Header Ads

ສານປະຊາຊົນ ແຂວງເຊກອງ ປະກາດການຈັດຕັ້ງ

• ຂ່າວ : ສັນຍາ
ເພື່ອແນໃສ່ຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ແລະເຮັດໃຫ້ການຈັດຕັ້ງປະຕິບັດວຽກງານໃນຂົງເຂດຍຸຕິທໍາສືບຕໍ່ດໍາເນີນໄປຢ່າງເຂັ້ມແຂງ, ມີຄວາມໂປ່ງໃສ່ຖືກຕ້ອງຕາມກົດໝາຍ ແລະຮັບປະກັນຄວາມຍຸຕິທຳແກ່ສັງຄົມ, ແຂວງເຊກອງ ຈຶ່ງໄດ້ມີການປະກາດແຕ່ງຕັ້ງຮອງປະທານສານປະຊາຊົນແຂວງ ແລະປະທານສານປະຊາຊົນເຂດ I.


ພິທີດັ່ງກ່າວໄດ້ຈັດຂຶ້ນໃນວັນທີ 14 ມີນາ 2019 ທີ່ສະໂມສອນສະພາປະຊາຊົນແຂວງ ໂດຍມີທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດ, ທ່ານ ສົມຈິດ ວໍລະວົງ ປະທານສານປະຊາຊົນແຂວງເຊກອງ, ພ້ອມນີ້ ມີຄະນະເລຂາທິການສະພາປະຊາຊົນແຂວງ, ຮອງຫົວໜ້າພະແນກ, ຫ້ອງການ, ອົງການທຽບເທົ່າ, ບໍລິສັດລັດວິສາຫະກິດ ແລະວິຊາການກ່ຽວຂ້ອງເຂົ້າຮ່ວມ.


ທ່ານ ອຸໄທ ສີວິໄລ ຫົວໜ້າພະແນກບໍລິຫານ-ນະໂຍບາຍ, ກົມຈັດຕັ້ງ-ພະນັກງານ, ສານປະຊາຊົນສູງສຸດໄດ້ຜ່ານມະຕິຕົກລົງຂອງຄະນະປະຈໍາສະພາແຫ່ງຊາດ ວ່າດ້ວຍການແຕ່ງຕັ້ງຮອງປະທານສານປະຊາຊົນແຂວງເຊກອງ ແລະແຕ່ງຕັ້ງປະທານສານປະຊາຊົນເຂດ I ແຂວງເຊກອງ ໂດຍຄະນະປະຈໍາສະພາເຫັນດີຕົກລົງແຕ່ງຕັ້ງທ່ານ ຄໍາພົນ ແກ້ວປະເສີດ, ປະທານສານປະຊາຊົນເຂດ I ແຂວງເຊກອງເປັນຮອງປະທານສານປະຊາຊົນແຂວງເຊກອງ ແລະເຫັນດີແຕ່ງຕັ້ງທ່ານ ເຊິນ ດິນຍະວົງ ເປັນປະທານສານປະຊາຊົນເຂດ I ແຂວງເຊກອງ.


ໃນໂອກາດເຂົ້າຮ່ວມທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດ ກໍໄດ້ມີຄໍາເຫັນໂອ້ລົມ ໂດຍໄດ້ຍົກໃຫ້ເຫັນເຖິງພາລະບົດບາດ, ສິດ ແລະໜ້າທີ່ຂອງສານປະຊາຊົນ, ນອກນັ້ນ ທ່ານຍັງໄດ້ຍ້ອງຍໍຊົມເຊີຍ ແລະເນັ້ນໜັກຜູ້ທີ່ໄດ້ຮັບການແຕ່ງຕັ້ງຈົ່ງອຸ່ນອ່ຽງທຸ່ນທ່ຽງໃນການປະຕິບັດໜ້າທີ່ວຽກງານ ແລະເອົາໃຈໃສ່ວຽກງານສຶກສາອົບຮົມການເມືອງນໍາພາແນວຄິດໃຫ້ຖັນແຖວພະນັກງານ-ສະມາຊິກພັກຢ່າງຕັ້ງໜ້າ ແນໃສ່ເຮັດໃຫ້ພະນັກງານມີວິໄນ, ມີຈັນຍາບັນ ແລະຈັນຍາທໍາ, ຕີຖອຍປະກົດການຫຍໍ້ທໍ້ຕ່າງໆໃນຂະແໜງການຍຸຕິທໍາ, ພ້ອມທັງ ເອົາໃຈໃສ່ຕິດຕາມກວດກາການປະຕິບັດໜ້າທີ່ໃນຂົງເຂດວຽກງານທີ່ຕົນຮັບຜິດຊອບໃຫ້ເປັນປະຈໍາ ແລະເປັນປົກກະຕິຕໍ່ເນື່ອງ ເພື່ອແນໃສ່ເຮັດໃຫ້ການປະຕິບັດໜ້າທີ່ວຽກງານມີປະສິດທິພາບ ແລະປະສິດທິຜົນດີຂຶ້ນເລື້ອຍໆ.

No comments

Powered by Blogger.