Header Ads

ຫນັງສືພິມ Khmer Times ອອກຂ່າວບິດເບືອນບັນຫາປັກຫລັກຫມາຍຊາຍແດນ



        ວັນທີ 06 ມີນາ 2019, ຫນັງສືພິມ Khmer Times ໄດ້ອອກຂ່າວໃນຫົວຂໍ້ “ການປັກຫລັກຫມາຍຊາຍແດນກັບ ສປປ ລາວ ຍັງບໍ່ແນ່ນອນ”, ໂດຍມີເນື້ອໃນທີ່ບິດເບືອນຄວາມເປັນຈິງ ກ່ຽວກັບ ບັນຫາດັ່ງກ່າວ ໂດຍອ້າງວ່າວຽກງານປັກຫລັກຫມາຍຊາຍແດນກັບ ສປປ ລາວ ຖືກຢຸດສະຫງັກລົງ. ບົດຂ່າວດັ່ງກ່າວແມ່ນໃຫ້ຂໍ້ມູນທີ່ບໍ່ຖືກຕ້ອງແກ່ມວນຊົນ ໂດຍສະເພາະຕໍ່ປະຊາຊົນກຳປູເຈຍ ແລະ ປະຊາຄົມສາກົນ, ສ້າງຄວາມເຂົ້າໃຈຜິດຕໍ່ຈຸດຢືນຂອງແຕ່ລະຝ່າຍ, ໂດຍສະເພາະໄດ້ກະທົບກະເທືອນຕໍ່ນະໂຍບາຍ ແລະ ຄວາມພະຍາຍາມຂອງລັດຖະບານ ແຫ່ງ ສາທາລະນະ ປະຊາທິປະໄຕ ປະຊາຊົນລາວ ໃນການແກ້ໄຂບັນຫານີ້. 

      ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກກຳປູເຈຍ ເປັນປະເທດບ້ານໃກ້ເຮືອນຄຽງທີ່ດີຕໍ່ກັນ, ເຄີຍຊ່ວຍເຫລືອ ແລະ ສະຫນັບສະຫນູນເຊິ່ງກັນ ແລະ ກັນ ມາແຕ່ບູຮານນະການ. ທັງສອງປະເທດມີຊາຍແດນຮ່ວມກັນຍາວ 535 ກິໂລແມັດ ແລະ ນັບຕັ້ງແຕ່ເລີ້ມການສຳຫລວດ ແລະ ປັກຫລັກຫມາຍຊາຍແດນຮ່ວມກັນໃນປີ 2000, ສອງຝ່າຍໄດ້ສຳເລັດການກຳນົດທິດເນັ່ງເສັ້ນຊາຍແດນຮ່ວມກັນ 465 ກິໂລແມັດ ຫລື 86% ຂອງຄວາມຍາວເສັ້ນຊາຍແດນທັງຫມົດ, ຍັງເຫລືອ 14% ທີ່ຈະຕ້ອງສືບຕໍ່ໃຫ້ສຳເລັດ. ບໍລິເວນດັ່ງກ່າວແມ່ນເລີ້ມແຕ່ຫລັກຫມາຍຊາຍແດນ ເລກທີ 078  ຂຶ້ນໄປຕາມເຊກອງ ແລະ ແຍກອອກໄປທາງເບື້ອງຂວາ ເພື່ອໄປຍັງຫລັກຫມາຍຊາຍແດນ ເລກທີ 099. ຈົນເຖິງປະຈຸບັນ, ສອງຝ່າຍຍັງບໍ່ສາມາດຕົກລົງ ແກ້ໄຂບໍລິເວນດັ່ງກ່າວໄດ້ເທື່ອ ແລະ ສອງປະເທດໄດ້ປະກາດຢ່າງເປັນທາງການຢູ່ໃນຫຼາຍໆກອງປະຊຸມຄະນະກຳມະການຊາຍແດນຮ່ວມວ່າບໍລິເວນດັ່ງກ່າວນີ້ ແມ່ນບໍລິເວນຄົງຄ້າງຊາຍແດນ ແລະ ໄດ້ຮັບການຢັ້ງຢືນຄືນໂດຍນາຍົກລັດຖະມົນຕີຂອງສອງປະເທດໃນຫລາຍໆໂອກາດທີ່ພົບປະກັນ. ນອກຈາກນັ້ນ, ໄລຍະທີ່ຍັງບໍ່ທັນໄດ້ຮັບການແກ້ໄຂນີ້, ນາຍົກລັດຖະມົນຕີທັງສອງປະເທດໄດ້ຕົກລົງກັນທີ່ນະຄອນຫລວງຮ່າໂນ້ຍ ຂອງຫວຽດນາມວ່າບໍ່ໃຫ້ມີກຳລັງທະຫານຢູ່ບໍລິເວນນີ້, ບໍ່ໃຫ້ທະຫານ ຫລື ປະຊາຊົນ ດຳເນີນກິດຈະການໃດໆ ແລະ ໃຫ້ມີການລາດຕະເວນຮ່ວມກັນຢູ່ບໍລິເວນຄົງຄ້າງຊາຍແດນດັ່ງກ່າວ. 

