Header Ads

4 ແຂວງພາກໃຕ້ ໄດ້ຮັບການເຊື່ອມຊຶມບັນດາເອກະສານນິຕິກໍາກ່ຽວກັບວຽກງານການຄຸ້ມຄອງອົງການຈັດຕັ້ງສາກົນທີ່ບໍ່ສັງກັດລັດຖະບານ (INGOs) 


4 ແຂວງພາກໃຕ້ ໄດ້ຮັບການເຊື່ອມຊຶມບັນດາເອກະສານນິຕິກໍາກ່ຽວກັບວຽກງານການຄຸ້ມຄອງອົງການຈັດຕັ້ງສາກົນທີ່ບໍ່ສັງກັດລັດຖະບານ (INGOs) 

#ໂດຍ: ນາລີວັນ 
ກອງປະຊຸມເຜີຍແຜ່ເອກະສານນິຕິກໍາວ່າດ້ວຍການຄຸ້ມຄອງ INGOs ແລະຂໍ້ແນະນໍາການຈັດຕັ້ງປະຕິບັດມາດຕາ 55 ຂອງດໍາລັດວ່າດ້ວຍສະມາຄົມ ແລະມູນນິທິຮັບເອົາທຶນ, ຊັບສິນ ແລະຊ່ຽວຊານຈາກຕ່າງປະເທດ ໃຫ້ແກ່ພະແນກການຕ່າງປະເທດ 4 ແຂວງພາກໃຕ້ ໄດ້ມີຂຶ້ນໃນຕອນເຊົ້າວັນທີ 25 ເມສາ 2019 ນີ້ ຢູ່ທີ່ສະໂມສອນໃຫຍ່ຫ້ອງວ່າການປົກຄອງ ແຂວງ ເຊກອງ. ເຊິ່ງໃຫ້ກຽດເຂົ້າຮ່ວມເປັນປະທານຂອງທ່ານ ອານຸພາບ ວົງໜໍ່ແກ້ວ ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ ແລະທ່ານ ຖາວອນ ພົມມະໄລລຸນ ຄະນະປະຈໍາພັກແຂວງ, ຮອງເຈົ້າແຂວງ, ຜູ້ປະຈໍາການເຈົ້າແຂວງ ແຂວງ ເຊກອງ, ມີບັນດາຄະນະຫ້ອງວ່າການ, ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງພະແນກການອ້ອມຂ້າງ, ພະນັກງານຫຼັກແຫຼ່ງພະແນກການຕ່າງປະເທດ 4 ແຂວງພາກໃຕ້ ແລະສອງກໍາລັງປະກອບອາວຸດເຂົ້າຮ່ວມເຊື່ອມຊຶມ. 




ໃນກອງປະຊຸມຜູ້ເຂົ້າຮ່ວມໄດ້ຮັບຮູ້ເຊື່ອມຊຶມກ່ຽວກັບສະພາບລວມຂອງການເຄື່ອນໄຫວ ແລະຊ່ວຍເຫຼືອຂອງ INGOs ຢູ່ ສປປ ລາວ ແລະຮັບຮູ້ເຊື່ອມຊຶມກ່ຽວກັບເນື້ອໃນນິຕິກໍາວຽກງານການຄຸ້ມຄອງ INGOs ແລະຂໍ້ແນະນໍາການຈັດຕັ້ງປະຕິບັດມາດຕາ 55 ວັດສອງຂອງດໍາລັດວ່າດ້ວຍການອະນຸມັດໃຫ້ສະມາຄົມ ແລະມູນນິທິຮັບເອົາທຶນ, ຊັບສິນ ແລະຊ່ຽວຊານຈາກຕ່າງປະເທດ (CSO). 


ຈາກນັ້ນ, ຜູ້ເຂົ້າຮ່ວມກໍໄດ້ພ້ອມກັນສົນທະນາແລກປ່ຽນປະກອບຄຊາຄິດເຫັນ ເພື່ອເປັນການຖອດຖອນບົດຮຽນຮ່ວມກັນ ແລ້ວນໍາເອົາເນື້ອໃນຈິດໃຈດັ່ງກ່າວໄປຈັດຕັ້ງປະຕິບັດຢູ່ກົມກອງຂອງຕົນໃຫ້ມີຜົນສໍາເລັດ ແລະສອດຄ່ອງກັບສະພາບຄວາມເປັນຈິງ.

 ທັງນີ້, ກໍເພື່ອແນໃສ່ເຮັດໃຫ້ການຈັດຕັ້ງປະຕິບັດມາດຕາດັ່ງກ່າວມີຄວາມສະດວກ, ຖືກຕ້ອງ ແລະເປັນເອກະພາບກັນທົ່ວປະເທດ ເຮັດໃຫ້ການຄຸ້ມຄອງການຊ່ວຍເຫຼືອຂອງຕ່າງປະເທດມີປະສິດທິຜົນສູງ ແລະສອດຄ່ອງກັບແນວທາງນະໂຍບາຍກໍຄືແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ.

No comments

Powered by Blogger.