Header Ads

ປະທານສະພາເນັ້ນ ເມືອງລະມາມ ສຸມແກ້ທຸກຍາກໃຫ້ປະຊາຊົນ



• ຂ່າວ : ນາລີວັນ
       ທ່ານປະທານສະພາແຫ່ງຊາດເນັ້ນໃຫ້ຄະນະພັກ, ອໍານາດການປົກຄອງເມືອງລະມາມ ເພີ່ມທະວີການຫັນລົງກໍ່ສ້າງຮາກຖານການເມືອງ ແລະພັດທະນາຊົນນະບົດຕາມທິດນໍາ 3 ສ້າງ, ທັງນີ້ ກໍເພື່ອສ້າງເງື່ອນໄຂ ແລະສິ່ງອໍານວຍຄວາມສະດວກດ້ານຕ່າງໆໃຫ້ແກ່ປະຊາຊົນບັນດາເຜົ່າພັດທະນາເສດຖະກິດຄອບຄົວໃຫ້ນັບມື້ດີຂຶ້ນ ແລະກ້າວໄປສູ່ການຫຼຸດພົ້ນອອກຈາກຄວາມທຸກຍາກ.
      ວັນທີ 28 ມີນາ 2019 ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແລະພ້ອມຄະນະ ໄດ້ໂອ້ລົມຄະນະພັກ-ອໍານາດການປົກຄອງເມືອງລະມາມ ໂດຍມີທ່ານ ຖາວອນ ພົມມະໄລລຸນ ຮອງເຈົ້າແຂວງໆເຊກອງ, ພ້ອມນີ້ ກໍມີສະມາຊິກສະພາແຫ່ງ (ສສຊ), ສະມາຊິກສະພາປະຊາຊົນແຂວງ (ສສຂ) ແລະພະນັກງານ-ລັດຖະກອນພາຍໃນເມືອງດັ່ງກ່າວຕ້ອນຮັບຢ່າງອົບອຸ່ນ.
       ໃນໂອກາດນີ້ ທ່ານປະທານສະພາແຫ່ງຊາດໄດ້ມີທິດຊີ້ນໍາ ແລະເນັ້ນໜັກໃຫ້ອໍານາດການປົກຄອງເມືອງລະມາມສືບຕໍ່ຮັກສາສະຖຽນລະພາບທາງດ້ານການເມືອງຢ່າງໜັກແໜ້ນ ໂດຍເພີ່ມທະວີຄວາມສາມັກຄີປອງດອງຂອງປະຊາຊົນບັນດາເຜົ່າເປັນປຶກແຜ່ນ, ມີປະຊາທິປະໄຕ ແລະມີຄວາມສະເໝີພາບຕໍ່ໜ້າກົດໝາຍ, ປະກອບສ່ວນຢ່າງຕັ້ງໜ້າໃນການສ້າງລັດທີ່ປົກຄອງດ້ວຍກົດໝາຍ ຕາມຫຼັກການທີ່ວ່າ “ ພັກນໍາພາຕາມກົດໝາຍ, ລັດຄຸ້ມຄອງສັງຄົມດ້ວຍກົດໝາຍ ແລະປະຊາຊົນເປັນເຈົ້າສະເໝີພາບຕໍ່ໜ້າກົດໝາຍ ”.



      ຄຽງຄູ່ກັນນີ້ ກໍຕ້ອງເພີ່ມທະວີໃນການສຶກສາອົບຮົມການເມືອງ-ນໍາພາແນວຄິດ ໄປພ້ອມໆກັບການປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ມີຄວາມໜັກແໜ້ນ ແລະເຂັ້ມແຂງ, ສືບຕໍ່ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະລຶບລ້າງຄວາມທຸກຍາກຕິດພັນກັບວຽກງານ 3 ສ້າງຕາມມະຕິ 03 ຂອງກົມການເມືອງສູນກາງພັກວາງອອກໃຫ້ມີປະສິດທິພາບ, ປະສິດທິຜົນສູງຂຶ້ນ, ປະຕິບັດເປົ້າໝາຍສະຫະສະວັດດ້ານການພັດທະນາ ແລະຊຸກຍູ້ສົ່ງເສີມປະຊາຊົນຜະລິດກະສິກໍາ (ປູກຝັງ-ລ້ຽງສັດ) ເປັນສິນຄ້າໃຫ້ນັບມື້ນັບກວ້າງຂວາງ ແລະເປັນຂະບວນຟົດຟື້ນ, ທັງນີ້ ກໍເພື່ອແນໃສ່ສ້າງພື້ນຖານເສດຖະກິດໃຫ້ມີຄວາມເຂັ້ມແຂງ ແລະປະຊາຊົນມີຊີວິດການເປັນຢູ່ດີຂຶ້ນ.


