Header Ads

ໜ່ວຍພັກໂຮງຮຽນ ມສ ເມືອງໝໍ ເມືອງແກ່ນທ້າວ ດໍາເນີນກອງປະຊຸມໃຫຍ່ ຄັ້ງທີ່ III ຂອງຕົນ



ກອງປະຊຸມໃຫຍ່ ຄັ້ງທີ III ຂອງໜ່ວຍພັກໂຮງຮຽນມັດທະຍົມສົມບູນເມືອງໝໍ ເມືອງແກ່ນທ້າວ ແຂວງໄຊຍະບູລີ ໄດ້ຈັດຂືຶ້ນໃນຕອນແລງວັນທີ 21 ມີນາ 2019 ນີ້, ຢູ່ທີ່ໂຮງຮຽນດັ່ງກ່າວ. ໂດຍການເປັນກຽດເຂົ້າຮ່ວມຂອງສະຫາຍ ອໍາຄາ ລັດສະໝີ ຮອງເລຂາພັກເມືອງ, ຮອງເຈົ້າເມືອງແກ່ນທ້າວ, ສະຫາຍ ສົມຫວັງ ພຸດທະສັກ ກໍາມະການພັກເມືອງ, ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ, ສະຫາຍ ອານຸເດດ ພິທັກ ເລຂາໜ່ວຍພັກໂຮງຮຽນມັດທະຍົມສົມບູນເມືອງໝໍ, ມີຄະນະທີມງານລົງດໍາເນີນກອງປະຊຸມໃຫຍ່ສໍານັກງານ-ອົງການ ແລະ ສະມາຊິກພາຍໃນໜ່ວຍພັກດັ່ງກ່າວເຂົ້າຮ່ວມຢ່າງພ້ອມພຽງ.




ໃນກອງປະຊຸມສະຫາຍ ອານຸເດດ ພິທັກ ເລຂາໜ່ວຍພັກໂຮງຮຽນມັດທະຍົມສົມບູນເມືອງໝໍ ໄດ້ຜ່ານບົດລາຍງານການເມືອງຕໍ່ກອງປະຊຸມໃຫຍ່ຄັ້ງນີ້ວ່າ: ໜ່ວຍພັກໂຮງຮຽນມັດທະຍົມສົມບູນເມືອງໝໍ ເປັນໜ່ວຍພັກຮາກຖານໜຶ່ງ, ພາຍໃຕ້ການຊີ້ນໍາ-ນໍາພາໂດຍກົງຂອງຄະນະປະຈໍາພັກເມືອງແກ່ນທ້າວ, ມີພາລະບົດບາດເປັນແກ່ນນໍາໃນລະບົບການເມືຶອງ, ສຶກສາອົບຮົມທາງດ້ານການເມືອງ-ແນວຄິດ, ກໍາແໜ້ນເຊື່ອມຊຶມແນວທາງ, ແຜນນະໂຍບາຍຂອງພັກ, ມະຕິ, ຄໍາສັ່ງ, ຂໍ້ກໍານົດກົດໝາຍຕ່າງໆຂອງພັກຂອງລັດວາງອອກແຕ່ລະໄລຍະພ້ອມທັງນໍາພາຈັດຕັ້ງປະຕິບັດໃຫ້ປະກົດຜົນເປັນຈິງ. 



ການນໍາພາຂອງໜ່ວຍພັກກວມເອົາ 1 ໂຮງຮຽນ ແລະ 3 ອົງການຈັດຕັ້ງມະຫາຊົນ ພາຍໃນໜ່ວຍພັກ ມີສະມາຊິກພັກ ແລະ ພະນັກງງານຄູສອນທັງໝົດ 23 ສະຫາຍ, ຍິງ 12 ສະຫາຍ. ໃນນີ້, ເປັນສະມາຊິກພັກ 13 ສະຫາຍ, ຍິງ 8 ສະຫາຍ, ສໍາຮອງ 3 ສະຫາຍ, ຍິງ 3 ສະຫາຍ, ມີນ້ອງນັກຮຽນທັງໝົດ 400 ກວ່ານ້ອງ, ຍິງ 200 ກວ່ານ້ອງ.




