Header Ads

ຢາກໃຫ້ບ້ານເມືອງມີຄວາມສະຫງົບ ປອດໄພ 100% ຕ້ອງແກ້ໄຂ 8 ບັນຫານີ້!




ນາຍ ພົຈວ ບຸບຜາ ສີພົມມາ ຫົວໜ້າກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ໄດ້ໃຫ້ທິດຊີ້ນໍາ ໃນກອງປະຊຸມສະຫຼຸບການເຄື່ອນໄຫວວຽກງານປະຈໍາປີ 2018 ແລະ ວາງທິດທາງປີ 2019 ຂອງກອງບັນຊາການ ປກສ ເມືອງປາກງື່ມ ນະຄອນຫຼວງວຽງຈັນວ່າ: ຄະນະພັກ-ຄະນະນໍາກອງບັນຊາການ ປກສ ເມືອງປາກງື່ມ ຕ້ອງສຸມໃສ່ແກ້ໄຂ 8 ບັນຫາທີ່ສໍາຄັນເພື່ອເຮັດໃຫ້ທົ່ວເມືອງປາກງື່ມ ມີຄວາມສະຫງົບ ປອດໄພ 100%.



8 ບັນຫາທີ່ສໍາຄັນມີ 

  1. ເພີ່ມທະວີວຽກງານສຶກສາອົບຮົມການເມືອງແນວຄິດພະນັກງານ-ນັກຮົບໃຫ້ເລີກຊິ່ງ, ໜັກແໜ້ນເຮັດໃຫ້ກໍາລັງມີຄວາມປອດໃສຂາວສະອາດ; 
  2. ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ວຽກໃດທີ່ເຮັດສໍາເລັດແລ້ວ ຕ້ອງສືບຕໍ່ກວດກາຄືນ, ຖ້າວ່າບໍ່ທັນສອດຄ່ອງກັບລະບຽບຫຼັກການ ແມ່ນໃຫ້ປັບປຸງຄືນໃໝ່; 
  3. ສືບຕໍ່ຫັນລົງກໍ່ສ້າງຮາກຖານການເມືອງປະຕິບັດຕາມ 4 ຄາດໝາຍ, 4 ເນື້ອໃນ ຕິດພັນກັບວຽກງານ 3 ສ້າງໃຫ້ແຂງແຮງ; 
  4. ກໍາແໜ້ນ ແລະ ຄຸ້ມຄອງການເໜັງຕີງຂອງພົນລະເມືອງໃຫ້ເຂົ້າສູ່ລະບຽບກົດໝາຍ, ແກ້ໄຂການຂຶ້ນສໍາມະໂນຄົວລາວ ແລະ ຕ່າງດ້າວທີ່ຍັງບໍ່ໄດ້ຈົດທະບຽນສໍາມະໂນຄົວຕາມເງື່ອນໄຂຂຶ້ນທະບຽນສໍາມະໂນຄົວ; 
  5. ສືບຕໍ່ແກ້ໄຂບັນຫາປະກົດການຫຍໍ້ທໍ້ຕາມຄໍາສັ່ງເລກທີ 27/ນຍ ແລະ ຄໍາສັ່ງ1470/ ປກສ ຕິດພັນກັບການປະຕິບັດ 3 ຫຼຸດ 3 ເພີ່ມ 3 ຂະບວນການ ແລະ ຂໍ້ຕົກລົງ ເລກທີ 1184/ ຈນວ ວ່າດ້ວຍການຈັດສັນຄວາມເປັນລະບຽບຮຽບຮ້ອຍພາຍໃນຕົວເມືອງ-ຊານເມືອງ; 
  6. ກວດກາຂໍ້ຂັດແຍ່ງ, ຄໍາຮ້ອງຟ້ອງ, ຮ້ອງທຸກຂໍຄວາມເປັນທໍາຂອງພົນລະເມືອງຢູ່ຮາກຖານ; 
  7. ເອົາໃຈໃສ່ຄຸ້ມຄອງຄົນຕ່າງປະເທດ ທີ່ເຂົ້າມາພັກເຊົາ, ປະກອບອາຊີບ, ແຕ່ງດອງ ໃຫ້ຖືກຕ້ອງຕາມລະບຽບກົດໝາຍຂອງ ສປປ ລາວ, ກໍລະນີພົບເຫັນວ່າບໍ່ຖືກຕ້ອງໃຫ້ແກ້ໄຂຕາມຂັ້ນຕອນຂອງກົດໝາຍຢ່າງເດັດຂາດ ແລະ 
  8. ສືບຕໍ່ປະສານສົມທົບກັບອໍານາດການປົກຄອງເມືອງ ແລະ ຂະແໜງການທີ່ກ່ຽວຂ້ອງ 4 ບ້ານ ຄັດຈ້ອນເລືອກເຟັ້ນປັບປຸງ ປກສ ບ້ານໃຫ້ຖືກຕ້ອງຕາມມາດຖານເງື່ອນໄຂທີ່ກໍານົດໄວ້. 


ກອງປະຊຸມດັ່ງກ່າວໄດ້ຈັດຂຶ້ນໃນອາທິດ ຜ່ານມາ. ຢູ່ສະໂມສອນກອງບັນຊາການ ປກສ ເມືອງປາກງື່ມ ໂດຍການເປັນປະທານຂອງ ພັທ ບຸນສີຈັນ ວົງຄໍາດີ ຫົວໜ້າ ປກສ ເມືອງປາກງື່ມ ໃຫ້ກຽດເຂົ້າຮ່ວມໂດຍນາຍ ພົຈວ ບຸບຜາ ສີພົມມາ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ມີທ່ານ ຄໍາໝູນ ຕຽມທະລາດ ເຈົ້າເມືອງໆປາກງື່ມ ແລະ ບັນດາພະນັກງານຫຼັກແຫຼ່ງທົ່ວກອງບັນຊາການ ປກສ ເມືອງປາກງື່ມເຂົ້າຮ່ວມ.



ເຊິ່ງໃນກອງປະຊຸມຍັງໄດ້ມີການປະກາດການເລື່ອນຊັ້ນຮ້ອຍຕີຂຶ້ນຮ້ອຍໂທໃຫ້ພະນັກງານ-ນັກຮົບ 3 ສະຫາຍ ໂດຍການໃຫ້ກຽດປະດັບຊັ້ນຂອງນາຍພົຈວ ບຸບຜາ ສີພົມມາ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.