Header Ads

ພະ​ແນກ ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ ແລະ ກອງ​ບັນ​ຊາ​ການ ປ້ອງ​ກັນ​ຄວາມ​ສະ​ຫງົບ​ ແຂວງສາ​ລະ​ວັນ ເປັນ​ເຈົ້າ​ພາບ​ຮ່ວມ​ກັນ ເປີດກອງ​ປະ​ຊຸມ ເພື່ອ​ປຶກ​ສາ​ຫາ​ລື ​ກຳ​ນົດ​ທິດ​ທາງ ໃນ​ການ​ແກ້​ໄຂ​ບັນ​ຫາ​ຄົນ​ຕ່າງປະ​ເທດ ແລະ ແຮງ​ງານ​ຕ່າງ​ປະ​ເທດ 

ພະ​ແນກ ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ ແລະ ກອງ​ບັນ​ຊາ​ການ ປ້ອງ​ກັນ​ຄວາມ​ສະ​ຫງົບ​ ແຂວງສາ​ລະ​ວັນ ເປັນ​ເຈົ້າ​ພາບ​ຮ່ວມ​ກັນ ເປີດກອງ​ປະ​ຊຸມ ເພື່ອ​ປຶກ​ສາ​ຫາ​ລື ​ກຳ​ນົດ​ທິດ​ທາງ ໃນ​ການ​ແກ້​ໄຂ​ບັນ​ຫາ​ຄົນ​ຕ່າງປະ​ເທດ ແລະ ແຮງ​ງານ​ຕ່າງ​ປະ​ເທດ ທີ່​ເຄື່ອ​ນ​ໄຫວບໍ່​ຖືກ​ຕ້ອງ​ຕາມ​ລະ​ບຽບ​ກົດ​ໝາຍ ຂອງ ສ​ປ​ປ​ລາວ ໂດຍ​ພາຍ​ໃຕ້​ການ​ເປັນ​ປະ​ທານ ແລະ ໃຫ້​ກຽດ​ໂອ້​ລົມ ຂອງ ທ່ານ ພູ​ທົງ ຄຳ​ມະ​ນີ​ວົງ ກຳ​ມະ​ການ​ປະ​ຈຳ​ພັກ​ແຂວງ ຮອງ​ເຈົ້າ​ແຂວງ​ສາ​ລະ​ວັນ ຜູ່​ຊີ້​ນຳ​ຂົງ​ເຂດ​ວຽກ​ງານ​ວັດ​ທະ​ນະ​ທຳ​-ສັງ​ຄົມ ທັງ​ເປັນ​ປະ​ທານ ຄະ​ນະ​ກຳ​ມ​ະ​ການ​ຊີ້​ນຳ​ວຽກ​ງານ​ແກ້​ໄຂ​ບັນ​ຫາ​ຄົນ​ຕ່າງ​ປະ​ເທດ ຂັ້ນ​ແຂວງ , ມີ​​ທ່ານ ສຸດ​ດາ​ໄລ ອິນ​ດາ​ວົງ ຮັກ​ສາ​ການ​ຫົວ​ໜ້າ​ພະ​ແນກ ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ,ທ່ານ ພັ​ທ ສຸ​ລິ​ວົງ ເຄນ​ທະ​ນູ​ພິດ ຮອງ​ຫົວ​ໜ້າ​ກອງ​ບັນ​ຊາ​ການ​ປ້ອງ​ກັນ​ຄວາມ​ສະ​ຫງົບ​ແຂວງ , ບັນ​ດາ​ທ່ານ ເຈົ້າ​ເມືອງ , ຮອງ​ເຈົ້າ​ເມືອງ,ການ​ນຳ​ພະ​ແນກ​ການ​ອ້ອມ​ຂ້າງ​ແຂວງທີ່​ກ່ຽວ​ຂ້ອງ,​ຫົວ​ໜ້າ​ຫ້ອງ​ການ​ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ,ຫົວ​ໜ້າ ປກ​ສ ຂັ້ນ​ເມືອງ , ສະ​ພາ​ປະ​ຊາ​ຊົນ​ແຂວງ,ຫົວ​ໜ່ວຍ​ແຮງ​ງານ,ບໍ​ລິ​ສັດ ຕະຫຼອດ​ຮອ​ດວິ​ຊາ​ການ​ກ່ຽວ​ຂ້ອງ​ເຂົ້າ​ຮ່ວມ ລວມ 84 ທ່ານ , ຍິງ 12 ທ່ານ.




