Header Ads

ສາເຫດລົດເມຕົກຂົວຫ້ວຍງູນ້ອຍ ຕາຍ 6 ສົບ ຍ້ອນ ໂຊເຟີຫຼັບໃນ




ໃນ​ຄືນ​ຂອງ​ວັນ​ທີ 20 ເມ­ສາ 2019 ເວ­ລາ​ປະ­ມານ 21:00 ໂມງ ລົດ­ເມ​ໂດຍ­ສານ​ສາຍ​ໃຕ້ 45 ບ່ອນ​ນັ່ງ (ວຽງ​ຈັນ-ປາກ​ເຊ) ໝາຍ​ເລກ​ທະ­ບຽນ ກຳ­ແພງ​ນະ­ຄອນ ບກ 7979 ໄດ້​ເດີນ­ທາງ​ແຕ່​ນະ­ຄອນ­ຫຼວງ​ວຽງ​ຈັນ​ລົງ​ປາກ​ເຊ ມີ​ຜູ້­ໂດຍ­ສານ​ຢູ່​ໃນ​ລົດ​ທັງ​ໝົດ 22 ຄົນ ພໍ​ມາ​ຮອດ​ເຂດ​ເມືອງ​ປາກ​ກະ­ດິງ ແຂວງ​ບໍ​ລິ​ຄຳ​ໄຊ ໄດ້​ເກີດ​ເສຍ​ຫຼັກ​ຕຳ​ຮາວ­ຮົ້ວ​ຂົວ​ຫາດ​ຊາຍ​ຄຳ​ແລ້ວ​ຕົກ­ລົງ​ຫ້ວຍ ເຮັດ​ໃຫ້​ມີ​ຜູ້​ເສຍ​ຊີ­ວິດ​ຄາ​ທີ່ ແລະ ບາດ­ເຈັບ​ສາ­ຫັດ​ຈຳ­ນວນ​ຫຼາຍ​ຄົນ.

ຜ່ານ​ການ​ສືບ­ສວນ-ສອບ​ສວນ​ຂອງ​ເຈົ້າ​ໜ້າ­ທີ່ ປກສ ເມືອງ​ປາກ​ກະ­ດິງ ຄາດ​ວ່າ: ສາ­ເຫດ​ແມ່ນ​ເກີດ​ຍ້ອນ​ຜູ້​ຂັບ​ຂີ່​ມີ​ຄວາມ​ອິດ­ເມື່ອຍ (ຫຼັບ​ໃນ) ແລ້ວ​ພາ­ໃຫ້​ລົດ­ເມ​ເສຍ​ຫຼັກ​ຫັກ​ໄປ​ຕຳ​ຮາວ­ຮົ້ວ​ຂົວ​ເບື້ອງ​ກົງ­ກັນ­ຂ້າມ​ກັບ​ທິດ​ທາງ​ເດີນ​ລົດ​ແລ້ວ​ຕົກ­ລົງ​ຫ້ວຍ ເຊິ່ງ​ມີ​ຄວາມ​ສູງ​ປະ­ມານ 8 ແມັດ ເຫດ­ການ​ດັ່ງ­ກ່າວ​ນີ້ ເຮັດ​ໃຫ້​ເກີດ​ຄວາມ​ສູນ​ເສຍ​ທາງ​ດ້ານ​ຊີ­ວິດ ແລະ ຊັບ​ສິນ​ຢ່າງ​ຫຼວງ­ຫຼາຍ ມີ​ຜູ້​ເສຍ​ຊີ­ວິດ​ທັງ​ໝົດ 6 ຄົນ ຍິງ 4 ຄົນ ແລະ ມີ​ຜູ້​ໄດ້​ຮັບ​ບາດ­ເຈັບ 16 ຄົນ ໃນ​ນີ້ ສາ­ຫັດ 5 ຄົນ.

ຜ່ານ​ການ​ສົມ­ທົບ​ກັບ​ເຈົ້າ​ໜ້າ­ທີ່ ປກສ ແລະ ວິ­ຊາ​ການ ຍທຂ ເມືອງ ລົງ​ສຳ​ຫຼວດ​ກວດ­ກາ​ຄວາມ​ສາ­ເຫດ​ຂອງ​ຂົວ​ທີ່​ເກີດ​ອຸ­ບັດ­ເຫດ​ຕຳ​ຮາວ​ຂົວ​ດັ່ງ­ກ່າວ​ນັ້ນ ສາ­ມາດ​ປະ​ເມີນ​ຄວາມ​ເປ່​ເພ​ເສຍ​ຫາຍ ແລະ ໜ້າ​ວຽກ​ໃນ​ການ​ສ້ອມ­ແປງ​ຄືນ ຄື: ເສົາ​ຂ້າງ​ຂົວ​ຫັກ​ຈຳ­ນວນ 9 ຕົ້ນ ແລະ ຮາວ​ພະ­ນັງ​ຂົວ​ຍາວ 60 ແມັດ ລວມ​ມູນ​ຄ່າ​ການ​ສ້ອມ­ແປງ​ປະ­ມານ 50 ລ້ານ​ກີບ.

ຂອບໃຈຂໍ້ມູນຈາກ: ນສພ ວຽງຈັນໃຫ່ມ

No comments

Powered by Blogger.