     ແທນທີ່ ຫນັງສືພິມ Khmer Times ຈະນຳສະເຫນີຂໍ້ມູນຕາມຄວາມເປັນຈິງໃນທາງສ້າງສັນ, ແຕ່ກົງກັນ ຂ້າມ, ສື່ມວນຊົນກຳປູເຈຍ ສຳພັດເຜີຍແຜ່ຂໍ້ມູນຂ່າວສານຕໍ່ມວນຊົນທົ່ວໄປວ່າການແກ້ໄຂບັນຫາຊາຍແດນບໍ່ສາມາດແກ້ໄຂໄດ້ແມ່ນເປັນຍ້ອນຝ່າຍລາວຝ່າຍດຽວ. ຄວາມຈິງແລ້ວ, ສາຍເຫດຕົ້ນຕໍທີ່ເຮັດໃຫ້ບໍ່ສາມາດແກ້ໄຂບໍລິເວນຄົງຄ້າງຊາຍແດນ 14% ນັ້ນແມ່ນຍ້ອນສອງຝ່າຍມີທັດສະນະແຕກຕ່າງກັນ ເນື່ອງຈາກຝ່າຍລາວກໍຄືຝ່າຍກຳປູເຈຍຕ່າງກໍ່ອີງໃສ່ເອກະສານ ແລະ ແຜນທີ່ທີ່ແຕກຕ່າງກັນເພື່ອເປັນພື້ນຖານໃຫ້ແກ່ການຢັ້ງຢືນ ທັດສະນະຂອງຕົນ. ອີງຕາມຂໍ້ມູນຂອງທາງການລາວ, ມີພຽງເອກະສານທາງການ ແລະ ແຜນທີ່ທີ່ກ່ຽວຂ້ອງກັບການກຳນົດເສັ້ນຊາຍແດນ ໂດຍສອດຄ່ອງກັບຫລັກການທີ່ໄດ້ຮັບຮອງເທົ່ານັ້ນ ທີ່ຝ່າຍລາວນໍາໃຊ້, ແຕ່ບໍ່ແມ່ນເອກະສານທີ່ບໍ່ຖືກຕ້ອງ ໂດຍສະເພາະແຜນທີ່ພິມຂຶ້ນໃນປີ 1902. 

