Header Ads

ບົດບັນນາທິການວິທະຍຸກະຈາຍສຽງແຫ່ງຊາດລາວ ສົ່ງທ້າຍປີເກົ່າ ຈສ 1380 ຕ້ອນຮັບປີໃໝ່ ຈສ 1381




ທ່ານຜູ້ຟັງທີ່ເຄົາລົບ !
ປີເກົ່າ ຈສ 1380ຫາກໍຜ່ານໄປ, ປີໃໝ່ ຈສ 1381 ຫາກໍເຂົ້າມາແທນທີ່ໃນມື້ນີ້. ປີ ຈສ 1380 ເປັນປີທີ່ມີຄວາມສຳຄັນ ຫລາຍສຳລັບປະເທດເຮົາ ເພາະເປັນປີທີ່ສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ່ 10 ຂອງພັກເຂົ້າສູ່ການພັດທະ ນາເສດຖະກິດ-ສັງຄົມ 5 ປີ ຄັ້ງທີ 8 ໃຫ້ປະກົດຜົນເປັນຈິງ.  ໃນປີຜ່ານມາ ສປປລາວ ຮັບຜົນສຳເລັດໃນການພັດທະນາ ເສດຖະກິດ-ສັງຄົມ ເປັນຢ່າງສູງ, ສາມາດຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າດີຂຶ້ນກວ່າແຕ່ກ່ອນ ຫຼາຍ ໂດຍສະເພາະຖ້າທຽບໃສ່ 40 ປີກ່ອນ ຄວາມຈະເລີນຮຸ່ງເຮືອງແມ່ນກ້າວກະໂດດຂັ້ນ. ການເມືອງມີສະຖຽນລະ ພາບ, ປະຊາຊົນມີຄວາມສະຫງົບຜາສຸກ,  ພື້ນຖານໂຄງລ່າງໄດ້ຮັບການພັດທະນາແຕ່ເໜືອຮອດໃຕ້ ແຕ່ຕົວເມືອງເຖິງ ຊົນນະບົດ, ຕ່າງປະເທດໃຫ້ຄວາມເຊື່ອໝັ້ນໄວ້ວາງໃຈ,  ນັກລົງທຶນ ນັກທ່ອງທ່ຽວເຂົ້າສູ່ປະເທດເຮົານັບມື້ນັບຫຼາຍຂຶ້ນ. 

ປີ 1380 ເປັນປີທີ່ທົ່ວພັກ ທົ່ວກອງທັບ ທົ່ວປວງຊົນລາວລວມທັງພີ່ນ້ອງຄົນເຊື້ອຊາດລາວຢູ່ຕ່າງປະເທດ ຈຳນວນໜຶ່ງໄດ້ພ້ອມພຽງຮຽງໜ້າກັນ ພັດທະນາສ້າງສາປະເທດຊາດທີ່ແສນຮັກ ແລະ ກໍໄດ້ຮັບຜົນງານທີ່ຍິ່ງໃຫຍ່. ຊີ ວິດການເປັນຢູ່ຂອງປະຊາຊົນລາວບັນດາເຜົ່ານັບມື້ນັບດີຂຶ້ນ, ການກໍ່ສ້າງພື້່ນຖານໂຄງລ່າງແຕ່ເໜືອຮອດໃຕ້ ກໍມີຜົນງານ ຢ່າງຫຼວງຫຼາຍ. ສາກົນກໍນັບມື້ຮັບຮູ້ບົດບາດຂອງ ສປປລາວໃນເວທີສາກົນ, ປີທ່ອງທ່ຽວລາວກໍປະສົບຜົນສຳເລັດ ດີສົມ ຄວນ ແລະ ປີນີ້ກໍ່ແມ່ນປີທ່ອງທ່ຽວລາວ-ຈີນອີກ. 