     ໃນ​ກອງ​ປະ​ຊຸມ ທ່ານ ສຸດ​ດາໄລ ອິນ​ດາ​ວົງ ໄດ້​ສະ​ຫລຸບ​ຄືນ​ອີກ​ເທື່ອ​ໜື່ງ ໃນ​ການ​ຈັດ​ຕັ້ງ​ປະ​ຕິ​ບັດ​ໃນ​ໄລ​ຍະ​ຜ່ານ​ມາ ນັ້ນ​ແມ່ນ​ການ​ແກ້​ໄຂ ຕາມ​ຄຳ​ສັ່ງ 62/ນຍ,ລົງ​ວັນ​ທີ 13 ພະ​ຈິກ 2015.ເຊິ່ງ​ມີ​ທັງ​ດ້ານ​ຕັ້ງ​ໜ້າ ແລະ ສິ່ງ​ທ້​າທາຍ ທີ່​ຈະ​ຕ້ອງ​ໄດ້​ສືບ​ຕໍ່​ແກ້​ໄຂ​ຕໍ່​ໄປ ເປັນ​ຕົ້ນ: ການ​ຈັດ​ຕັ້ງ​ປະ​ຕິ​ບັດ​ຕາມ​ຄຳ​ສັ່ງດັ່ງ​ກ່າວ  ເຫັນ​ວ່າ ມີ​​ຜົນສຳ​ເລັດ​ຕາ​ມ​ລະ​ດັບ​ຄາດ​ໝາຍ,ຕາມກອບ​ເວ​ລາ​ທີ່​ກຳ​ນົດ​ໄວ້ ສາ​ມາດ​ສັງ​ລວມ​ບັນ​ດາ​ບັນ​ຫາ ລາຍ​ງານຕໍ່​ການ​ນຳ​ຂັ້ນ​ແຂວງ,ຂັ້ນ​ສູນ​ກາງ ​ນອກນັ້ນ ກໍ່​ຍັງ​ໄດ້​ມອບ​ບັນ​ຊີ​ຕົວ​ເລກ ທີ່​ຈະ​ໃຫ້​ພາກ​ສ່ວນ​ກ່ຽວ​ຂ້ອງ​ຮັບ​ຜິດ​ຊອບ​ຕໍ່​ໄປ ຄຽງ​ຄູ່​ກັບ​ຈຸດ​ດີ​ດັ່ງ​ກ່າວ ກໍ່​ຍັງ​ມີຫຼາຍ​ບັນ​ຫາ ທີ່​ເປັນ​ອຸ​ປະ​ສັກ ແລະ ທ້າ​ທາຍ ທີ່​ຈະ​ຕ້ອງ​ໄດ້​ສຸມ​ໃສ່​ແກ້​ໄຂ​ຄື: ຈຳ​ນວນ​ຄົນ​ຕ່າງ​ປະ​ເທດ​ທີ່ນອນ​ໃນ​ເງື່ອນ​ໄຂ​ສຳ​ລະ​ສະ​ສາງ ແລະ ປັບ​ສະ​ຖາ​ນະ​ພາບ ທີ່​ຍັງ​ເຄື່ອນ​ໄຫວບໍ່​ຖືກ​ຕ້ອງ​ຢູ່ນັ້ນ ຈະ​ໄດ້​ສືບ​ຕໍ່​ປະ​ຕິ​ບັດ​ຢ່າງ​ເຂັ້ມ​ງວດ ຕາມ​ລະ​ບຽບ​ກົດ​ໝາຍ ຂອງ​ແຕ່​ລະ​ຂະ​ແໜງ​ກາ​ນ​ທີ່​ມີ​ຢູ່ ໂດຍ​ອີງ​ໃສ່ ແຜນ​ຂອງ​ສອງ​ກະ​ຊວງ ຮ​ສ​ສ ແລະ ປກ​ສ ສະ​ບັບ​ເລກ​ທີ 0584/ຮ​ສ​ສ ແລະ ມະ​ຕິ​ກອງ​ປະ​ຊຸມ ຄັ້ງ​ວັນ​ທີ 7-8 ທີ່​ນະ​ຄອນຫຼວງວຽງ​ຈັນ,ຊຶ່ງ​ແບ່ງ​ຄວາມ​ຮັບ​ຜິດ​ຊອບ​ດັ່ງ​ນີ້:

