Header Ads

ຮອງນາຍົກລັດຖະມົນຕີແຫ່ງ ສປປ ລາວ ພົບປະໂອ້ລົມພະນັກງານຫຼັກແຫ່ງ ເມືອງໄຊຈຳພອນ

ວັນທີ 26 ກຸມພາ 2019 ທ່ານ ສອນໄຊ ສີພັນດອນ ຮອງນາຍົກລັດມົນຕີແຫ່ງ ສປປ ລາວ ພ້ອມດ້ວຍຄະນະລັດຖະມົນຕີ ໄດ້ລົງພົບປະໂອ້ລົມພະນັກງານຫຼັກແຫ່ງ ເມືອງໄຊຈຳພອນ ໂດຍການນຳພາຂອງ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ມີ ທ່ານ ຄຳພັດ ສຸລິຂັນ ເຈົ້າເມືອງຄຳເກີດ ພ້ອມດ້ວຍຄະນະ ໃຫ້ກຽດຕ້ອນຮັບຢ່າງອົບອຸ່ນ.

ໂອກາດນີ້ ທ່ານ ຄຳພັດ ສຸລິຂັນ ເຈົ້າເມືອງໄຊຈຳພອນ ໄດ້ລາຍງານຫຍໍ້ສະພາບໂດຍລວມຂອງເມືອງ ໃນນັ້ນເມືອງໄຊຈຳພອນ ແມ່ນ 1 ໃນ 7 ເມືອງຂອງແຂວງ ເປັນເມືອງພູດອຍ ກວມ 95% ເປັນເຂດທີ່ໝັ້ນຂອງການປະຕິວັດຊາດປະຊາທິປະໄຕໃນເມື່ອກ່ອນ, ເປັນຖີ່ນກຳເນີດຂອງ ທ່ານ ສີສົມພອນ ລໍວັນໄຊ ອະດີດກົມການເມືອງ ສູນກາງພັກ ຮຸ່ນທຳອິດຂອງການປະຕິວັດລາວ ມາໃນປີ 2009 ໄດ້ຮັບການສ້າງຕັ້ງເມືອງຂຶ້ນຢ່າງເປັນທາງການ ຄະນະບໍລິຫານງານພັກເມືອງ ໄດ້ສູມໃສ່ການຈັດຕັ້ງຜັນຂະຫຍາຍມະຕິແຕ່ລະຂັ້ນຢ່າງເຂັ້ມງວດ.



ມາຮອດປີ 2018 ສາມາດຈັດເກັບລາຍຮັບເຂົ້າງົບປະມານສາມາດລື່ນແຜນ 16 ສ່ວນຮ້ອຍ, ສະເລ່ຍລາຍຮັບເທົ່າກັບ 849 ໂດລາຕໍ່ຄົນຕໍ່ປີ ຫຼື ເທົ່າ 81,62 ສ່ວນຮ້ອຍ, ມີຄອບຄົວພົ້ນທຸກແລ້ວ 1.510 ຄອບຄົວ ໃນຈຳນວນ 1.814 ຄອບຄົວທັງໝົດໃນທົ່ວເມືອງ, ຍັງເຫຼືອ 601 ຄອບຄົວ, ການຊົມໃຊ້ວິດຖ່າຍກວມເອົາ 81 ສ່ວນຮ້ອຍ, ພື້ນຖານໂຄງລ່າງໄດ້ຮັບການພັດທະນາ ແຕ່ຍັງບໍ່ສາມາດຕອບສະໜອງໄດ້ເປັນຕົ້ນແມ່ນ ເສັ້ນທາງບ້ານຕໍ່ບ້ານ, ບ້ານຫາເມືອງ, ເມືອງຫາເມືອງ ແມ່ນສາມາດທ່ຽວໄດ້ແຕ່ລະດູແລ້ງ, ສຳລັບລະດູຝົນແມ່ນຖືກຕັດຂາດບໍ່ສາມາດສັນຈອນໄດ້ ເປັນສາເຫດຫຼັກເຮັດໃຫ້ການພັດທະນາເສດຖະກິດ-ສັງຄົມບໍ່ບັນລຸໄດ້ຕາມແຜນການທີ່ວາງໄວ້.







