Header Ads

ປກສ ໄຊທານີ ຈັບກຸ່ມລັກຊັບ 4 ກຸ່ມ ພ້ອມລົດຈັກ 10 ຄັນ



ໃນໄລຍະເດືອນກຸມພາ ຫາ ເດືອນມີນາ 2019 ເຈົ້າໜ້າທີ່ ປກສ ເມືອງໄຊທານີ ໄດ້ລົງມ້າງກຸ່ມແກ້ງລັກຊັບ ແລະ ຊື້-ຂາຍຊັບຜິດກົດໝາຍ ສາມາດຈັບໄດ້ 4 ກຸ່ມ, ມີ 9 ຄົນ ຍິງ 1 ຄົນ; ພ້ອມເກັບກູ້ຂອງກາງ ( ລົດຈັກ 10 ຄັນ ); ໃນນີ້ມີລົດຈັກເວບ 100 ຈໍານວນ7 ຄັນ, ລົດຈັກເວບໄອມີ 1 ຄັນ, ລົດຈັກ MSXມີ 1 ຄັນ ແລະ ລົດຈັກມີ  CBR 1 ຄັນ; ເຊິ່ງລົດຈັກຈໍານວນນີ້ແມ່ນໄດ້ມອບໃຫ້ເຈົ້າຂອງເດີມໃນວັນທີ 21 ມີນາ 2019 ໂດຍການມອບຂອງ ພັັຕ ບຸນມີ ແກ້ວພິມພາ ຫົວໜ້າພະແນກຕໍາຫຼວດ ປກສ ເມືອງໄຊທານີ ນະຄອນຫຼວງວຽງຈັນ.




ທ່ານ ຫົວໜ້າພະແນກຕໍາຫຼວດ ປກສ ເມືອງໄຊທານີ ໄດ້ໃຫ້ຮູ້ວ່າ:  ຜູ້ຖືກຫາທັງ 9 ຄົນໃນ 4 ກຸ່ມປະກອບມີ: ກຸ່ມທີ1 ມີທ້າວ ມັ່ງ ອາຍຸ ¬39 ປີ, ພັກເຊົາຢູ່ບ້ານໂນນບໍ່ແກ້ວ, ທ້າວ ນ້ອງ ອາຍຸ 20 ປີ ຢູ່ບ້ານລາດຄວາຍ, ນາງ ສຸນິສາ ອາຍຸ 17 ປີ, ຢູ່ບ້ານອຸດົມຜົນ, ທ້າວ ສຸທີນທອງ ອາຍຸ 33 ປີ ຢູ່ບ້ານເວີນຄໍາ  ທັງ 4 ຄົນແມ່ນຢູ່ເມືອງໄຊທານີ ນະຄອນຫຼວງວຽງຈັນ;  ເຊິ່ງພວກກ່ຽວໄດ້ເຄື່ອນໄຫວລັກຊັບຢູ່ໃນເຂດເມືອງໄຊທານີ ມາແລ້ວໄດ້ລັກລົດຈັກ 3 ຄັນ; ເຊິ່ງການລັກແຕ່ລະຄັ້ງແມ່ນໄດ້ແບ່ງໜ້າທີ່ກັນລະອຽດ ໂດຍ 3 ຄົນ, ຍິງ 1 ຄົນ ເຄື່ອນໄຫວຂີ່ລົດຈັກຊອກຫາລັກ, 2 ຄົນແມ່ນນໍາໄປຂາຍ( ຍັງຈັບບໍ່ໄດ້ 1 ຄົນ ).



ກຸ່ມທີ 2 ມີທ້າວ ຄໍາເກັ່ງ ອາຍຸ 33 ປີ, ຢູ່ບ້ານຮ່ອງແຊງ ເມືອງຈັນທະບູລີ, ທ້າວ ບຸນຕອມ ອາຍຸ 26 ປີ ບ້ານໄຊສົມບຸນ ເມືອງໄຊທານີ ນະຄອນຫຼວງວຽງຈັນ; ພວກກ່ຽວໄດ້ເຄື່ອນໄຫວລັກລົດຈັກໂດຍສະເພາະແມ່ນລົດຈັກເວບ 100 ຢູ່ໃນເຂດເມືອງໄຊທານີ ແລະ ບັນດາເມືອງໃນນະຄອນຫຼວງວຽງຈັນ;  ເຊິ່ງໄດ້ລັກມາແລ້ວຫຼາຍຄັ້ງ ແລະ ຄັ້ງສຸດທ້າຍແມ່ນລັກລົດຈັກ 5 ຄັນ. ໂດຍລັກແຕ່ລະຄັ້ງແມ່ນ 2 ຄົນລົງມືລັກ, ອີກ 3 ຄົນແມ່ນຮັບຊື້ ແລະ ນໍາໄປຂາຍຕໍ່ ( ຍັງຈັບບໍ່ໄດ້ 3 ຄົນ ).



 ສ່ວນກຸ່ມທີ 3 ມີທ້າວ ສັນຕິສຸກ ອາຍຸ 18 ປີ, ຢູ່ບ້ານຄໍາຮຸ່ງ ເມືອງໄຊທານີ ແມ່ນເປັນຄົນລົງມືລັກ ແລະ ເອົາໄປຂາຍໃຫ້ ທ້າວສະຫວັດ ອາຍຸ 23 ປີ, ບ້ານຫວ້ຍຫົງ ເມືອງຈັນທະບູລີ;  ເຊິ່ງທ້າວ ສະຫວັດ ແມ່ນໄດ້ຍອມຮັບວ່າໄດ້ຊື້ລົດຈັກນໍາທ້າວ ສັນຕິສຸກ ມາແລ້ວ 2 ຄັນ ແລະ ລາຍຄະດີທີ 4 ແມ່ນທ້າວ ແກ້ວໃສ ອາຍຸ 32ປີ, ພັກເຊົາຢູ່ບ້ານຄໍາຮຸ່ງ ເມືອງໄຊທານີ;  ເຊິ່ງໃນຄັ້ງວັນທີ 23 ມີນາ 2019, ເວລາປະມານ 22 ໂມງຜູ່ກ່ຽວໄດ້ໄປລັກລົດຈັກຮອນດາເວບ 100 ສີດໍາ-ແດງ ຢູ່ຮ້ານອິນເຕີເນັດແຖວບ້ານຄໍາຮຸ່ງ ເມືອງໄຊທານີ ແລ້ວໄປຕາມເສັ້ນທາງສາຍເໝືອ ເພື່ອນໍາລົດໄປຂາຍຢູ່ແຂວງຫຼວງພະບາງ ພໍໄປຮອດຂົວແຫ່ງໜຶ່ງເຂດເມືອງໂພນໂຮງ ແຂວງວຽງຈັນ ພົບເຫັນຕູບຢູ່ຂ້າງທາງບໍ່ມີໃຜຢູ່, ຈຶ່ງເຂົ້າໄປນອນພັກ, ແລ້ວກໍຖືກເຈົ້າໜ້າທີ່ຈັບຕົວພ້ອມລົດຈັກຄັນດັ່ງກ່າວ.



No comments

Powered by Blogger.