l. ກອງບັນຊາການປ້ອງກັນຄວາມສະຫງົບມີຄວາມຮັບຜິດຊອບດັ່ງນີ້:
1). ຕ້ອງເປັນເຈົ້າການຮັບຜິດຊອບຄົນຕ່າງປະເທດ ທີ່ເຂົ້າມາເຄື່ອນໄຫວແບບເລ້ລ້ອນ ເຊັ່ນ ຫາບ, ຫີ້ວ, ຍູ້ລໍ້, ບັນທຸກໃສ່ຍານພາຫານະເພື່ອຂາຍສິ່ງຂອງຕາມສະຖານທີ່ຕ່າງໆ, ເຄື່ອນໄຫວຊອກຫາວຽກແບບອິດສະຫຼະບໍ່ເປັນຜູ້ອອກແຮງງານ, ຕັ້ງຮ້ານເກມ, ຮ້ານບັນເທີງເພື່ອບໍລິການແບບບໍ່ໄດ້ຮັບອະນຸຍາດ, ຂາຍອາຫານ, ຜັກ, ໝາກໄມ້, ເຄື່ອງຍ່ອຍ ແລະ ອື່ນໆ;

2). ເປັນເຈົ້າການໃນການກວດກາຄຸ້ມຄອງການພັກເຊົາ, ການເຊົ່າສະຖານທີ່ຕ່າງໆຂອງຄົນຕ່າງປະເທດ ໃຫ້ຖືກຕ້ອງຕາມການອະນຸຍາດຂອງເຈົ້າໜ້າທີ່ກ່ຽວຂ້ອງ ພາຍໃຕ້ກົດໝາຍ ແລະ ລະບຽບການ; 

3). ເປັນເຈົ້າການໃນການສຶກສາອົບຮົມ, ຝຶກອົບຮົມ ແລະ ປະຕິບັດວິໄນ ຕໍ່ເຈົ້າຫນ້າທີ່ໃນຂະແໜງ ປ້ອງກັນຄວາມສະຫງົບ ທີ່ບໍ່ປະຕິບັດ ຫຼື ບໍ່ເອົາໃຈໃສ່ໃນການດຳເນີນມາດຕະການຕໍ່ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງດັ່ງກ່າວ ພ້ອມດຽວກັນນັ້ນກໍມີການສະເຫນີເພື່ອຍ້ອງຍໍຕໍ່ຜູ້ມີຜົນງານຕາມຄວາມເໝາະສົມ;

4). ເປັນເຈົ້າການໃນການຕິດຕາມ, ຊຸກຍູ້ສາຍຕັ້ງຂອງຕົນ ລວມທັງກຸ່ມຕຳຫຼວດບໍລິການປະຊາຊົນ ແລະ ປກສ ບ້ານໃນການຕິດຕາມ, ຄຸ້ມຄອງ ແລະ ປະຕິບັດມາດຕະການຕໍ່ຄົນຕ່າງປະເທດທີ່ເຂົ້າມາເຄື່ອນໄຫວ ຕາມຂໍ້ 1.1 ພ້ອມທັງບໍ່ອອກບັດອະນຸຍາດພັກເຊົົາໃຫ້ຄົນຕ່າງປະເທດຜູ້ທີ່ເຂົ້າມາເຄື່ອນໄຫວ ແບບບຸກຄົນ, ບໍ່ມີຫົວໜ່ວຍເປັນຕົວເປັນຕົນ ເວົ້າລວມແມ່ນ ບໍ່ຖືກຕ້ອງ;

ll. ພະແນກແຮງງານ ແລະ ສະຫວັດດີການສັງຄົມມີຄວາມຮັບຜິດຊອບດັ່ງນີ້:

