Header Ads

ອານຸບານ ບ້ານກົກງິ້ວເປັນໂຮງຮຽນຕົວເເບບດ້ານການບໍລິຫານ-ຄຸ້ມຄອງລະດັບແຂວງ ແຫ່ງທຳອິດ ຂອງແຂວງຫຼວງພະບາງ

ໂຮງຮຽນອະນຸບານ ບ້ານກົກງິ້ວ ນະຄອນຫຼວງພະບາງເປັນໂຮງຮຽນຕົວເເບບດ້ານການບໍລິຫານ-ຄຸ້ມຄອງລະດັບແຂວງ ແຫ່ງທຳອິດ ຂອງແຂວງຫຼວງພະບາງເມື່ອວັນທີ 13 ມີນາ ຜ່ານມາທີ່ໂຮງຮຽນອະນຸບານດັ່ງກ່າວໄດ້ມີພິທີປະກາດໂຮງຮຽນໂຮງຮຽນອະນຸບານ ບ້ານກົກງິ້ວເປັນໂຮງຮຽນຕົວເເບບດ້ານການບໍລິຫານ-ຄຸ້ມຄອງລະດັບແຂວງ ໂດຍພາຍໃຕ້ການເປັນປະທານຂອງທ່ານ ສົມລິດ ຈັນທະມາລີ ຮອງຫົວໜ້າພະແນກສຶກສາທິການ ແລະ ກິລາແຂວງ,ທ່ານ ບຸນລຽງ ແກ້ວມະນີ ປະທານກວດກາພັກ-ລັດ ນະຄອນຫຼວງພະບາງ,ມີ ທ່ານຫົວໜ້າ-ຮອງຫົວໜ້າຫ້ອງການສຶກສາທິການ ແລະ ກິລານະຄອນຫຼວງພະບາງ,ຜູ້ອຳນວຍການໂຮງຮຽນ,ເຖົ້າແກ່ແນວໂຮມ,ນາຍບ້ານ,ຄະນະພັກກຸ່ມ,ຄູ-ອາຈານ ນ້ອງນັກຮຽນ,ແຂກຖືກເຊີນ ຕະຫຼອດຮອດພໍ່ແມ່ປະຊາຊົນ ເຂົ້າຮ່ວມຢ່າງພ້ອມພຽງ.



ໃນພິທີ ທ່ານນາງ ຈັນທີ ສິດທິໂສມ ຜູ້ອຳນວຍການໂຮງຮຽນ ອານຸບານບ້ານກົກງິ້ວໄດ້ກ່າວໃຫ້ຮູ້ວ່າ: ບ້ານກົກງິ້ວໄດ້ຖືກສ້າງຕັ້ງຂື້ນໃນຊຸມປີ 1935 ມີເນື້ອທີ່ທັງໝົດ 1.149 ເຮັກຕາ,ເຊິ່ງເປັນບ້ານເຕົ້າໂຮມຂອງຊົນເຜົ່າ ລາວໄຕ,ມອນຂະແມ ແລະ ມົ້ງອິ້ວມຽນ,ມີ 204 ຄອບຄົວ,ມີປະຊາກອນທັງໝົດ 1.062 ຄົນຍິງ 517 ຄົນ ປະຊາຊົນສ່ວນໃຫຍ່ມີອາຊີບເປັນຊາວກະສິກອນ,ປູກຝັງລ້ຽງສັດ,ປູພືດເປັນສິນຄ້າ,ມີຄອບຄົວເຫຼືອກິນ 52 ຄອບຄົວ,ກຸ້ມກິນ 152 ຄອບຄົວ,ລາຍຮັບສະເລ່ຍຕໍ່ຄົນໄດ້ 9.600.000 ກີບຕໍ່ຄົນຕໍ່ປີ,ປະກາດໄດ້ເປັນບ້ານປອດຄະດີ,ບ້ານສາທາລະນະສຸກ,ບ້ານປອດໃສ ເຂັ້ມແຂງໜັກແໜ້ນ,ບ້ານແມ່ຍິງ 3 ດີ ແລະ ຊຸມໜຸ່ມ 4 ບຸກ,ໂຮງຮຽນແຫ່ງນີ້ໄດ້ສ້າງຕັ້ງຂື້ນໃນສົກປີ 2005-2006 ເບື້ອງຕົ້ນເປັນຫ້ອງກຽມປະຖົມມີ 1 ຫ້ອງ,ຄູ 1 ຄົນ,ຍິງ 1 ຄົນມີນັກຮຽນເກນອາຍຸ 5 ປີ 25ຄົນ,ຍິງ 15 ຄົນເຊິ່ງຂື້ນກັບໂຮງຮຽນປະຖົມກົກງິ້ວ ມາຮອດສົກຮຽນ 2016 ໄດ້ຂະຫຍາຍຫ້ອງຮຽນໃໝ່ ແລະ ໄດ້ຮັບທຶນປຸກສ້າງຈາກໂຄງການມູນນິທິສໍແຫ່ງຄວາມຫວັງ ແລະ ທຶນສົມທົບຂອງຊຸມຊົນຈຳນວນ 2 ຫ້ອງ,1 ຫ້ອງການ,ປະຈຸບັນມີທັງໝົດ 5 ຫ້ອງ,1 ຫ້ອງການ, 3ຫ້ອງຮຽນ ແລະ 1 ຫ້ອງນ້ຳ,ມີຄູອາຈານທັງໝົດ 6 ຄົນ,ຍິງ 6 ຄົນ ໃນນັ້ນຄູອາສາສະໝັກ 2 ຄົນ, ມີນັກຮຽນໃນເກນອາຍຸອານຸບານ 1-ອານຸບານ3 ທັງໝົດ 63ນ້ອງ,ຍິງ 37ນ້ອງ.