ສຳລັບ ວສລ ໃນປີຜ່ານມາ ທັງລະບົບ AM ຄື້ນກາງ ແລະ ຄື້ນສັ້ນທີ່ຮັບຟັງໄດ້ໃນທົ່ວປະເທດ ແລະ ປະເທດໃກ້ຄຽງ, ລະບົບ FM 103,7 ທີ່ຮັບຟັງໄດ້ຢູ່ນະຄອນຫຼວງວຽງຈັນ ແຂວງວຽງຈັນ, ແຂວງ ຫຼວງພະບາງ, ອຸດົມໄຊ, 4 ແຂວງພາກໃຕ້ ແລະ ແຂວງສະຫວັນນະເຂດ ທີ່ຫາກໍຮັບຟັງໄດ້ໃນເດືອນທັນວາຜ່ານມານີ້.  FM 95,  FM  97,3   FM 94,3 ແລະ FM 96 ທີ່ຮັບຟັງໄດ້ຢູ່ນະຄອນຫຼວງວຽງຈັນ ແລະ ແຂວງວຽງຈັນ ກໍຮັບໃຊ້ທ່ານ ຜູ້ຟັງໄດ້ດີ ແລະ ຍັງສາມາດຮັກສາບົດບາດສື່ນຳໜ້າໃນປະເທດໄວ້ໄດ້ຢ່າງໝັ້ນຄົງ,   ນອກນັ້ນ ພວກເຮົາຍັງມີ ເວັບໄຊ www.lnr.org.la ທີ່ສາມາດເບີ່ງຮູບພາບ ອ່ານຂ່າວ ແລະ ຟັງລາຍການໄດ້ໃນທົ່ວປະເທດ ແລະ ທົ່ວໂລກ ທີ່ປະກອບ ດ້ວຍພາສາລາວ, ພາສາກຶມມຸ, ມົ້ງ, ຝລັ່ງ, ອັງກິດ, ຫວຽດນາມ ແລະ ພາສາ ຈີນ. ນອກນັ້ນຍັງມີສື່ໃໝ່ ຄື ຢູທູບ ແລະ ເຟສບຸກ ທີ່ເປັນວີດີໂອຂ່າວສັ້ນ ເພື່ອເຂົ້າເຖິງກຸ່ມເປົ້າໝາຍຜູ້ຟັງໄດ້ຫຼາຍຊ່ອງທາງ ແລະ ມີປະສິດທິພາບກວ່າເກົ່າ ໂດຍສະເພາະຂ່າວພາບວີດີໂອທີ່ອອກທາງເຟສບຸກ ແມ່ນໄດ້ຮັບສຽງຕອບຮັບ ແລະ ຊົມເຊີຍຢ່າງຫຼວງຫຼາຍທັງພາຍໃນ ແລະ ຕ່າງປະເທດ.

ພະນັກງານທັງຝ່າຍເນື້ອໃນ ແລະ ຝ່າຍເຕັກນິກໄດ້ທຸ້ມເທສະປັນຍາ ຄວາມຮູ້ຄວາມສາມາດ ກຳລັງວັງຊາ ຜະລິດລາຍການຮັບໃຊ້ທ່ານຜູ້ຟັງໃນທົ່ວປະເທດ ແລະ ທົ່ວໂລກຢ່າງຫ້າວຫັນ ແລະ ມີຄວາມຮັບຜິດຊອບສູງ ເພື່ອສະ ໜອງຂໍ້ມູນຂ່າວສານທີ່ຖືກຕ້ອງວ່ອງໄວທັນການ ສາລະຄວາມຮູ້ທີ່ເປັນປະໂຫຍດ ແລະ ຄວາມບັນເທີງທີ່ມີຫຼາຍສີສັນ. 1 ປີ ຜ່ານມາພວກເຮົາໄດ້ຮັບສຽງຕອບຮັບ, ໄດ້ຮັບກຳລັງແຮງໃຈຈາກຜູ້ຟັງຜ່ານຈົດໝາຍ, ສຽງໂທລະສັບ, ອີເມວ, ຂໍ້ ຄວາມ ສັ້ນ ແລະ ຜ່ານສື່ໃໝ່ຕ່າງໆຢ່າງຫຼວງຫຼາຍ ທັງຄຳຕິແລະຄຳຊົມລ້ວນແຕ່ເປັນປະໂຫຍດຢ່າງສູງແກ່ພວກເຮົາ. 

