Header Ads

ເສຍຫາຍໜັກສົມຄວນ! ເມືອງເງິນ ຖືກຜົນກະທົບຈາກພາຍຸ ຈຳນວນ 2 ບ້ານ ມີ 53 ຫຼັງ





ໃນເວລາ 23 ໂມງ ຂອງຄ່ຳຄືນວັນທີ 23 ເມສາ 2019 ນີ້ ຢູ່ທີ່ບ້ານນ້ຳທົນ ແລະ ບ້ານດອນສະຫວ່າງ ເມືອງເງິນ ແຂວງ ໄຊຍະບູລີ ໄດ້ເກີດມີໄພພິບັດທາງທຳມະຊາດ ກໍ່ຄືລົມພະຍຸ ພັດເຮືອນຂອງປະຊາຊົນ ເຊີ່ງໄດ້ເຮັດໃຫ້ມີບ້ານເຮືອນຂອງປະຊາຊົນ, ຫ້ອງການບ້ານ ແລະ ໂຮງຮຽນ ເສຍຫາຍ ເປັນຈຳນວນຫຼາຍ



ດັ່ງນັ້ນມາໃນວັນທີ 24 ເມສາ 2019 ນີ້ ທ່ານ ນາງ ບຸນພັກ ອິນທະປັນຍາ ຄະນະປະຈຳພັກແຂວງ ຮອງເຈົ້າແຂວງ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ, ມີທ່ານ ນາງ ແພງຈັນ ແກ້ວມະນີວົງ ກໍາມະການພັກແຂວງ ຫົວໜ້າພະແນກແຮງງານສະຫວັດດີການ-ສັງຄົມ ແຂວງ ພ້ອມດ້ວຍທີມງາານ ໄດ້ລົງກວດກາຕົວຈິງທີ່ບ້ານນ້ຳທົນ ແລະ ບ້ານດອນສະຫວ່າງ ຢ່າງຮີບດ່ວນ ເພື່ອໃຫ້ຄວາມອົບອຸ່ນ ແລະ ກຳລັງໃຈຕໍ່ຜູ້ປະສົບເຄາະຮ້າຍໃນຄັ້ງນີ້.



ທ່ານ ບຸນມີ ຈັນທິບ ກຳມະການພັກແຂວງ ເລຂາພັກເມືອງ ເຈົ້າເມືອງໆເງິນ ໄດ້ລາຍງານເຫດການ ແລະ ການເກັບກຳຂໍ້ມູນເສຍຫາຍໃນເບື້ອງຕົ້ນ ໃຫ້ທາງທີມງານຂອງແຂວງ ໄດ້ຮັບຊາບ. ເຫດການລົມພາຍຸພັດເຮືອນຂອງປະຊາຊົນມີ ຈຳນວນ 2 ບ້ານຄື:



ບ້ານນ້ຳທົນ ແລະ ບ້ານດອນສະຫວ່າງ ມີເຮືອນຂອງປະຊາຊົນ, ຫ້ອງການບ້ານ ແລະ ໂຮງຮຽນ ເສຍຫາຍ ທັງໝົດ 53 ຫຼັງ, ໃນນີ້ ບ້ານນ້ຳທົນ 16 ຫຼັງ, ບ້ານດອນສະຫວ່າງ 37 ຫຼັງ, ມີ ຈຳນວນ ພົນທັງໝົດ 300 ຄົນ, ຍິງ 155 ຄົນ, ເຮືອນທີຖືກເສຍຫາຍໜັກ ຈຳນວນ 15 ຫຼັງ, ໂຮງຮຽນ 1 ຫຼັງ, ຫ້ອງການບ້ານ 1 ຫຼັງ ລວມມູນຄ່າເສຍຫາຍການລົງເກັບກຳຂໍ້ມູນເບື້ອງຕົ້ນ 276,504,000 ກີບ.



 ດັ່ງນັ້ນທາງຄະນະກຳມະການ ປ້ອງກັນ ແລະ ຄວບຄຸມໄພພິບັດຂັ້ນເມືອງ ໄດ້ນຳພາ ພະນັກງານ, ທະຫານ-ຕຳຫຼວດ ລົງຊ່ວຍເຫຼືອຢ່າງຮີບດ່ວນ ເປັນຕົ້ນແມ່ນ ໄດ້ ຊ້ອມແປງ ເຮືອນທີຖືກເສຍຫາຍ, ເກັບມ້ຽນເຄື່ອງຂອງ ແລະ ເກັບມ້ຽນສິ່ງເສດເຫຼືອຕ່າງໆ, ສ່ວນອຸປະກອນທີ່ຈຳເປັນຈຳນວນ 1 ແມ່ນ ທາງອົງການປົກຄອງເມືອງເປັນຜູ້ສະໜອງໃຫ້ ເຊັ່ນ: ກະເບື້ອງ,ສັງກະສີ, ເຫຼັກຕາປູ, ປູນຊີເມັນ ແລະ ອື່ນໆ.



ຈາກນັ້ນ ທາງຄະນະກຳມະການ ປ້ອງກັນ ແລະ ຄວບຄຸມໄພພິບັດຂັ້ນແຂວງ ກໍໄດ້ມອບເງິນຊ່ວຍເຫຼືອບັນເທົາທຸກເບື້ອງຕົ້ນ ຈຳນວນ 20 ລ້ານກີບ ໃຫ້ທາງອົງການປົກຄອງເມືອງ ເຊີ່ງໃຫ້ກຽດຮັບໂດຍແມ່ນທ່ານ ເຈົ້າເມືອງໆເງິນ.


ໂດຍ: ອິນແປງ ແຫວນຄຳ
ຫ້ອງການ ຖວທ ເມືອງເງິນ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.