Header Ads

ໄຊຍະບູລີ-ເຊີນລາ ສືບຕໍ່ຮັດແຫນ້ນການຮ່ວມມືຮອບດ້ານ

ໃນວັນທີ 12 ມີນາ 2019, ທີ່ຫ້ອງປະຊຸມຂອງຫ້ອງວ່າການແຂວງເຊິນລາ, ສສ ຫວຽດນາມ, ໄດ້ຈັດກອງປະຊຸມພົບປະລະຫວ່າງຜູ້ແທນ ແຂວງ ເຊີນລາ ແລະ ຄະນະຜູ້ແທນແຂວງ ໄຊຍະບູລີ, ໂດຍຄະນະຜູ້ແທນແຂວງ ໄຊຍະບູລີ ແມ່ນນໍາໂດຍ ທ່ານ ພົງສະຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ, ແລະ ຝ່າຍແຂວງ ເຊິນລາ ແມ່ນນໍາໂດຍ ທ່ານຮວາງ ວັນ ເຈີດ, ເລຂາພັກແຂວງ, ປະທານສະພາ ປະຊາຊົນແຂວງເຊີນລາ ພ້ອມດ້ວຍຄະນະຂອງທັງ ສອງແຂວງເຂົ້າຮ່ວມຢ່າງພ້ອມພຽງ.


ໃນວາລະດໍາເນີກອງປະຊຸມ ການນໍາຂອງທັງສອງແຂວງ ໄດ້ລາຍງານໃຫ້ກັນຊາບເຖິງສະພາບການຂະຫຍາຍຕົວທາງດ້ານເສດຖະກິດ-ສັງຄົມຂອງແຕ່ລະຝ່າຍ, ໂດຍໃນປີຜ່ານມາ, ແຂວງເຊີນລາ ແມ່ນມີລະດັບການເຕີບໂຕດ້ານລວມຍອດຜະລິດຕະພັນບັນລຸ 8,59%, ລາຍຮັບງົບປະມານພາຍໃນແຂວງບັນລຸ 5.030 ຕື້ດົງ, ແລະລາຍຮັບສະເລ່ຍຕໍ່ຫົວຄົນ ບັນລຸ 38 ລ້ານດົງຕໍ່ຄົນຕໍ່ປີ.
ສໍາລັບແຂວງ ໄຊຍະບູລີ ແມ່ນອີງໃສ່ 3 ທ່າແຮງຕົ້ນຕໍໃນການພັດທະນາເປັນຕົ້ນແມ່ນ: ດ້ານກະສິກໍາ ແລະ ປ່າໄມ້ຕິດພັນກັບການປຸງແຕ່ງ, ດ້ານອຸດສາຫະກໍາໄຟຟ້າ ແລະ ດ້ານການບໍລິການດ້ານການຄ້າ ແລະ ການທ່ອງທ່ຽວ,; ເມື່ອປີຜ່ານມາ, ເສດຖະກິດຂອງແຂວງສືບຕໍ່ຂະຫຍາຍຕົວໃນລະດັບ 8,7%, ລວມຍອດຜະລິດຕະພັນພາຍໃນ ບັນລຸໄດ້ 9,555 ຕື້ກີບ, ສະເລ່ຍໃສ່ຫົວຄົນໜຶ່ງເທົ່າກັບ 2,510 ໂດລາສະຫະລັດ, ແລະ ລາຍຮັບຂອງແຂວງ ລວມທັງພູດສູນກາງປະຕິບັດໄດ້ 863,30 ຕື້ກີບ.


ໃນໂອກາດດັ່ງກ່າວ ທ່ານ ພົງສະຫວັນ ສິດທະວົງ ກໍ່ໄດ້ກ່າວຂອບໃຈຕໍ່ການນໍາຂອງແຂວງ ເຊີນລາທີ່ໄດ້ໃຫ້ການຊ່ວຍເຫຼືອແຂວງ ໄຊຍະບູລີ ຢ່າງສະເຫມີມາ, ໂດຍສະເພາະ ແມ່ນ ຊ່ວຍສ້າງອາຄານການຮຽນ-ການສອນ ແລະ ສ້າງຊັບພະຍາກອນມະນຸດ.


ໃນການພົບປະຄັ້ງນີ້, ສອງຝ່າຍຍັງໄດ້ພ້ອມກັນຕີລາຄາສະພາບການພົວພັນຮ່ວມມື ໃນສົກປີ 2016-2018 ຜ່ານມາ ແລະ ກໍານົດແຜນການຮ່ວມມື ສົກປີ 2019-2021 ແລະ ເປັນເອກະພາບກັນໃນຫລາຍປະເດັນເຊັ່ນ: ສືບຕໍ່ຮ່ວມມືກັນດ້ານຂົງເຂດການເມືອງ, ກະສິກໍາ ແລະ ປ່າໄມ້, ການຄ້າ ແລະ ການລົງທຶນ, ສົມທົບທືນເພື່ອການກໍ່ສ້າງພື້ນຖານໂຄງລ່າງ, ລວມທັງໃນຂົງເຂດການສືກສາ ແລະ ຊັບພະຍາກອນມະນຸດ, ແລະວຽກງານປ້ອງກັນຊາດ-ປ້ອງກັນຄວາມສະຫງົບ, ໂດຍໄດ້ມອບໃຫ້ພະແນກການທີ່ກ່ຽວຂ້ອງຂອງທັງສອງແຂວງຮ່ວມກັນຈັດຕັ້ງປະຕິບັດໃຫ້ໄດ້ຮັບໝາກຜົນເປັນກ້າວໆ.


ຈາກນັ້ນ, ກໍ່ໄດ້ມີການລົງນາມຮ່ວມກັນໃນບົດບັນທຶກການຮ່ວມມືຢ່າງເປັນທາງການ, ໂດຍຝ່າຍແຂວງ ໄຊຍະບູລີ ແມ່ນ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ແລະ ຝ່າຍແຂວງ ເຊີນລາ ແມ່ນ ທ່ານ ນາງ ເຍີຍທິເຟືອງ ກໍາມະການພັກແຂວງ, ຮອງປະທານສະພາປະຊາຊົນແຂວງ ເຊີນລາ, ໂດຍຊ້ອງຫນ້າ ຄະນະຂອງທັງ ສອງແຂວງເຂົ້າຮ່ວມເປັນສັກຂີພິຍານ.


ໃນໂອກາດດຽວກັນນີ້, ທັງສອງແຂວງ ຍັງໄດ້ແລກປ່ຽນຂອງທີ່ລະນຶກ ແລະ ຖ່າຍຮູບຮ່ວມກັນຕື່ມອີກ.

No comments

Powered by Blogger.