Header Ads

ກະຊວງພານິດເຊີນຊວນຜູ້ປະກອບການລາວເຂົ້າຮ່ວມວາງສະແດງສິນຄ້າ-ອາຫານທີ່ປະເທດໄທ

ກະຊວງພານິດຂອງໄທ ໄດ້ຈັດງານຖະແຫຼງຂ່າວເຊີນຊວນຜູ້ປະກອບການລາວ ເຂົ້າຮ່ວມວາງສະແດງຊື້-ຂາຍສິນຄ້າ ກະສິກຳ, ອາຫານ ແລະເຄື່ອງດື່ມໃນທ້າຍເດືອນພຶດສະພາ-ມິຖຸນາ 2019 ນີ້ ຢ້ຳໃຫ້ບຸລິມະສິດພິເສດລາວຂາຍຟຣີ 10 ຫ້ອງ, ກຳນົດອີກໜຶ່ງອາທິດຂ້າງໜ້າໝົດເຂດຮັບສະໝັກ.




ງານວາງສະແດງສິນຄ້າອາຫານ ແລະເຄື່ອງດື່ມທີ່ຈັດຂຶ້ນລະດັບໂລກ THAIFEX World of Food Asia 2019 ທີ່ປະເທດໄທ ເຊິ່ງມີພື້ນທີ່ຫຼາຍກວ່າ 100.000 ຕາແມັດ ສາມາດບັນຈຸໄດ້ ເກືອບ 6000 ຫ້ອງຂາຍ ໃນສູນວາງສະແດງສິນຄ້າ ແລະການປະຊຸມອິມແພັກ ເມືອງທອງທານີ ແຂວງຊົນບູລີປະເທດໄທ ປີນີ້ເປີດໂອກາດ ແລະເຊີນຊວນນັກທຸລະກິດລາວເຂົ້າຮ່ວມ ວາງສະແດງຂາຍສິນຄ້າ ແລະເຈລະຈາທຸລະກິດກັບຜູ້ຜະລິດ, ສົ່ງອອກ, ຜູ້ນຳເຂົ້າ ແລະຕົວແທນຈຳໜ່າຍສິນຄ້າໃນທຸລະກິດກະສິກຳ, ອາຫານ ແລະເຄື່ອງດື່ມໃນປະເທດໄທ ແລະທົ່ວໂລກຫຼາຍກວ່າ 2.700 ລາຍການ, ງານຈະຈັດຂຶ້ນໃນວັນທີ 28 ພຶດສະພາ-1 ມິຖຸນາ 2019 ທີ່ຈຸມາເຖິງນີ້.




ທ່ານ ວິດທະຍາກອນ ມະນີເນດ ຮອງຫົວໜ້າກົມ ກົມສົ່ງເສີມການຄ້າລະຫວ່າງປະເທດ ກະຊວງພານິດຂອງໄທ ໃນນາມຕາງໜ້າຜູ້ຈັດງານຈາກລັດຖະບານໄທ ໄດ້ກ່າວເຖິງເຫດຜົນທີ່ເຊີນຊວນຜູ້ປະກອບການລາວເຂົ້າຮ່ວມໃນຄັ້ງນີ້ ເພາະງານດັ່ງກ່າວເປັນໂອກາດໃຫ້ນັກທຸລະກິດຈາກຫຼາຍກວ່າ 40 ປະເທດໃນໂລກທີ່ມາຈາກອາຊີຕາເວັນອອກ, ອາຊຽນ, ເອິຣົບ, ອາເມລິກາ, ລາຕິນອາເມລິກາ, ອາຟຣິກາ ພ້ອມໃຈກັນມາວາງສະແດງມີຫຼາຍກວ່າ 2.700 ບໍລິສັດ ຖືເປັນງານວາງສະແດງສິນຄ້າອາຫານ ແລະເຄື່ອງດື່ມທີ່ໃຫຍ່ສຸດໃນອາຊີ ມີມູນຄ່າການຊື້-ຂາຍຫຼາຍກວ່າ 10 ພັນລ້ານບາດ ທີ່ສຳຄັນມີນັກທຸລະກິດຈາກຫຼາຍປະເທດເຂົ້າຮ່ວມຈະສາມາດຕໍ່ຍອດທຸລະກິດໄດ້ເປັນຢ່າງດີ.