1). ຕ້ອງເປັນເຈົ້າການຮັບຜິດຊອບ ຜູ້ອອກແຮງງານຕ່າງປະເທດທັງຫມົດທີ່ຍັງເຮັດວຽກແບບບໍ່ຖືກຕ້ອງຕາມກົດໝາຍ ເຊັ່ນ ເຮັດວຽກນຳຫົວຫນ່ວຍແຮງງານ, ໂຄງການ, ຫ້າງຮ້ານຕ່າງໆ , ບຸກຄົນ,ນິຕິບຸກຄົນ ທີ່ນຳໃຊ້ແຮງຕ່າງປະເທດ ເຮັດວຽກນຳຕົນໂດຍບໍ່ໄດ້ຮັບອະນຸຍາດ ຫຼື ຜູ່ອອກແຮງງານຕ່າງປະເທດ ທີ່ເຄຶ່ອນໄຫວອອກແຮງງານແບບບໍ່ຖືກຕ້ອງ.

2). ຕ້ອງເປັນຜູ້ຮັບຜິດຊອບໃນການຊຸກຍູ້ເຈົ້າຫນ້າທີ່ກວດກາແຮງງານ ເພື່ອກວດກາການນຳໃຊ້ແຮງງານຕ່າງປະເທດ ຖ້າພົບເຫັນວ່າບໍ່ຖືກຕ້ອງຕາມລະບຽບການແມ່ນໃຫ້ປະຕິບັດມາດຕະການຕາມກົດໝາຍ ແລະ ລະບຽບການຂອງຂະແໜງການຕົນຢ່າງເຂັ້ມງວດ ຮັບຜິດຊອບ ບໍ່ອອກບັດອະນຸຍາດເຮັດວຽກໃຫ້ແກ່ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢ່າງເດັດຂາດ ລວມທັງປະຕິບັດມາດຕະການຕໍ່ແຮງງານຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມການອະນຸຍາດ; 

3). ເປັນເຈົ້າການໃນການສຶກສາອົບຮົມ ແລະ ປະຕິບັດວິໄນ ຕໍ່ເຈົ້າຫນ້າທີ່ກວດກາແຮງງານ ທີ່ບໍ່ປະຕິບັດ ຫຼື ບໍ່ເອົາໃຈໃສ່ໃນການດຳເນີນມາດຕະການຕໍ່ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງດັ່ງກ່າວ ພ້ອມດຽວກັນນັ້ນກໍມີການສະເຫນີເພື່ອຍ້ອງຍໍຕໍ່ຜູ້ມີຜົນງານຕາມຄວາມເໝາະສົມ.

lll. ພະແນກອຸດສາຫະກຳ ແລະ ການຄ້າ ມີຄວາມຮັບຜິດຊອບດັ່ງນີ້
1). ເປັນເຈົ້າການ ຮັບຜິດຊອບແກ້ໄຂຄົນຕ່າງປະເທດ ຫຼື ຜູ້ທີ່ລົງທຶນເພື່ອຄ້າຂາຍ, ສ້ອມແປງ, ດຳເນີນທຸລະກິດ, ການບໍລິການຮ້ານອາຫານ, ເຮືອນພັກ, ໂຮງແຮມ ແລະ ການລົງທຶນປະເພດອື່ນໆ ທີ່ຂັດກັບກົດໝາຍ ແລະ ລະບຽບການຂອງຂະແໜງຕົນ ໂດຍສະເພາະແມ່ນບັນຊີປະເພດທຸລະກິດທີ່ສະຫງວນໄວ້ໃຫ້ພົນລະເມືອງລາວ, ສະບັບປັງປຸງ/ຄໍ 02-2015 ຂອງກະຊວງອຸດສາຫະກໍາ ແລະ ການຄ້າ;

