Header Ads

ນະຄອນຫຼວງພະບາງ ກຽມພ້ອມຕ້ອນຮັບປີທ່ອງທ່ຽວລາວ - ຈີນ 2019




ແຂວງຫຼວງພະບາງເປັນແຂວງໜຶ່ງທີ່ມີທ່າແຮງດ້ານການທ່ອງທ່ຽວ ແລະ ເປັນແຂວງດຽວທີ່ທາງອຳນາດການປົກຄອງແຂວງໄດ້ກຳນົດເອົາວຽກງານການທ່ອງທ່ຽວເປັນບູລິມະສິດ ໃນການພັດທະນາເສດຖະກິດສັງຄົມຂອງແຂວງ ແລະ ມີນະໂຍບາຍເປີດກ້ວາງໃຫ້ແກ່ນັກລົງທຶນດ້ານອຸດສາຫະກຳການທ່ອງທ່ຽວ ສຳລັບຄົນລາວ ແລະ ຄົນຕ່າງປະເທດຕະຫຼອດມາ; ໂດຍປະຈຸບັນນີ້ ໃນມື້ໜຶ່ງໆ ແມ່ນຈະສາມາດຕ້ອນຮັບນັກທ່ອງທ່ຽວໄດ້ໜຶ່ງໝື່ນຫ້າພັນກ່ວາຄົນ.

   ທ່ານ ນາງ ສຸດາພອນ ຄົມທະວົງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ໄດ້ໃຫ້ສຳພາດວ່າ: ຈຳນວນນັກທ່ອງທ່ຽວທີ່ເຂົ້າມາ ທ່ຽວແຂວງຫຼວງພະບາງໃນປີ 2018 ສາມາດບັນລຸຕົວເລກເກີນຄາດໝາຍທີ່ວາງໄວ້ ໂດຍມີນັກທ່ອງທ່ຽວຕ່າງປະເທດເຂົ້າມາເຖິງ ຫົກແສນຫ້າໝື່ນຫ້າພັນກ່ວາຄົນ ໃນນັ້ນມີນັກທ່ອງທ່ຽວຕ່າງຊາດເພີ່ມຂຶ້ນ 22% ທຽບໃສ່ປີ 2017 ໂດຍສະເພາະແມ່ນນັກທ່ອງທ່ຽວຈີນ; ນອກຈາກນັ້ນ, ກໍ່ຍັງມີນັກລົງທຶນຈີນໄດ້ເຂົ້າມາລົງທຶນດ້ານອຸດສາຫະກຳການທ່ອງທ່ຽວເປັນຈຳນວນຫຼາຍເຊັ່ນ: ໄດ້ມາລົງທຶນສ້າງໂຮງແຮມ, ເຮືອນພັກ, ແລະ ຮ້ານອາຫານຕ່າງໆ ເພື່ອຮອງຮັບນັກທ່ອງທ່ຽວໃນປີທ່ອງທ່ຽວລາວ-ຈີນ ປີ 2019 ນີ້.

  ຫນຶ່ງໃນທ່າແຮງໃນການຕ້ອນຮັບນັກທ່ອງທ່ຽວຂອງແຂວງຫຼວງພະບາງ ກໍ່ຄື ວັດທະນະທຳລາວ ເຊິ່ງເປັນຈຸດຂາຍຫນຶ່ງທີ່ດີ.

   ດັ່ງນັ້ນ, ເພື່ອເຮັດແນວໃດໃຫ້ ການພັດທະນາ ສອດຄ່ອງກັບການອະນຸລັກ, ທາງພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວຂອງແຂວງ ກໍ່ຄື ພາກສ່ວນຄຸ້ມຄອງມໍລະດົກ-ວັດທະນະທຳ ຈຶ່ງໄດ້ເອົາໃຈໃສ່ໃນ ການອະນຸລັກ ແລະ ຮັກສາວັດທະນະທຳ, ແລະ ຮີດຄອງປະເພນີ ເພື່ອໃຫ້ສົມກັບເປັນເມືອງມໍລະດົກໂລກ ທີ່ປະກອບມີຈຸດຂາຍອັນຫຼາກຫຼາຍ ເພື່ອຊ່ວຍຊຸກຍູ້ສົ່ງເສີມໃຫ້ວຽກງານການທ່ອງທ່ຽວຕະຫຼອດໄປ ໂດຍໄດ້ກຳນົດເອົາ 6 ແຜນງານ ແລະ 28 ໂຄງການ ເພື່ອນຳໄປຈັດຕັ້ງປະຕິບັດ ຜ່ານຫຼາກຫຼາຍກິດຈະກຳປີທ່ອງທ່ຽວລາວ-ຈີນຂອງແຂວງ ແລະ ທັງເພື່ອໃຫ້ສອດຄ່ອງກັບການຕົກລົງເຫັນດີຂອງການນຳພັກ-ລັດຂອງທັງສອງປະເທດໃນການປະກາດປີ 2019 ເປັນປີທ່ອງ ທ່ຽວລາວຈີນ.

