງ ສະຫາຍ ສຸລິສັກ ຄໍາອ່ອນ, ຮອງເລຂາຄະນະບໍລິຫານງານຊາວໜຸ່ມແຂວງ ເປັນຮອງປະທານສະຫະພັນກໍາມະບານແຂວງ, ແຕ່ງຕັ້ງ ສະຫາຍ ນາງ ແສງທອງ ແພງດີ ຄະນະພັກຮາກຖານ, ເລຂາໜ່ວຍພັກ, ຫົວໜ້າຂະແໜງສົ່ງເສີມ ພະແນກກະສິກໍາ ແລະ ປ່າໄມ້ ເປັນຮອງເລຂາຄະນະບໍລິຫານງານຊາວໜຸ່ມແຂວງ, ແຕ່ງຕັ້ງສະຫາຍ ອານຸສິດ ມະໂນສິນ ຫົວໜ້າຂະແໜງກໍ່ສ້າງພັກ ຄະນະຈັດຕັ້ງແຂວງ ເປັນຮອງເລຂາຄະນະບໍລິຫານງານຊາວໜຸ່ມແຂວງ ແລະ ແຕ່ງຕັ້ງ ທ່ານ ເມກ ເກດຕາໄຊ ຮອງປະທານສະຫະພັນກໍາມະບານແຂວງ ເປັນຮອງຫົວໜ້າຫ້ອງວ່າການແຂວງ ໄຊຍະບູລີ.



  ໃນຕອນທ້າຍພິທີ,ທ່ານ ປອ ສົມລິດ ເປືອກແກ້ວ, ຮອງເລຂາພັກແຂວງ, ປະທານສະພາປະຊາຊົນແຂວງ ກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ເນັ້ນຫນັກ ຕໍ່ຜູ້ທີ່ຖືກໂຍກຍ້າຍ ແລະ ຮັບແຕ່ງຕັ້ງ ຈົ່ງເອົາໃຈໃສ່ຄົ້ນຄວ້າ, ກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປະດິດຄິດສ້າງ, ສະດຸ້ງໄວຕໍ່ໜ້າທີ່ວຽກງານ, ແບບແຜນວິທີນໍາພາ, ເພີ່ມທະວີຄວາມສາມັກຄີ ຕິດພັນກັບການນັບຖືຫຼັກການລວມສູນປະຊາທິປະໄຕ ແລະ ພ້ອມກັນປະຕິບັດໜ້າທີ່ ທີ່ໄດ້ຮັບການມອບໝາຍໃຫ້ສໍາເລັດຕາມລະດັບຄາດໝາຍ.

ນັກຂ່າວ: ຫ້ອງວ່າການແຂວງ ໄຊຍະບູລີ
ໂດຍ: ອຸ່ນເຮືອນ ໂພທິລັກ

No comments

Powered by Blogger.