2). ລົບລ້າງ ແລະ ບໍ່ອອກໃບທະບຽນວິສາຫະກິດການຄ້າຊົ່ວຄາວໃຫ້ຜູ້ທີ່ເຄື່ອນໄຫວຜິດກົດໝາຍ ລວມທັງລົບລ້າງການໃຫ້ຜູ້ອື່ນເຊົ່າທະບຽນການຄ້າ;

3). ເປັນເຈົ້າການໃນການຊຸກຍູ້, ຕິດຕາມ, ກວດກາ ການຈັດຕັ້ງປະຕິບັດໜ້າທີ່ຂອງຂະແໜງການຕົນ ໃນການເພີ່ມທະວີຄວາມຮັບຜິດຊອບໃນການຈັດຕັ້ງປະຕິບັດກົດໝາຍ ແລະ ລະບຽບການຂອງຂະແໜງການຕົນຢ່າງເຂັ້ມງວດ;

4). ເປັນເຈົ້າການໃນການສຶກສາອົບຮົມ, ຝຶກອົບຮົມ ແລະ ປະຕິບັດວິໄນ ຕໍ່ເຈົ້າຫນ້າທີ່ໃນຂະແໜງ ອຸດສາຫະກຳ ແລະ ການຄ້າ ຫຼື ເຈົ້າຫນ້າທີ່ກວດກາການຄ້າ ທີ່ບໍ່ປະຕິບັດ ຫຼື ບໍ່ເອົາໃຈໃສ່ໃນການດຳເນີນມາດຕະການຕໍ່ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງດັ່ງກ່າວ ພ້ອມດຽວກັນນັ້ນກໍມີການສະເຫນີເພື່ອຍ້ອງຍໍຕໍ່ຜູ້ມີຜົນງານຕາມຄວາມເໝາະສົມ. 

lV ພະແນກການຕ່າງປະເທດມີຄວາມຮັບຜິດຊອບດັ່ງນີ້:
1). ເປັນເຈົ້າການໃນການໂຄສະນາ, ເຜີຍແຜ່ກົດໝາຍ ວ່າດ້ວຍການ ເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ , ເປັນຂົວຕໍ່ປະສານສົມທົບ ພົວພັນຮ່ວມມື ກັບບັນດາ ປະເທດໃກ້ຄຽງ , ບັນດາສະຖານທູດ,ສະຖານກົງສູນ ຂອງຕ່າງປະເທດປະຈຳໃນແຂວງຕົນ ຫຼື ແຂວງອື່ນ ເພື່ອໃຫ້ເຂົ້າໃຈ ເຫດຜົນ ແລະ ຄວາມຈຳເປັນຕໍ່ກັບການແກ້ໄຂບັນຫາຄົນຕ່າງປະເທດ ເຂົ້າສູ່ລະບຽບກົດໝາຍ;

V. ພະແນກແຜນການ ແລະ ການລົງທຶນ:
1). ເປັນເຈົ້າການຮັບຜິດຊອບ ໃຫ້ການຮ່ວມມື ຫລື ປະຕິບັດການແກ້ໄຂບັນຫາການເຄື່ອນໄຫວຂອງຄົນຕ່າງປະເທດໃຫ້ເປັນໄປຕາມກົດໝາຍ ແລະ ລະບຽບການທີ່ມີຢູ່ຂອງຂະແໜງການ ແລະ ຕາມນິຕິກຳອື່ນ;

VI ອົງການປົກຄອງແຂວງມີຄວາມຮັບຜິດຊອບດັ່ງນີ້.