 ໃນໄລຍະ 5 ປີ ຜ່ານມາຄະນະພັກໄດ້ຊີ້ນໍາໆພາສະມາຊິກພັກ, ພະນັກງານຄູສອນ ຈັດຕັ້ງປະຕິບັດໜ້າທີ່ວຽກງານ, ວິຊາສະເພາະຂອບເຂດຄວາມຮັບຜິດຊອບຂອງໃຜລາວ, ສ້າງເງື່ອນໄຂອໍານວຍຄວາມສະດວກໃນການເຄື່ອນໄຫວວຽກງານວິຊາສະເພາະ ກໍຄືການສິດສອນ, ການແຕ່ງບົດສອນກ່ອນຂຶ້ນຫ້ອງ ແລະ ປະດິດສື່ການຮຽນ-ການສອນ, ສົ່ງຄວາມຮູ້ໃຫ້ແກ່ນັກຮຽນໂດຍກົງ, ກໍາແໜ້ນແນວທາງນະໂຍບາຍຂອງພັກ ໂດຍສະເພາະແມ່ນທາງດ້ານການສຶກສາ, ຊຸກຍູ້ສົ່ງເສີມນັກຮຽນທີ່ມີພອນສະຫວັນ ສ້າງໃຫ້ເຂົາເຈົ້າກາຍເປັນນັກຮຽນເກັ່ງ ແລະ ສ້າງຄູໃຫ້ໄດ້ຄູຕໍາແໜ່ງຄູປະສົບການໄປເທື່ອລະກ້າວ. ນອກນັ້ນ, ຍັງໄດ້ຊີ້ນໍາໆພາອົງການຈັດຕັ້ງມະຫາຊົນເຄື່ອນໄຫວຕາມພາລະບົດບາດຂອງຕົນໃຫ້ເປັນກໍາລັງແຮງ ໃນການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດຢູ່ຂັ້ນຮາກຖານ.




ໃນກອງປະຊຸມຄັ້ງນີ້, ບັນດາສະຫາຍຜູ້ແທນກອງປະຊຸມໄດ້ເປັນເອກະສັນດ້ວຍການຍົກບັດປະຊາມະຕິຮັບຮອງເອົາສະຫາຍ ອານຸເດດ ພິທັກ ເປັນເລຂາໜ່ວຍພັກ, ສະຫາຍ ຫວັດ ສີທອງໄສ ເປັນຮອງເລຂາ, ທັງເປັນຜູ້ກວດກາໜ່ວຍພັກ ແລະ ສະຫາຍ ດວງເດັ່ນ ທໍາມະວົງ ເປັນຄະນະໜ່ວຍພັກ. 


ໃນຕອນທ້າຍກອງປະຊຸມຍັງໄດ້ຮັບຟັງຄໍາໂອ້ລົມຂອງສະຫາຍສະຫາຍ ອໍາຄາ ລັດສະໝີ ຮອງເລຂາພັກເມືອງ, ຮອງເຈົ້າເມືອງແກ່ນທ້າວ ເຊິ່ງສະຫາຍໄດ້ເນັ້ນໃຫ້ເພີ່ມທະວີສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ ແລະ ພະນັກງານຄູສອນໃຫ້ມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ນັບມື້ນັບສູງຂຶ້ນ, ເອົາໃຈໃສ່ປະຕິບັດໜ້າທີ່ວິຊາສະເພາະ ໂດຍສະເພາະແມ່ນການແຕ່ງບົດສອນ, ສົ່ງຄວາມຮູ້ທີ່ມີຄຸນນະພາບ, ຫຼີກລ້ຽງແນວຄິດມັກງ່າຍ ເອົາໃຈໃສ່ເບິ່ງແຍງຊີວິດຂອງຄູ ແລະ ນ້ອງນັກຮຽນ ໃຫ້ປະຕິບັດໄດ້ຄົບຕາມ ຫຼັກມູນຂອງການສຶກສາ.

No comments

Powered by Blogger.