ໃນໂອກາດວາລະດີຖີປີໃໝ່ລາວນີ້ ຄະນະບັນນາທິການ ວສລ ຂໍຕາງໜ້າໃຫ້ພະນັກງານ ວສລ ທຸກຄົນ ຂໍສະແດງຄວາມຮູ້ບຸນຄຸນຕໍ່ຜູ້ນຳພັກລັດ ທີ່ຍາມໃດກໍໄດ້ໃຫ້ການຊີ້ນຳໃກ້ຊິດຕິດແທດສ້າງເງື່ອນໄຂອຳນວຍຄວາມສະ ດວກຕ່າງໆໃຫ້ ວສລ ດຳເນີນວຽກງານຮັບໃຊ້ມວນຊົນຢ່າງມີປະສິດທິພາບ. ຂໍສະແດງຄວາມຂອບໃຈຢ່າງລົ້ນເຫຼືອ ຕໍ່ ທ່ານຜູ້ຟັງໃນທົ່ວປະເທດ ແລະ ທົ່ວໂລກທີ່ເປັນກຳລັງແຮງໃຈ ທັງຊ່ວຍຕຳນິຕິຊົມກໍ່ສ້າງພວກເຮົາໃຫ້ນັບມີື້ນັບເຂັ້ມແຂງ. ຂໍຂອບໃຈພະນັກງານຂອງວິທະຍຸແຂວງ, ເມືອງ, ວິທະຍຸຊຸມຊົນ ແລະ ລະບົບໂທລະໂຄ່ງທຸກແຫ່ງໃນທົ່ວປະເທດ ທີ່ໄດ້ ໃຫ້ການຮ່ວມມືກັບ ວສລ ເປັນຢ່າງດີ ບໍ່ວ່າການຖ່າຍທອດລາຍການຕ່າງໆຂອງ ວສລ ແລະ ການແລກປ່ຽນຂໍ້ມູນ ຂ່າວສານກັບພວກເຮົານັບມື້ນັບແໜ້ນແຟ້ນ; ຂອບໃຈວົງກາງສື່ມວນຊົນລາວແລະ ຕ່າງປະເທດທີ່ອະນຸຍາດໃຫ້ພວກເຮົາ ໄດ້ນຳໃຊ້ ແລະ ແລກປ່ຽນຂໍ້ມູນຂ່າວສານຮ່ວມກັນ, ຂໍຂອບໃນກະຊວງຖະບວງກົມ, ອຳນາດການປົກຄອງທ້ອງຖິ່ນ ແລະ ນັກວິຊາການທຸກຂະແໜງການໃນທົ່ວປະເທດທີ່ໄດ້ໃຫ້ການຮ່ວມມືຕອບສະໜອງຂໍ້ມູນຂ່າວສານຕ່າງໆໃຫ້ແກ່ ພວກເຮົາ ເປັນຢ່າງດີໃນຕະຫຼອດ 1 ປີຜ່ານມາ.

ໃນໂອກາດປີໃໝ່ລາວ ຈສ 1381 ພະນັກງານຂອງ ວສລ ທຸກຄົນຈະສືບຕໍ່ທຸ້ມເທກຳລັງວັງຊາ ສະຕິປັນຍາ ຄວາມຮູ້ຄວາມສາມາດຜະລິດລາຍການຮັບໃຊ້ທ່ານຜູ້ຟັງໃຫ້ດີກວ່າເກົ່າ ແລະ ຫວັງວ່າຈະໄດ້ຮັບກຳລັງແຮງໃຈ ແລະ ການຕຳນິຕິຊົມຈາກທ່ານຫຼາຍກວ່າປີ ຈສ 1380.

ປີໃໝ່ລາວ ຈສ 1381 ຄະນະນຳ ແລະ ພະນັກງານຂອງ ວສລທຸກຄົນຂໍອວຍໄຊໃຫ້ພອນຜູ້ນຳພັກລັດຈົ່ງມີ ອາຍຸ ວັນນະ ສຸຂະ ພະລະ ຍືນຍາວໝັ້ນ ເພື່ອນຳພາປະເທດຊາດກ້າວເດີນໄປດ້ວຍບາດກ້າວທີ່ໜັກແໜ້ນເຂັ້ມແຂງ ກວ່າເກົ່າ. ຂໍອວຍພອນໃຫ້ຜູ້ຟັງທຸກທ່ານຈົ່ງມີຄວາມສຸກທັງກາຍ ແລະ ໃຈຫຼາຍກວ່າປີຜ່ານມາ ດ້ວຍເຖີນ .

ໂຊກດີປີໃໝ່ລາວ !

No comments

Powered by Blogger.