ທ່ານຮອງຫົວໜ້າກົມກ່າວອີກວ່າ ລາວມີສິນຄ້າທີ່ຜະລິດຢູ່ພາຍໃນມີຈຸດແຂງ ແລະມີໂອກາດຈະຂະຫຍາຍການຕະຫຼາດເພີ່ມໄດ້ໂດຍຜ່ານງານດັ່ງກ່າວເປັນຕົ້ນ ກາເຟ, ໝາກໄມ້ອົບແຫ້ງ, ຊາຜົ້ງສາລີ, ເບຍລາວ, ເຂົ້າສານຕ່າງໆ ສະນັ້ນຈິ່ງຢາກເຊີນຊວນນັກທຸລະກິດ ແລະຜູ້ສົນໃຈທີ່ປະກອບທຸລະກິດອາຫານ ແລະເຄື່ອງດື່ມຈາກລາວໄປເຂົ້າຮ່ວມ ເພື່ອເບິ່ງຊ່ອງທາງ ແລະໂອກາດທາງທຸລະກິດ ລວມໄປເຖິງການອັບເດດເທຣນສິນຄ້າອາຫານ ແລະເຄື່ອງດື່ມໃໝ່ໆມາພັດທະນາສິນຄ້າຂອງຕົນ.




ທ່ານນາງ ວະຣິສະຣາ ໄນຢະຊິດ ຜູ້ອຳນວຍການໂຄງການ ຜູ້ແທນຈາກບໍລິສັດ Coeinmesse ກ່າວວ່າ: ໃນງານນີ້ນອກຈາກຈະມີການວາງສະແດງສິນຄ້າເຕັກໂນໂລຊີ ແລະບໍລິການທາງດ້ານອາຫານແລ້ວ ຜູ້ເຂົ້າຮ່ວມພາຍໃນງານຍັງໄດ້ອັບເດດສະຖານະການ ແລະເທຣນຂອງນັກຸລະກິດອາຫານ ເຊິ່ງມີຄວາມທັນສະໄໝ ແລະມີນະວະຕະກຳທີ່ໜ້າສົນໃຈຜ່ານກິດຈະກຳພິເສດ ແລະການສຳມະນາທີ່ຈັດຂື້ນຢາງຫຼາກຫຼາຍເປັນຕົ້ນເຕັກໂນໂລຊີໃນທຸລະກິດອາຫານ-ເຄື່ອງດື່ມ, ການອອກແບບໃນກຸ່ມທຸລະກິດອາຫານ, ສົ່ງເສີມການຕະຫຼາດໃນຮູບແບບການສາທິດ ພ້ອມທັງຈັດການສະແດງຜົນງານການພັດທະນາພາຊະນະບັນຈຸ ຫຼື ການຫຸ້ມຫໍ່ຕ່າງໆ.


ນອກນີ້ຍັງຈະມີກິດຈະກຳແຂ່ງຂັນປຸງແຕ່ງອາຫານ, ແກະສະຫຼັກ, ຕົບແຕ່ງອາຫານ, ມີການມອບລາງວັນໃຫ້ 50 ຜະລິດຕະພັນທີ່ໄດ້ຮັບລາງວັນນະວະຕະກຳດີເດັ່ນ ແລະການວາງສະແດງເທຣນອາຫານໂລກ ລ້ວນແຕ່ໜ້າສົນໃຈ ແລະເປັນຜົນດີຕໍ່ຜູ້ປະກອບການທັງນັ້ນ.




ສຳລັບຜູ້ປະກອບການລາວທີ່ສົນໃຈແມ່ນສາມາດຕິດຕໍ່ພົວພັນທ່ານນາງ ຢານີ ສີມີໄຊ ຜູ້ອຳນວຍການສຳນັກງານສົ່ງເສີມການຄ້າໃນຕ່າງປະເທດທີ່ນະຄອນຫຼວງວຽງຈັນ ຜ່ານເບີໂທລະສັບ 021 413701, 413 706, ໃນເບື້ອງຕົ້ນກົມສົ່ງເສີມການຄ້າລະຫວ່າງປະເທດມີຫ້ອງຂາຍນ້ອຍໃຫ້ປະເທດລາວເຮົາຟຣີ 10 ຮ້ານ, ຫາກກາຍ 10 ຮ້ານແລ້ວກໍ່ສາມາດເຂົ້າຮ່ວມໄດ້ຄືກັນແຕ່ຕ້ອງມີຄ່າໃຊ້ຈ່າຍເຊົ່າຫ້ອງ.

No comments

Powered by Blogger.