1). ອົງການປົກຄອງແຂວງ,  ເປັນເຈົ້າການໃນການຊີ້ນຳ, ຕິດຕາມ ແລະ ຊຸກຍູ້ອົງການປົກຄອງຂັ້ນເມືອງ,ຂະແໜງ ການລັດອ້ອມຂ້າງແຂວງ ກ່ຽວກັບການເອົາໃຈໃສ່ຄຸ້ມຄອງການເຄື່ອນໄຫວຂອງຄົນຕ່າງປະເທດຢູ່ພາຍໃນແຂວງ . ສຶກສາອົບຮົມ, ປະຕິບັດວິໄນ ຫຼື ລົງໂທດຕໍ່ພະນັກງານ, ເຈົ້າຫນ້າທີ່ຂອງລັດ, ບຸກຄົນ, ນິຕິບຸກຄົນ ແລະ ປະຊາຊົນຢູ່ໃນແຂວງ ທີ່ບໍ່ເອົາໃຈໃສ່ປະຕິບັດຫນ້າທີ່ ຫຼື ຈົງໃຈເຮັດໃຫ້ມີຄົນຕ່າງປະເທດເຄື່ອນໄຫວໄດ້ຢ່າງບໍ່ຖືກຕ້ອງຕາມກົດໝາຍ.

2). ອົງການປົກຄອງຂັ້ນເມືອງ ເປັນເຈົ້າການໃນການຊີ້ນຳ, ຕິດຕາມ ແລະ ຊຸກຍູ້ອົງການປົກຄອງຂັ້ນບ້ານ ແລະ ກຸ່ມຕຳຫຼວດປະຊາຊົນ ແລະ ປກສ ບ້ານ, ຫ້ອງການລັດອ້ອມຂ້າງເມືອງ,  ກ່ຽວກັບການເອົາໃຈໃສ່ຄຸ້ມຄອງການເຄື່ອນໄຫວຂອງຄົນຕ່າງປະເທດຢູ່ພາຍໃນເມືອງ . ສຶກສາອົບຮົມ, ປະຕິບັດວິໄນ ຫຼື ລົງໂທດຕໍ່ພະນັກງານ, ເຈົ້າຫນ້າທີ່ຂອງລັດ, ບຸກຄົນ ນິຕິບຸກຄົນ ແລະ ປະຊາຊົນຢູ່ໃນເມືອງ,  ທີ່ບໍ່ເອົາໃຈໃສ່ປະຕິບັດໜ້າທີ່ ຫຼື ຈົງໃຈເຮັດໃຫ້ມີຄົນຕ່າງປະເທດເຄື່ອນໄຫວໄດ້ຢ່າງບໍ່ຖືກຕ້ອງຕາມກົດໝາຍ. 

3). ອົງການປົກຄອງຂັ້ນບ້ານ ສົມທົບກັບ ກຸ່ມຕຳຫຼວດບໍລິການປະຊາຊົນ ແລະ ປກສ ບ້ານ ເປັນເຈົ້າການໃນການ ຕິດຕາມ, ກວດກາ ການເຄື່ອນໄຫວຂອງຄົນຕ່າງປະເທດຢູ່ໃນບ້ານ ແລະ ກຸ່ມຂອງຕົນ ເຊັ່ນ: ການປະກອບອາຊີບ, ການພັກເຊົາ ແລະ ການເຊົ່າສະຖານທີ່ຕ່າງໆ ພາຍໃນບ້ານ ແລະ ກຸ່ມບ້ານຂອງຕົນ ຖ້າເຫັນວ່າມີຄົນຕ່າງປະເທດເຄື່ອນໄຫວບໍ່ຖືກຕ້ອງ ຫຼື ຄົນລາວໃຫ້ການຮ່ວມມື, ໃຫ້ຄວາມສະດວກແກ່ຄົນຕ່າງປະເທດເຄື່ອນໄຫວບໍ່ຖືກຕ້ອງ ກໍຮີບຮ້ອນລາຍງານຂັ້ນເຈົ້າຫນ້າທີ່ຂອງເມືອງ, ຕາມແຕ່ລະເປົ້້າໝາຍຂອງຄົນຕ່າງປະເທດ. ສຶກສາອົບຮົມ, ສະເໜີປະຕິບັດວິໄນ ຫຼື ລົງໂທດຕໍ່ພະນັກງານ ເຈົ້າຫນ້າທີ່ຂອງລັດ, ບຸກຄົນ, ນິຕິບຸກຄົນ ແລະ ປະຊາຊົນຢູ່ໃນບ້ານ, ກຸ່ມບ້ານຂອງຕົນ ທີ່ບໍ່ປະຕິບັດຫນ້າທີ່ ຫຼື ຈົງໃຈເຮັດໃຫ້ມີຄົນຕ່າງປະເທດເຄື່ອນໄຫວໄດ້ຢ່າງບໍ່ຖືກຕ້ອງຕາມກົດໝາຍ.

