Header Ads

ຄະນະຜູ້ແທນລາວຈະເຂົ້າຮ່ວມກອງປະຊຸມບີອາໄອຄັ້ງທີ 2 ຢູ່ຈີນອາທິດນີ້





ກອງປະຊຸມ ໜຶ່ງແລວ ໜຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ 2 (ບີອາໄອ) ຈະໄຂຂຶ້ນໃນວັນທີ 25-27 ເມສາ 2019 ນີ້ຢູ່ນະຄອນຫລວງ ປັກກິ່ງ ສປ ຈີນ ແລະ ຄາດວ່າ ຈະມີຜູ້ເຂົ້າຮ່ວມ ຫລາຍກວ່າ 5.000 ທ່ານ ຈາກ 150 ກວ່າປະເທດທົ່ວໂລກ, ຂະນະທີ່ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ຈະນໍາພາຄະນະຜູ້ແທນລາວ ເຂົ້າຮ່ວມ ກອງປະຊຸມດັ່ງກ່າວ. 

  ທ່ານ ຫວັງ ອີ້ ທີ່ປຶກສາແຫ່ງລັດ, ລັດຖະມົນຕີກະຊວງ ການຕ່າງປະເທດ ແຫ່ງ ສປ ຈີນ ໄດ້ແຈ້ງວາລະກອງປະຊຸມ ໜຶ່ງແລວໜຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ 2 ຕໍ່ສື່ມວນ ຊົນທັງພາຍໃນ ແລະ ຕ່າງປະເທດ ຢ່າງເປັນທາງການ ລະຫວ່າງການຖະແຫລງຂ່າວ ເມື່ອອາທິດຜ່ານ ມາວ່າ: ກອງປະຊຸມດັ່ງກ່າວຈະໄຂຂຶ້ນ ໃນວັນທີ 25 ເມສາຈົນ ເຖິງວັນທີ 27 ເດືອນດຽວກັນ ຢູ່ນະຄອນຫລວງປັກກິ່ງ ເຊິ່ງຈະມີບັນດາປະມຸກລັດ, ຄະນະຜູ້ແທນລະດັບສູງ, ອົງການຈັດຕັ້ງສາກົນ ລວມທັງສື່ມວນຊົນ ເຂົ້າຮ່ວມ 5.000 ທ່ານຈາກ 150 ປະເທດທົ່ວ ໂລກ. ຂະນະດຽວ ກັນ, ລັດຖະມົນຕີກະຊວງການຕ່າງ ປະເທດແຫ່ງ ສປ ຈີນ ຍັງກ່າວວ່າ: ຂໍ້ລິເລີ່ມ ໜຶ່ງແລວໜຶ່ງເສັ້ນທາງ ບໍ່ແມ່ນເຄື່ອງມືທາງ ພູມສາດດ້ານການເມືອງ ແລະ ບໍ່ແມ່ນກັບ ດັກໜີ້ສິນ ສໍາລັບປະເທດຕ່າງໆ ທີ່ເຂົ້າຮ່ວມໃນໂຄງການດັ່ງກ່າວ, ແຕ່ເປັນເວທີການຮ່ວມມື ແລະ ສິດຜົນປະໂຫຍດຕົວຈິງ ໂດຍ ຕ່າງຝ່າຍຕ່າງ ໄດ້ຮັບຜົນປະໂຫຍດຮ່ວມກັນ. ສປ ຈີນ ຢືນຢັນ ຈະບໍ່ນໍາເອົາສັນຍະລັກ ທີ່ກ່ຽວຂ້ອງກັບຄໍາກ່າວ ອ້າງທີ່ວ່າກັບດັກໜີ້ມານໍາໃຊ້ ຢ່າງເດັດຂາດ ແລະ ປະເທດຕ່າງໆ ທີ່ເຂົ້າຮ່ວມກໍບໍ່ ເຫັນດີເຫັນພ້ອມ. ດ້ວຍເຫດດັ່ງກ່າວ ຂໍ້ລິເລີ່ມ ໜຶ່ງແລວໜຶ່ງເສັ້ນທາງ ຈຶ່ງຕັ້ງຢູ່ບົນພື້ນ ຖານຄວາມຈິງ.

