Header Ads

ປທສ ແຂວງເຊກອງ ສືບຕໍ່ຂະຫຍາຍພັກ


#ໂດຍ:ນາລີວັນ 
       ພິທີປະກາດຮັບມະຫາຊົນກ້າວໜ້າ ເຂົ້າເປັນສະມາຊິກພັກສະໄໝສໍາຮອງ ຂອງໜ່ວຍພັກຮາກຖານ ພະແນກໄປສະນີໂທລະຄົມມະນາຄົມ ແລະການສື່ສານ (ປທສ) ແຂວງເຊກອງ ໄດ້ມີຂຶ້ນໃນຕອນບ່າຍວັນທີ 22 ມີນາ 2019 ຜ່ານມານີ້ ທີ່ຫ້ອງປະຊຸມພະແນກດັ່ງກ່າວ ໂດຍການເຂົ້າຮ່ວມຂອງທ່ານ ສຸພັນ ສາຍເຊກອງ ເລຂາໜ່ວຍພັກ ຫົວໜ້າພະແນກ ປທສ, ມີຄະນະພັກ-ຄະນະນໍາພະແນກ, ສະມາຊິກພັກສົມບູນ-ສໍາຮອງ ແລະແຂກຖືກເຊີນເຂົ້າຮ່ວມ. 


       ທ່ານ ນາງ ຂັວນໃຈ ສີສຸວົງ ຕາງໜ້າຂະແໜໍງກໍ່ສ້າງພັກ ຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 80;81/ຄຈພຂ, ລົງວັນທີ 11/03/2019 ວ່າດ້ວຍຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສະໄໝສໍາຮອງ ຈໍານວນ 2 ສະຫາຍ ຄື: ສະຫາຍນາງ ພວງມະໄລ ຊາບັນດິດ ອາຍຸ 32 ປີ ແລະສະຫາຍນາງ ຄໍາແພງ ດວງສາ ອາຍຸ 36 ປີ ເຂົ້າເປັນສະມາຊິກພັກສະໄໝສໍາຮອງ ສັງກັດຢູ່ໜ່ວຍພັກຮາກຖານ ພະແນກ ປທສ ແຂວງເຊກອງ ເຊິ່ງທັງສອງໄດ້ຜ່ານການຮໍ່າຮຽນສະໜັບສະໜູນ ແລະກົດລະບຽບຂອງພັກເປັນຢ່າງດີ. 



        ຈາກນັ້ນ, ສະຫາຍ ສຸພັນ ສາຍເຊກອງ ເລຂາໜ່ວຍພັກ ຫົວໜ້າພະແນກ ປທສ ກໍໃຫ້ກຽດມອບໃບຢັ້ງຢືນ ແລະສໍາຜັດມື ເພື່ອຮັບເອົາທັງສອງສະຫາຍເຂົ້າເປັນສະມາຊິກພັກສະໄໝສໍາຮອງຢ່າງເປັນທາງການ ພ້ອມທັງໄດ້ກ່າວສະແດງຄວາມຊົມເຊີຍຕໍ່ສະມາຊິກພັກໃໝ່ ທີ່ຕັ້ງໜ້າຝຶກຝົນຫຼໍ່ຫຼອມຕົນເອງຈົນໄດ້ເຂົ້າເປັນສະມາຊິກພັກສະໄໝສໍາຮອງ ພ້ອມທັງຕັກເຕືອນສະມາຊິກພັກສຳຮອງໃໝ່ຈົ່ງເພີ່ມທະວີຄວາມສາມັກຄີພາຍໃນພັກໃຫ້ແໜ້ນແຟ້ນ, ຍົກສູງລະດັບຄວາມຮູ້, ຄວາມສາມາດ, ມີຄວາມຮັບ ຜິດຊອບຕໍ່ໜ້າທີ່ວຽກງານຂອງຕົນທີ່ໄດ້ຮັບການມອບໝາຍ, ອອກແຮງຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກສົມບູນໃນອານາຄົດ, ເປັນແບບຢ່າງອັນດີງາມໃຫ້ແກ່ມະຫາຊົນ ແລະຮຽກຮ້ອງມາຍັງສະມາຊິກພັກສົມບູນ-ສໍາຮອງທຸກສະຫາຍ ຕ້ອງເຊື່ອມຊຶມ ແລະກຳແໜ້ນຕໍ່ແນວທາງນະໂຍບາຍຂອງພັກ, ມີສະຕິເປັນເຈົ້າໃນການປະຕິບັດກົດລະບຽບຂອງພັກ, ເອົາໃຈໃສ່ຄົ້ນຄວ້າຮໍ່າຮຽນບັນດາກົດໝາຍຕ່າງໆ ທີ່ກຽ່ວຂ້ອງກັບວຽກງານໄປສະນີໂທລະຄົມມະນາຄົນ ແລະການສື່ສານຢ່າງຕໍ່ເນື່ອງ, ສືບຕໍ່ຕັ້ງໜ້າປະຕິບັດໜ້າທີ່ວຽກງານທີ່ຕົນຮັບຜິດຊອບໃຫ້ມີຜົນສໍາເລັດ, ຕັ້ງໜ້າປະກອບສ່ວນສ້າງໃຫ້ໜ່ວຍພັກກາຍເປັນໜ່ວຍພັກແຂງ ຮູ້ນໍາພາຮອບດ້ານ ແລະໜ່ວຍພັກປອດໃສ ເຂັ້ມແຂງ ໜັກແໜ້ນ ຢ່າງຕໍ່ເນື່ອງ.

No comments

Powered by Blogger.