      ໃນ​ວາ​ລະ​ທ້າຍກອງ​ປະ​ຊຸມ ທ່ານ ຮອງ​ເຈົ້າ​ແຂວງ ໄດ້​ໃຫ້​ທິດ​ຊີ້​ນຳ​ໃນ​ການ​ປະ​ຕິ​ບັດ​ແຜນ​ສືບ​ຕໍ່​ແກ້​ໄຂ​ບັນ​ຫາ​ຄົນ​ຕ່າງ​ປະ​ເທດ​ດັ່ງ​ກ່າວ ໂດຍ​ຮຽກ​ຮ້ອງ​ມາ​ຍັງ​ທຸກ​ພາກ​ສ່ວນ,ບຸກ​ຄົນ,ນິ​ຕິ​ບຸກ​ຄົນ,ອົງ​ການ​ຈັດ​ຕັ້ງ​ລັດ​ແຕ່​ລະ​ຂັ້ນ ຈົ່ງ​ເປັນ​ເຈົ້າ​ການ​ຮ່ວມ​ກັນ ແກ້​ໄຂ ຕາມ​ລະ​ບຽບ​ກົດ​ໝາຍ ຂອງ​ແຕ່​ລະ​ຂະ​ແໜງ​ການ​ທີ່​ມີ​ຢູ່ , ບໍ່​ໃຫ້​ຕ່າງ​ຝ່າຍ​ຕ່າງ​ເຮັດ, ການ​ປະ​ສານ​ສົມ​ທົບ​ຕ້ອງ​ກົມ​ກຽວ ແລະ ຕໍ່​ເນື່ອງ,ເພີ່ມ​ທະ​ວີ​ໃນ​ການກວດ​ກາ​ການ​ນຳ​ໃຊ້​ແຮງ​ງານ​ຂອງ​ບັນ​ດາ​ຫົວ​ໜ່ວຍ​ແຮງ​ງານ, ການ​ເຂົ້າ​ອອກ​ເມືອງ ແລະ ການ​ອາ​ໃສ​ຢູ່ ຕ້ອງ​ຮັບ​ປະ​ກັນ​ໃຫ້​ສອດ​ຄ່ອງ​ຕາມ​ກົດ​ໝາຍ,ການ​ເຊົ່າ,ຊື້ ທີ່​ດິນ ໂດຍ​ສະ​ເພາະ ເອົາ​ຊື່​ຄົນ​ລາວ​ມາ​ບັງ​ໜ້າ ແມ່ນ​ໃຫ້​ກວດ​ກາ​ລະ​ອຽດ ສາ​ມາດ​ລາຍ​ງານ​ຕໍ່​ການ​ນຳ​ແຕ່​ລະ​ຂັ້ນ​ໄດ້ ແລະ ຊັດ​ເຈນ . ກອງ​ປະ​ຊຸ​ມ​ດັ່ງ​ກ່າວ​ແມ່ນ​ໄດ້​ຈັດ​ຂຶ້ນ ທີ່ ຫ້ອງ​ປະ​ຊຸມ ກອງ​ບັນ​ຊາ​ການ ປກ​ສ ແຂວງ, ເລີ້ມ​ແຕ່​ເວ​ລາ 8:00-12:00 ໂມງ ຂອງວັນ​ທີ 27 .03 . 2019.
Powered by Blogger.