Header Ads

ຈັບໝົດຄອບຄົວ ຮ່ວມກັນຜະລິດຢາບ້າຢູ່ເຮືອນ ທີ່ ບ້ານນາແສນຄໍາ ເມືອງໄຊ

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງອຸດົມໄຊ ໄດ້ນໍາກໍາລັງເຂົ້າມ້າງຈຸດຄ້າຂາຍຢາເສບຕິດ ຢູ່ສວນບ້ານນາແສນຄໍາ ເມືອງໄຊ ແຂວງອຸດົມໄຊ ໃນວັນທີ 25 ກຸມພາ 2019 ຫຼັງສືບຮູ້ມີກຸ່ມຄົນຈໍານວນໜຶ່ງນໍາເອົາຢາເສບຕິດເປັນຈໍານວນຫຼາຍ ມາຊຸກເຊື່ອງໄວ້ຢູ່ສວນ.

ຜ່ານການປະຕິບັດການ ສາມາດຢຶດຢາບ້າ ຈໍານວນ 81.209 ເມັດ, ຢາໄອສ໌ ຈຳນວນ 2 ຖົງ, ແປ້ງຝຸ່ນສີຂາວ ນໍ້າໜັກ 3 ກິໂລກຼາມ, ແປ້ງຝຸ່ນສີແດງ ນໍ້າໜັກ 500 ກຼາມ, ຈັກອັດຢາບ້າຈໍານວນ 1 ເຄື່ອງ ພ້ອມທັງກັກຕົວຜູ້ຖືກຫາ ໄດ້ 4 ຄົນ.

ເຈົ້າໜ້າທີ່ໃຫ້ຮູ້ວ່າ: ໃນເບື້ອງຕົ້ນແມ່ນ ໄດ້ສືບຮູ້ວ່າ ທ້າວ ໄຊວື ອາຍຸ 52 ປີ ບ້ານນາແສນຄໍາ ໄດ້ນໍາເອົາຢາເສບຕິດຈໍານວນຫຼາຍ ມາຊຸກເຊື່ອງໄວ້ຢູ່ສວນ;

ຈາກນັ້ນ, ຈຶ່ງນໍາກໍາລັງເຂົ້າກັກຕົວພ້ອມທັງກວດຄົ້ນເຮືອນ ພົບເຫັນຢາບ້າ ຈໍານວນ 9 ເມັດ ຊຸກເຊື່ອງໄວ້ໃນສາຍຮັດແອວຂອງ ນາງ ລີວາ ເມຍຂອງຜູ້ກ່ຽວ, ເຈົ້າໜ້າທີ່ຈຶ່ງໄດ້ສອບຢ່າງລະອຽດ ພວກກ່ຽວສາລະພາບວ່າ: ຍັງມີຢາເສບຕິດອີກເປັນຈໍານວນຫຼວງຫຼາຍທີ່ຝາກໄວ້ຢູ່ສວນແຄມບ້ານ ໂດຍໃຫ້ ນາງ ຈົວລີ ເປັນຄົນເຝົ້າ.

ຈາກນັ້ນ, ຈຶ່ງໄປກວດຄົ້ນຢູ່ສວນດັ່ງກ່າວ ພົບເຫັນຢາບ້າ ຈໍານວນ 40 ມັດ ແລະ 6 ຖົງນ້ອຍ ເທົ່າກັບ 81.209 ເມັດ, ມີນໍ້າໜັກ 10,5 ກິໂລກຼາມ, ຢາໄອສ໌ ຈຳນວນ 2 ຖົງ ມີນໍ້າໜັກ 2 ກິໂລກຼາມ, ແປ້ງຝຸ່ນສີຂາວມີ ນໍ້າໜັກ 3 ກິໂລກຼາມ, ແປ້ງຝຸ່ນສີແດງ ນໍ້າໜັກ 500 ກຼາມ, ຈັກອັດຢາບ້າ ຈຳນວນ 1 ເຄື່ອງ ແລະ ຖົງຢາງບັນຈຸຢາບ້າ ຈຳນວນ (1 ເປົາ) ນໍ້າໜັກ 3,8 ກິໂລກຼາມ.

ຜ່ານການມ້າງກຸ່ມຄ້າຂາຍຢາເສບຕິດຄັ້ງນີ້, ເຈົ້າໜ້າທີ່ ສາມາດຈັບຕົວຖືກຫາ 4 ຄົນ ຊື່ ທ້າວ ໄຊ ວື ອາຍຸ 52 ປີ, ນາງ ລີວາ ອາຍຸ 45 ປີ ( ຜົວ-ເມຍ), ນາງ ຈົວລີ ອາຍຸ 41 ປີ ແລະ ທ້າວ ດາວັນ ອາຍຸ 18 ປີ ທັງ 4 ຄົນ ຢູ່ບ້ານນາແສນຄຳ ເມືອງໄຊ ແຂວງອຸດົມໄຊ ແລະ ຍັງສືບຕໍ່ຂະຫຍາຍຜົນໃນການດໍາເນີນຄະດີ.

ຂອບໃຈຂໍ້ມູນຈາກ: ນສພ ຄວາມສະຫງົບ

No comments

Powered by Blogger.