 ປັດຈຸບັນ,ມູນການຄ້າລະຫວ່າງ ສປ ຈີນ ກັບບັນດາປະເທດ ເຂົ້າຮ່ວມຂໍ້ລິເລີ່ມ ໜຶ່ງແລວໜຶ່ງເສັ້ນທາງ ບັນລຸຫລາຍແສນລ້ານ ໂດລາສະຫະລັດ, ການລົງທຶນເຕີບໃຫຍ່ບັນລຸ 80 ຕື້ກວ່າ ໂດລາສະຫະລັດ ທັງໄດ້ສ້າງວຽກເຮັດງານ ທໍາເຖິງ 300.000 ອາຊີບ. ຂະນະດຽວກັນກໍມີ 29 ອົງການ ຈັດຕັ້ງສາກົນ,126 ປະ ເທດພັດທະນາແລ້ວ-ພວມພັດທະນາ ໄດ້ເຂົ້າຮ່ວມໂຄງ ການນີ້ແຕ່ໄດ້ລົງນາມ ໃນເອກະສານຮ່ວມມື ຕົວຈິງກັບ ສປ ຈີນແລ້ວ 174 ສະບັບ.

  ທ່ານ ຫວັງ ອີ້ ຍັງຊີ້ແຈງຕື່ມວ່າ: ຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໂດຍທໍາມະຊາດ ແລ້ວຕ່າງຝ່າຍຕ່າງ ມີຜົນປະໂຫຍດ ແລະ ມີການເປີດກວ້າງ, ແຕ່ລະປະເທດມີເສລີພາບ ທີ່ຈະເຂົ້າຮ່ວມ ແລະ ຕົນຄິດວ່າບໍ່ມີປະເທດ ໃດມີສິດທີ່ຈະປົກປ້ອງ ກັນບໍ່ໃຫ້ປະເທດອື່ນເຂົ້າຮ່ວມ.

    ທ່ານ ສີ ຈິ້ນ ຜີງ ປະທານປະເທດແຫ່ງ ສປ ຈີນໄດ້ປະກາດຟື້ນຄືນ ເສັ້ນທາງສາຍໄໝ (ຂໍ້ລິເລີ່ມ ໜຶ່ງແລວໜຶ່ງເສັ້ນທາງ) ໃນປີ 2013 ແລະ ປະກາດອະນຸມັດງົບ ປະມານ 40 ຕື້ໂດລາສະຫະລັດ ຈັດຕັ້ງປະຕິບັດ ໂຄງການດັ່ງກ່າວໃນປີ 2014.

   ແນວໃດກໍດີໃນນາມ ຄະນະຜູ້ ສປປ ລາວ ທີ່ຈະເດີນທາງ ເຂົ້າຮ່ວມກອງປະຊຸມນີ້ ຈະສືບຕໍ່ເພີ່ມທະວີ ສາຍພົວພັນການຮ່ວມມື ແລະ ຍູ້ແຮງການພັດທະນາ ເສດຖະກິດ-ສັງຄົມ,ການຄ້າ, ການລົງທຶນ,ຄົມມະນາຄົມ,ການທ່ອງທ່ຽວ,ການໄປມາຫາສູ່ກັນ,ການແລກປ່ຽນວັດທະນະທໍາ ແລະ ອື່ນໆ. ທີ່ສຳຄັນຍັງເປັນການຮັດແໝ້ນ ໄມຕີຈິດມິດຕະພາບ, ຄວາມໃກ້ຊິດຕິດແທດ ສະໜິດສະໜົມ ຢ່າງສະເໝີຕົ້ນສະເໝີປາຍ ລະຫວ່າງສອງພັກສອງລັດ ກໍຄືປະຊາຊົນສອງຊາດ ລາວ-ຈີນ,ຈີນ-ລາວ ຕໍ່ການເສີມຂະຫຍາຍສາຍ ພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບ ຄູ່ຮ່ວມຍຸດທະສາດ ຮອບດ້ານໃຫ້ໝັ້ນຄົງຍາວນານ ຈະເລີນງອກງາມຍິ່ງໆ ຂຶ້ນຕາມທິດ 4 ດີຄື ເພື່ອນບ້ານທີ່ດີ, ເພື່ອນມິດທີ່ດີ,ສະຫາຍທີ່ດີ ແລະ ຄູ່ຮ່ວມມືທີ່ດີ.

   ສປປ ລາວແມ່ນ 1 ໃນ 126 ປະເທດທີ່ເຂົ້າຮ່ວມ ໂຄງການຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໂດຍສະເພາະໂຄງການ ກໍ່ເສັ້ນທາງລົດໄຟ ລາວ-ຈີນ ກໍແມ່ນ ໜຶ່ງໃນຄວາມພະຍາຍາມ ຂອງລາວ ຈະປ່ຽນສະຖານະພາບ ປະເທດບໍ່ຕິດຈອດກັບທະເລ ໃຫ້ກາຍເປັນປະເທດເຊື່ອມ ຈອດກັບປະເທດອື່ນໆ ໃນພາກພື້ນ ແລະ ສາກົນ. 

ພາບ-ຂ່າວ: ເກີດຂວັນໃຈ ມາລີຈັນສີ ລາຍງານຈາກປັກກິ່ງ ສປ ຈີນ.

No comments

Powered by Blogger.