Header Ads

ເມືອງວິລະບູລີ ປະກາດຮັບຮອງເອົາ 10 ບ້ານເປັນບ້ານພັດທະນາຮອບດ້ານ



-------00000-----
 ໃນຕອນບ່າຍວັນທີ 5 ເມສາ2019 ນີ້, ຢູ່ທີ່ສະໂມສອນ ເມືອງວິລະບູລີ ແຂວງສະຫວັນນະເຂດ ໄດ້ຈັດພິທີປະກາດຮັບຮອງເອົາ 10 ບ້ານ ຂອງເມືອງເປັນບ້ານພັດທະນາຮອບດ້ານເຊິ່ງປະກອບມີ: ບ້ານບຸ່ງຄຳ, ນາແອະ, ກົກຕ້ອງ, ໜອງກະປາງ, ຂີ່ຄັ່ງ, ນາແກ, ນານໍ້າສ້າງ, ນາມົນ, ນາເມືືອງແສນ ແລະ ບ້ານຊຽງແລ ໂດຍເປັນກຽດເຂົ້າຮ່ວມຂອງທ່ານ ກົງຈັກ ໜໍ່ແກ້ວ ຫົວໜ້າພະແນກການເງິນ ແຂວງ ທ່ານ, ທ່ານ ຄຳຜຸຍ ສີບຸນເຮືອງແຂວງເຈົ້້າເມືອງວິລະບູລີ, ທ່ານ ນາງ ດາວວອນ ໄຊສຸລຽນ ຫົວໜ້າຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ,ພ້ອມມີບັນດາທ່ານການນໍາຂອງເມືອງອ້ອມຂ້າງຕະຫຼອດຮອດປະຊາຊົນທັງ10ບ້ານ ເຂົ້າຮ່ວມຢ່າງຫຼວງຫຼາຍ.

 ທ່ານ ພັນສາ ໄຊຍະວົງ ນາຍບ້ານບຸ່ງຄຳ ຕາງໜ້າໃຫ້ ທັງ 10 ບ້ານ ຜ່ານບົດລາຍງານການສ້າງບ້ານພັດທະນາຮອບດ້ານ ໃຫ້ຮູ້ວ່າ: ທັງ 10 ບ້ານມີພົນລະເມືອງທັງໝົດ 9.122 ຄົນ, ຍິງ 4.465 ຄົນ, ມີ 1.684  ຄອບຄົວ ແລະ ມີ 1.833 ຫຼັງຄາເຮືອນ, ໃນນັ້ນເຜົ່າຜູ້ໄທກວມເອົາ 95% ໃນການດຳລົງຊີວິດທັງ 10 ບ້ານຍັງມີລັກລັກສະນະເຄິ່ງທໍາມະຊາດ ແລະ ວິທະຍາສາດ, ປະຊາຊົນສ່ວນໃຫຍ່ຢຶດຖືອາຊີບປູກເຂົ້າເປັນຕົ້ນຕໍ ແລະ ລ້ຽງສັດເປັນສຳຮອງ, ນອກນັ້ນແມ່ນບໍລິການຄ້າຂາຍ ແລະ ເປັນກຳມະກອນຢູ່ບໍລິສັດເພື່ອສ້າງລາຍຮັບໃຫ້ແກ່ຄອບຄົວມາຮອດປະຈຸປັນຊີວິດການເປັນຢູ່ຂອງປະຊາຊົນໃນແຕ່ລະບ້ານເຫັນວ່ານັບມື້ນັບດີຂຶ້ນເລື້ອຍໆ,ຍ້ອນໄດ້ຫັນເອົາເຕັກນິກວິທະຍາສາດທີ່ທັນສະໄໝເຂົ້າມານຳໃຊ້ໃນການຜະລິດກະສິກຳ ໄດ້ເກັບລາຍຮັບເຂົ້າງົບປະມານໄດ້100% ຕາມຕົວເລກແຜນການທີ່ເມືອງໄດ້ມອບໝາຍໃຫ້ໃນແຕ່ລະປີ ເຊິ່ງປະຈຸບັນມີຄອບຄົວພັດທະນາແລ້ວ 1.648 ຄອບຄົວເທົ່າກັບ 97,86% ຜ່ານການປະເມີນວຽກງານແຕ່ລະດ້ານເຫັນວ່າທັງ 10 ບ້ານ ຄົບຕາມມາດຖານເງື່ອນໄຂຂອງການສ້າງບ້ານພັດທະນາ.

ຈາກນັ້ນໃນພິທີ, ກໍ່ໄດ້ມອບໃບຢັ້ງຢືນໃຫ້ 10 ບ້ານເປັນບ້ານພັດທະນາຮອບດ້ານ ເປັນກຽດມອບໂດຍທ່ານ ກົງຈັກ ໜໍ່ແກ້ວ, ນອກຈາກນີ້ ຍັງໄດ້ມອບໃບຢັ້ງຢືນບ້ານສາທາລະນະສຸກແບບຢ່າງ ໃຫ້ 14 ບ້ານ ,ບ້ານ ສາມັກຄີປອງດອງ 18 ບ້ານ, ບ້ານວັດທະນະທຳ 34 ບ້ານ, ບ້ານປ້ອງກັນຄວາມສະຫງົບດີ 52 ບ້ານ, ບ້ານປ້ອງກັນຊາດເຂັ້ມແຂງ 30 ບ້ານ , ບ້ານປອດຢາເສບຕິດ 26, ໜ່ວຍພັກແຂງຮູ້ນຳພາຮອບດ້ານ 4 ບ້ານ,ໂດຍການນຳຜັດປ່ຽນກັນມອບໃຫ້ຢ່າງສົມກຽດ.

ໃນໂອກາດນີ້, ທ່ານ ກົງຈັກ ໜໍ່ແກ້ວ ຫົວໜ້າພະແນການເງິນ ແຂວງ ກໍ່ໄດ້ມີຄຳເຫັນໂອ້ລົມ ແລະຍ້ອງຍໍຊົມເຊີຍຕໍ່ອຳນາດການປົກຄອງທີ່ ຍາດໄດ້ຜົນງານຫລາຍດ້ານ,ພ້ອມທັງໃຫ້ສືບຕໍ່ແນວທາງນະໂຍບາຍຂອງພັກຂອງລັດໂດຍສະເພາະວຽກງານສາມສ້າງພັດທະນາ ບໍ່ວ່າຈະເປັນທາງດ້ານວຽກງານການຜະລິດ,ເວົ້້າລວມເວົ້າສະເພາະກໍ່ຄືແຜນພັດທະນາເສດຖະກິດສັງຄົມ ແລະ ວຽກງານແກ້ໄຂຄວາມທຸກຍາກໃນບ້ານດາບ້ານຕ່າງໆໃນທົ່ວເມືອງຈົ່ງພ້ອມກັນສືບຕໍ່ຮັກສາ ໃຫ້ໄດ້ບ້ານພັດທະນາໝົດທຸກບ້ານ.

ຈາກນັ້ນໃນພິທີຍັງໄດ້ມີການຕັດແຖບຜ້າເປີດປ້າຍ ທັງ10 ບ້ານເປັນບ້ານພັດທະນາຮອບດ້ານ ພ້ອມທັງລັ່ນຄ້ອງ 9 ບາດເພື່ອເປັນສິລິມຸງຄຸນໃຫ້ແກ່ງານຄັ້ງນີ້ດວ້ຍ.

ພາບ - ຂ່າວ: ວິລັດດາ ດວງຈັນທາ

No comments

Powered by Blogger.