ນອກນັ້ນວຽກງານປີ່ນອ້ອມເປັນຕົ້ນແມ່ນ ໂທລະຄົມ ແລະ ການສື່ສານ, ການສຶກສາ, ສາທາລະນະສຸກ ຍັງບໍ່ຕອບສະໜອງໄດ້ເທົ່າທີ່ຄວນ.
ພະນັກງານ-ລັດຖະກອນ ໄດ້ຮັບການຍົກລະດັບ ເພື່ອສືບຕໍ່ທິດທາງແຜນການດ້ານການພັດທະນາເສດຖະກິດ-ສັງຄົມໃນສະເພາະໜ້ານັ້ນ ໂດຍສະເພາະແມານການຍົກຍ້າຍສຳນັກເມືອງ ໄປຢູ້ນໍ້າອ້ອນນັ້ນບັນດາຕາງໜ້າພະແນກການຂອງທີ່ກ່ຽວຂ້ອງ ຍັງໄດ້ປະກອບຄຳເຫັນສະເໜີຕໍ່ຮອງນາຍົກຫຼາຍບັນຫາ ເປັນຕົ້ນແມານ ເສັ້ນທາງຄົມມະນາຄົມ ຈາກສຳນັກເມືອງຫາຊາຍແດນ ສສ ຫວຽດນາມ, ຈາກເທດສະບານຕົວເມືອງຫາຕົວເມືອງໃກ້ຄຽງໃຫ້ມີຄວາມສະດວກສະບາຍ, ລະບົບໂທລະຄົມ, ບຸກຄະລາກອນ ແລະ ອຸປະກອນການແພດ, ຕາໜ່າງການສຶກສາ, ຂະຫຍາຍຕາໜ່າງໄຟຟ້າສູ່ອາຄານ, ພ້ອມຮັບຟັງການປະກອບຄຳເຫັນຈາກບັນດາທ່ານ ທີ່ຕາງໜ້າກະຊວງຈຳນວນໜຶ່ງຕື່ມອີກ.




ໂອກາດນີ້ ຮອງນາຍົກ ລັດຖະມົນຕີ ໄດ້ຕີລາຄາຍ້ອງຍໍຊົມເຊີຍຜົນງານການຊີ້ນຳ-ນຳພາຂອງອົງຄະນະພັກແຕ່ລະຂັ້ນ, ແຕ່ລະສະໄໝ ທີ່ສາມາດຍາດໄດ້ຜົນງານອັນໃຫຍ່ຫຼວງຕະຫຼອດໄລຍະຜ່ານມາ, ພ້ອມຮັບເອົາຄຳສະເໜີໄປພິຈາລະນາເພື່ອເຮັດໃຫ້ແຜນພັດທະນາເສດຖະກິດ-ສັງຄົມໃນທ້ອງຖີ່ນໄດ້ຮັບການພັດທະນາເສດຖະກິດ-ສັງຄົມໃຫ້ບັນລຸຕາມແຜນການລືນແຜນການ, ເຕົ້າໂຮມຄວາມມັກຄີປອງດອງເປັນປືກແຜ່ນ, ປົກປັກຮັກສາຊັບພະຍາກອນທຳມະຂາດ, ເຂັ້ມງວດເລກທີ 15/ນຍ, ຕີຕ້ານທຸກປະກົດການຫຍໍ້ທໍ້ໃນສັງຄົມໃຫ້ໝົດໄປ. ໂອກາດທີ່ທ່ານຮອງນາຍົກໄດ້ລົງມາພົບປະໂອ້ລົມໃນຄັ້ງນີ້ ຍັງໄດ້ນຳເອົາເງິນສົດຈຳນວນ 30.000.000 ກີບມາມອບໃຫ້ເມືອງ ແລະ ເຄື່ອງນຸ່ງຮົ່ມຈຳນວນໜຶ່ງຕື່ມອີກ. ຈາກນັ້ນໃນເວລາຕໍ່ມາຂອງວັນດຽວກັນ ຮອງນາຍົກ ພ້ອມດ້ວຍຄະນະຈາກສູນກາງ ແລະ ແຂວງ ຍັງໄດ້ລົງຢ້ຽມຢາມເຮືອນຈຳລອງຂອງ ທ່ານ ສີສົມພອນ ລໍວັນໄຊ ຜູ້ນຳຮຸ່ນທຳອິດຂອງການປະຕິວັດລາວເຮົາ.

No comments

Powered by Blogger.