ໂອກາດດັ່ງກ່າວ, ທ່ານ ສົມລິດ ຈັນທະລີ ໄດ້ມີກ່າວສະແດງຄວາມຍ້ອງຍໍຊົມເຊີຍຕໍ່ຜົນສຳເລັດອັນຍິ່ງໃຫຍ່ທາງໂຮງຮຽນຍາດມາໄດ້ພ້ອມທັງຮຽກຮ້ອງມາຍັງທຸກພາກສ່ວນ ຈົ່ງໄດ້ໃຫ້ການຊຸກຍູ້ຊ່ວຍເຫຼືອ ສະໜັບສະໜູນ ເອົາໃຈໃສ່ແນະນຳຊ່ວຍຄູໃນການສ້າງໃຫ້ໄດ້ຄູຕຳແໜ່ງວິຊາການ,ຄູສອນຕ້ອງໄດ້ເພີ່ມທະວີຄວາມຮັບຜິດຊອບໃນການສິດສອນຂອງຕົນ,ສ່ວນອຳນວຍການຕ້ອງໄດ້ປະຕິບັດໃນການນິເທດພາຍໃນໃຫ້ເປັນປົກກະຕິ ເພື່ອພ້ອມກັນເສີມຂະຫຍາຍມູນເຊື້ອອັນດີງາມນີ້ໄວ້ໃຫ້ຍືນຍົງຕະຫຼອດໄປ ພ້ອມດຽວກັນນີ້ທ່ານຍັງໄດ້ໃຫ້ກຽດມອບໃບຢັ້ງຢືນ ແລະ ໃບຍ້ອງຍໍຂອງທ່ານຫົວໜ້າພະແນກສຶກສາທິການ ແລະ ກິລາແຂວງໃນການຢັ້ງຢືນ ໂຮງຮຽນອະນຸບານກົກງິ້ວ ເປັນໂຮງຮຽນຕົວແບບລະດັບແຂວງ ດ້ານການບໍລິຫານ-ຄຸ້ອມຄອງ ຈາກນັ້ນໄດ້ຮ່ວມເປີດປ້າຍ ແລະ ປະກາດຢ່າງເປັນທາງການ.


ໂດຍ: ແຈັກກີ້ ສກຂ ຫຼວງພະບາງ.

No comments

Powered by Blogger.