Header Ads

ມອບຫລຽນກາມິດຕະພາບ ໃຫ້ຮອງຜູ້ຕາງໜ້າອົງການອຸຍນິເຊຟ(UNICEF) ປະຈໍາລາວ

ໃນວັນທີ 11 ມີນາ 2019 ຢູ່ກະຊວງການຕ່າງປະເທດ, ນະຄອນຫຼວງວຽງຈັນ, ໄດ້ມີພິທີປະດັບຫລຽນກາມິດຕະພາບ ໃຫ້ແກ່ ທ່ານ ມິໂອ-ຊິນ ຢູນ (Myo-Zin Nyunt), ຮອງຜູ້ຕາງໜ້າອົງການອຸຍນິເຊຟ (UNICEF) ປະຈຳ ສປປ ລາວ, ເພື່ອເປັນການຍ້ອງຍໍຊົມເຊີຍຜົນງານ ຂອງຜູ້ກ່ຽວພາຍຫລັງ ສິ້ນສຸດການປະຕິບັດໜ້າທີ່ຢູ່ປະເທດລາວ.




ຕາງໜ້າລັດຖະບານລາວປະດັບຫລຽນກາມິດຕະພາບໃນຄັ້ງນີ້ແມ່ນທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ໂດຍມີພະນັກງານຂັ້ນສູງຈາກບັນດາກະຊວງຂະແໜງການກ່ຽວຂ້ອງ, ຜູ້ຕາງໜ້າຫ້ອງການຜູ້ປະສານງານ ສປຊ ປະຈຳ ສປປ ລາວ ແລະ ຜູ້ຕາງໜ້າອົງການອຸຍນິເຊຟປະຈຳ ສປປ ລາວ ເຂົ້າຮ່ວມ.


ໃນໂອກາດດັ່ງກ່າວ, ທ່ານຮອງລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການປະຕິບັດໜ້າທີ່ວຽກງານໃນໄລຍະຜ່ານມາ ຂອງທ່ານ ມິໂອ-ຊິນ ຢູນ, ທີ່ໄດ້ປະກອບສ່ວນເສີມຂະຫຍາຍການພົວພັນຮ່ວມມື ແລະ ຊ່ວຍເຫລືອ ສປປ ລາວ ໃນດ້ານຕ່າງໆຂອງອົງການອຸຍນິເຊຟ, ເປັນຕົ້ນແມ່ນວຽກງານຊ່ວຍເຫລືອແມ່ ແລະ ເດັກ ທາງດ້ານສາທາລະນະສຸກ ແລະ ໂພຊະນາການ ຢູ່ ສປປ ລາວ.




ດັ່ງນັ້ນ, ລັດຖະບານ ແຫ່ງ ສປປ ລາວ ຈຶ່ງໄດ້ຕົກລົງຍ້ອງຍໍປະດັບ ຫລຽນກາມິດຕະພາບ ເພື່ອເປັນການຈາລຶກຜົນງານການປະກອບສ່ວນໃນການສ້າງສາພັດທະນາ ຢູ່ ສປປ ລາວ ຂອງຜູ້ກ່ຽວ.


ໃນໂອກາດດຽວກັນ, ທ່ານ ມິໂອ-ຊີນ ຢູນ ກໍ່ໄດ້ສະແດງຄວາມຂອບອົກຂອບໃຈ ຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວ ຕະຫລອດໄລຍະການປະຕິບັດໜ້າທີ່ຂອງທ່ານ ໃນໄລຍະ 3 ປີ ທີ່ຜ່ານມາ, ພ້ອມທັງຢືນຢັນຈະສືບຕໍ່ຊຸກຍູ້ໃຫ້ມີການຊ່ວຍເຫລືອ ແລະ ສະໜັບສະໜູນຮ່ວມມືຂອງອົງການ UNICEF ໃຫ້ແກ່ ສປປ ລາວ ໃນຕໍ່ໜ້າ.

No comments

Powered by Blogger.