 ພ້ອມດຽວກັນນີ້ ກໍ່ຕ້ອງສ້າງຄະນະນໍາຂອງເມືອງໃຫ້ມີຄວາມເຂັ້ມແຂງທາງດ້ານການບໍລິການລັດ ເພື່ອໃຫ້ເມືອງເປັນອົງການທີ່ມີຄວາມສາມາດໃນການນໍາພາຂັ້ນບ້ານໄດ້ຢ່າງມີປະສິດທິຜົນ, ເອົາໃຈໃສ່ສ້າງບ້ານພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍ ໂດຍສຸມໃສ່ແກ້ໄຂບັນຫາເສັ້ນທາງໃຫ້ມີຄວາມສະດວກໂລ່ງລ່ຽນ, ສ້າງໂຄງການພັດທະນາຢູ່ຂັ້ນບ້ານ, ກວດກາບັນດາຄອບຄົວທຸກຍາກ ແລະດຶງເຂົ້າໄປຮ່ວມຢູ່ໃນແຕ່ລະໂຄງການ ເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.



       ດ້ານທ່ານ ຂັນຕີ ສີລະວົງສາ ເຈົ້າເມືອງໆລະມາມ ກໍໄດ້ລາຍງານບາງສະພາບຈຸດພິເສດຂອງເມືອງວ່າ: ເມືອງລະມາມມີເນື້ອທີ່ການປົກຄອງທັງໝົດ193.500 ເຮັກຕາ, ເປັນເມືອງໜຶ່ງຂອງແຂວງເຊກອງທີ່ມີຄວາມອຸດົມສົມບູນໄປດ້ວຍຊັບພະຍາກອນແຮ່ທາດ, ປະກອບດ້ວຍ 43 ບ້ານ 7.888 ຄອບຄົວ, ມີພົນລະເມືອງທັງໝົດ 38.185 ຄົນ, ຍິງ 18.823 ຄົນ, ໂດຍໃນປີ 2018 ຜ່ານມາ ຈັ່ງຫວະການຂະຫຍາຍຕົວຂອງເສດຖະກິດສະເລ່ຍຢູ່ໃນລະດັບ 10,14% ແລະລວມຍອດຜະລິດຕະພັນພາຍໃນ (GDP) ບັນລຸໄດ້ 466 ຕື້ກວ່າກີບ, ສະເລ່ຍໃສ່ຫົວຄົນເທົ່າກັບ 12 ລ້ານກວ່າກີບຕໍ່ຄົນຕໍ່ປີ, ປະຈຸບັນທົ່ວເມືອງມີບ້ານທຸກຍາກ 4 ບ້ານກວມເອົາ 9,3% ແລະມີຄອບຄົວທຸກຍາກ 625 ຄອບຄົວກວມເອົາ 7,9% ຂອງຄອບຄົວທັງໝົດໃນທົ່ວເມືອງ



         ໃນວັນດຽວກັນນີ້ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມຄະນະ ແລະການນໍາຂອງແຂວງ, ເມືອງລະມາມ ຍັງໄດ້ລົງຢ້ຽມຢາມ ແລະພົບປະໂອ້ລົມ ປະຊາຊົນບ້ານນາວາແກ້ງຫຼວງຕື່ມອີກ.

No comments

Powered by Blogger.