      ເຖິງຢ່າງໃດກໍ່ຕາມ, ທັງສອງປະເທດ ບໍ່ໄດ້ລົດລະຄວາມພະຍາຍາມ ແລະ ຄວາມເອົາໃຈໃສ່ ເພື່ອຊອກຫາວິທີທາງແກ້ໄຂຮ່ວມກັນ. ຕໍ່ບັນຫານີ້, ສິ່ງໜຶ່ງທີ່ສ່ອງແສງໃຫ້ເຫັນ ແລະ ຄວນຍົກຂຶ້ນແມ່ນ ເດືອນກັນຍາປີ 2017, ນາຍົກ ລັດຖະມົນຕີຂອງສອງປະເທດ ໄດ້ເຫັນດີເປັນເອກະພາບກັນສົ່ງຫນັງສືເຖິງປະທານາທິບໍດີຝຣັ່ງ ເພື່ອຂໍໃຫ້ຝຣັ່ງຊ່ວຍເຫລືອສະຫນອງເອກະສານທາງການ ແລະ ແຜນທີ່ທີ່ກ່ຽວຂ້ອງກັບການກຳນົດເສັ້ນຊາຍແດນໃນສະໄໝອານານິຄົມ ແລະ ສະໜອງຜູ້ຊ່ຽວຊານແຜນທີ່ ເພື່ອຖ່າຍທອດແຜນທີ່. ພາຍຫລັງໄດ້ຮັບຄຳຕອບໃນທາງບວກຈາກປະທານາທິບໍດີຝຣັ່ງ, ປະຈຸບັນສອງຝ່າຍພວມຢູ່ໃນຂັ້ນຕອນການເຈລະຈາ ກ່ຽວກັບ ຂໍ້ກຳນົດຮ່ວມ ວ່າດ້ວຍ ການຊ່ວຍເຫລືອດັ່ງກ່າວ. 

      ໃນຂະນະທີ່ສອງຝ່າຍໄດ້ຮັບຮູ້ນຳກັນແລ້ວວ່າ ບໍລິດັ່ງກ່າວແມ່ນບໍລິເວນຊາຍແດນທີ່ຍັງບໍ່ໄດ້ຮັບການແກ້ໄຂ, ມັນເປັນສິ່ງທີ່ບໍ່ຖືກຕ້ອງ ແລະ ບໍ່ເໝາະສົມໃນການທີ່ຈະຢັ້ງຢືນ ຝ່າຍດຽວວ່າດິນແດນເຂດນີ້ເປັນຂອງຝ່າຍໃດຝ່າຍໜຶ່ງ.

     ໃນເດືອນສິງຫາປີ 2017, ຢູ່ບໍລິເວນນີ້ໄດ້ເກີດສະພາບເຄັ່ງຕຶງ ກຳປູເຈຍໄດ້ສົ່ງກຳລັງທະຫານເຂົ້າມາໃນບໍລິເວນຊາຍແດນຄົງຄ້າງດັ່ງກ່າວ, ໃນຂະນະທີ່ຝ່າຍລາວມີທະຫານພຽງແຕ່ບໍ່ພໍເທົ່າໃດຄົນປະຈຳຢູ່ບໍລິເວນໃກ້ກັບຫ້ວຍອາໄລ (ຊື່ຫ້ວຍ) ເພື່ອຕິດຕາມການກໍ່ສ້າງເສັ້ນທາງຂອງຝ່າຍກຳປູເຈຍ ເຖິງແມ່ນວ່າສອງຝ່າຍໄດ້ຕົກລົງກັນຫ້າມບໍ່ໃຫ້ມີການດຳເນີນກິດຈະການໃດໆຢູ່ບໍລິເວນຄົງຄ້າງດັ່ງກ່າວແລ້ວ ກໍ່ຕາມ. 

     ເຖິງວ່າຈະຫຍຸ້ງຍາກຫຼາຍປານໃດກໍ່ຕາມ, ແຕ່ຝ່າຍລາວຍັງເຊື່ອຫມັ້ນວ່າການແກ້ໄຂບັນຫາໂດຍສັນຕິວິທີຜ່ານການເຈລະຈາປຶກສາຫາລືແມ່ນທາງເລືອກທີ່ດີທີ່ສຸດໃນການແກ້ໄຂຂໍ້ຂັດແຍ່ງ ໂດຍສະເພາະກັບປະເທດເພື່ອນບ້ານເຊັ່ນກຳປູເຈຍ, ແຕ່ຖ້າຫາກສອງຝ່າຍສືບຕໍ່ມີທັດສະນະທີ່ແຕກຕ່າງກັນ ແລະ ແກ່ຍາວ, ການແກ້ໄຂໂດຍສານຍຸຕິທໍາສາກົນອາດເປັນສິ່ງທີ່ຫລີກຫລຽງບໍ່ໄດ້.

CR: Lao National Radio




No comments

Powered by Blogger.