 ຢູ່ແຂວງຫຼວງພະບາງ ແມ່ນມີສະຖານທີ່ທ່ອງທ່ຽວທີ່ໂດດເດັ່ນຢູ່ຈຳນວນ 228 ແຫ່ງ ໃນນັ້ນໄດ້ເປີດໃຫ້ນັກທ່ອງທ່ຽວເຂົ້າຊົມແລ້ວ 111 ແຫ່ງ, ສ່ວນອັນທີ່ເຫຼືອ ້ນັ້ນແມ່ນຕ້ອງໄດ້ປັບປຸງໃຫມ່ຕື່ມອີກ ເພື່ອໃຫ້ສອດຄ່ອງ ແລະເໝາະສົມເສຍກ່ອນ.

   ນອກນັ້ນ, ຍັງມີລີສອດ ແລະ ໂຮງແຮມອີກຫລາຍແຫ່ງເພື່ອຮອງຮັບນັກທ່ອງທ່ຽວ 90 ແຫ່ງ, ໃນນັ້ນ ກໍ່ມີຫຼາຍໂຮງແຮມທີ່ດຳເນີນທຸລະກິດ ໂດຍສອດຄ່ອງກັບ 7 ມາດຕະຖານອາຊຽນຄື :  ເປັນໂຮງແຮມສີຂຽວມາດຕະຖານ,  ທີ່ພັກ ກໍ່ມາດຕະຖານ, ໂດຍປະຊາຊົນມີສ່ວນຮ່ວມ, ມາດຕະຖານສປາອາຊຽນ ແລະ ອື່ນໆ, ໂດຍມີເຮືອນພັກ ປະມານ 350 ກ່ວາແຫ່ງ, ຮ້ານອາຫານທີ່ໄດ້ມາດຕະຖານ 50 ກ່ວາແຫ່ງ ແລະ ຮ້ານອາຫານທົ່ວໄປ 200 ກ່ວາແຫ່ງ.
   ສຳລັບກິດຈະກຳສຳລັຄບປີທ່ອງທ່ຽວລາວ-ຈີນ 2019 ນີ້, ທາງແຂວງໄດ້ຈັດໄວ້ເພື່ອຮອງຮັບເອົານັກທ່ອງທ່ຽວ, ເຊິ່ງຈະໄດ້ນຳພານັກທ່ອງທ່ຽວຮຽນຮູ້ວິຖີຊີວິດ, ວັດທະນະທຳອັນເກົ່າແກ່ຂອງປະຊາຊົນແຂວງຫຼວງພະບາງ, ພານັກທ່ອງທ່ຽວເຮັດອາຫານພື້ນບ້ານເຊັ່ນ: ເຮັດເອາະຫຼາມ, ແຈ່ວບອງ, ປະດິດດອກໄມ້ທີ່ເຮັດຈາກເຈັ້ຍສາ ແລະ ອື່ນໆ. ນອກນັ້ນຍັງໄດ້ຮ່ວມມືກັບສະຖາບັນຂົງຈື້ ທີ່ຕັ້ງຢູ່ມະຫາວິທະຍາໄລສຸພານຸວົງ ເພື່ອຊ່ວຍໃຫ້ບັນດາຫົວໜ່ວຍທຸລະກິດປະກອບການດ້ານໂຮງແຮມ, ເຮືອນພັກ, ຮ້ານອາຫານ ໃນການເຮັດລາຍການອາຫານເປັນພາສາ ຈີນ, ມີອາຫານຈີນໃນລາຍການອາຫານ, ມີຜູ້ນຳທ່ຽວທີ່ຮູ້ພາສາ ຈີນ , ລວມເຖິງປ້າຍບໍລິການຕ່າງໆ ເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວຊາວ ແລະຈີນທີ່ເຂົ້າມາທ່ຽວ ທີ່ແຂວງຫຼວງພະບາງ.

No comments

Powered by Blogger.