ສະຖານທຸດໄທຈັດງານມ່ວນຊື່ນ ສົງການໄທ - ປີໃໝ່ລາວ ປະຈຳປີ ພສ 2562



ເມື່ອວັນທີ 9 ເມສາ 2562 ສະຖານເອກອັກຄະຣາຊະທູດໄທ ທີ່ນະຄອນຫຼວງວຽງຈັນ ໄດ້ຈັດງານສົງການໄທ - ປີໃໝ່ລາວ ປະຈຳປີ 2562 ໂດຍມີຜູ້ແທນລະດັບສູງໃຫ້ກຽດເຂົ້າຮ່ວມ ໄດ້ແກ່ ທ່ານ ປອ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ປອ. ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, 




ທ່ານ ຫຽມ ພົມມະຈັນ ປະທານສະມາຄົມລາວ - ໄທເພື່ອມິດຕະພາບ ພ້ອມດ້ວຍພັນລະຍາ, ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ທ່ານນາງ ທິບພະກອນ ຈັນທະວົງ ຮອງລັດຖະມົນຕີກະຊວງການເງິນ 




ຝ່າຍໄທ ມີທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດ ທີ່ນະຄອນຫຼວງວຽງຈັນ ພ້ອມດ້ວຍພັນລະຍາ, ທ່ານ ຣົນນະໄຊ ຈິດວິເສດ ເຈົ້າແຂວງໜອງຄາຍ ພ້ອມດ້ວຍພັນລະຍາ, ທ່ານ ນັດທະວັດ ວິຣິຍານະພາພອນ ຮອງເຈົ້າແຂວງໜອງຄາຍ ພ້ອມດ້ວຍພັນລະຍາ, ທ່ານ ສຸຊົນ ໄພທິຣາດ ຮອງເຈົ້າແຂວງໜອງຄາຍ ພ້ອມດ້ວຍພັນລະຍາ ແລະ ທ່ານ ວັນໄຊ ຈັນພອນ ຮອງເຈົ້າແຂວງອຸດອນທານີ ພ້ອມດ້ວຍພັນລະຍາ. 





ນອກນັ້ນ, ຍັງມີຜູ້ແທນຈາກພາກສ່ວນຕ່າງໆ ຂອງໄທ ແລະ ສປປ.ລາວ, ຄະນະທູຕານຸທູດ ແລະ ອົງການລະຫວ່າງປະເທດ ນັກທຸລະກິດ, ຊຸມຊົນໄທ ແລະ ລາວ ເຂົ້າຮ່ວມຢ່າງຄຶ້ກຄື້ນ.



ກິດຈະກຳພາຍໃນງານປະກອບດ້ວຍພິທີບາສີສູ່ຂວັນ, ການຫົດນໍ້າຂໍພອນຜູ້ໃຫຍ່, ຫົດສົງພຣະພຸດທະຮູບ ການສະແດງສິລະປະຮ່ວມ ລະຫວ່າງຄະນະນັກສະແດງຈາກສະຖາບັນ ບັນດິດພັດທະນາສິນ ແລະ ວິທະຍາໄລສິລະປະສຶກສາ ສປປ.ລາວ ລວມທັງມີການເສບບັນເລງດົນຕີຮ່ວມສະໄໝ ໄທ - ລາວ ຈາກວົງດົນຕີ Bangkok Metropole ແລະ ແພັດ ເພັດດາວອນ ນັກຮ້ອງສາວຊາວລາວທີ່ໂດ່ງດັງຈາກການຄວ້າຕຳແໜ່ງຜູ້ຊະນະເລີດການປະກວດຮ້ອງເພັງໃນປະເທດໄທ ລວມທັງການຈັດສະແດງຂໍ້ມູນສົ່ງເສີມການທ່ອງທ່ຽວໄທ ແລະ ການເປັນປະທານອາຊຽນຂອງໄທໃນປີນີ້ ພາຍໃນໃຕ້ແນວຄິດ “ຮ່ວມມື ຮ່ວມໃຈ ກ້າວໄກ ຢັ້ງຢືນ” (“Advancing Partnership for Sustainability”) 




ນອກຈາກນີ້ ສະຖານເອກອັກຄະຣາຊະທູດ ຍັງໄດ້ຮັບການສະໜັບສະໜູນການຕັ້ງຮ້ານອາຫານ ແລະ ເຄື່ອງດື່ມ ລວມທັງລາງວັນພິເສດຈາກໜ່ວຍງານ ແລະ ພາກສ່ວນຕ່າງໆ ຂອງທັງໄທ ແລະ ລາວ ເພື່ອມອບໃຫ້ແກ່ຜູ້ໂຊກດີທີ່ມາຮ່ວມງານ. 




ການຈັດ ງານສົງການໄທ - ປີໃໝ່ລາວ ໃນປີນີ້ ໄດ້ດຳເນີນໄປດ້ວຍບັນຍາກາດທີ່ອົບອຸ່ນ, ມີສີສັນມ່ວນຊື່ນ ແລະ ໃນຂະນະດຽວກັນ ກໍ່ເປັນການສືບສານວັດທະນາທຳປະເພນີອັນດີງາມຂອງທັງສອງຊາດໄທ ແລະ ລາວມີຮ່ວມກັນ ແລະ ສະທ້ອນໃຫ້ເຫັນເຖິງຄວາມສາມັກຄີ ແລະ ຄວາມເປັນນໍ້າໜຶ່ງໃຈດຽວກັນຂອງຊຸມຊົນໄທຍ ແລະ ລາວ.


ພາບບັນຍາກາດ

















Post a Comment

0 Comments