Header Ads

ບິນໄປສິງກະໂປສະດວກປະຢັດສຸດເລີ່ມມື້ນີ້ ໂດຍສາຍການບິນ"ສະກູ໊ດ"



--------
ລາວ-ສະກູ໊ດສາຍການບິນລາຄາປະຢັດຂອງສິງກະໂປ ທີ່ມີເປົ້າໝາຍປາຍທາງເຖິງ 67ຈຸດໃນ 19 ປະເທດທົ່ວໂລກ ໄດ້ເປີດຖ້ຽວບິນປະຖົມມະເລີກບິນຕົງມາຍັງ ສປປ ລາວເຮົາໃນມື້ນີ້ທີ 1ເມສາ 2019 ມີຈຸດໝາຍປາຍທາງທີ່ສິງກະໂປ, ນະຄອນຫລວງພະບາງ ຜ່ານນະຄອນຫວງວຽງຈັນ ດ້ວຍລາຄາເລີ່ມຕົ້ນຖືກສຸດພຽງ 65 ໂດລາ.

ທ່ານ ວີນັອດ ຄານັນ ປະທານເຈົ້າໜ້າທີ່ບໍລິຫານຝ່າຍການຄ້າ ຂອງສະກູ໊ດໄດ້ກ່າວໃນພິທີຖະແຫລງຂ່າວຕໍ່ສື່ມວນຊົນໃນວັນທີ 1ເມສາ 2019 ນີ້ວ່າ: ສະກູ໊ດໄດ້ສຶກສາຄວາມຕ້ອງການ ແລະຄວາມເໝາະສົມດ້ານການຕະຫລາດມາຍັງ ສປປ ລາວ ແລ້ວເຫັນວ່າມີຄວາມສາມາດຂະຫຍາຍການຕະຫລາດໃຫ້ກວ້າງອອກໄດ້ ຈິ່ງຕັດສິນໃຈເປີດເສັ້ນບິນມາລາວປ່ຽນແທນສາຍການບິນຊິວແອທີ່ເຄີຍບິນມາຍັງນະຄອນຫລວງພະບາງກ່ອນໜ້ານີ້.




ການໃຫ້ບໍລິການຂອງສະກູ໊ດແມ່ນຈະບິນ 3 ຖ້ຽວຕໍ່ອາທິດ ຄືວັນຈັນ, ພະຫັດ ແລະວັນເສົາ ຈາກນະຄອນຫລວງພະບາງ-ສິງກະໂປ(ຜ່ານນະຄອນຫລວງວຽງຈັນ), ສຳລັບລາຄາລວມອາກອນຊັ້ນປະຢັດຈາກນະຄອນຫລວງພະບາງຫາສິງກະໂປແມ່ນ 65ໂດລາຕໍ່ຖ້ຽວ, ນະຄອນຫລວງວຽງຈັນຫາສິງກະໂປແມ່ນ 75 ໂດລາ.

ສາຍການບິນສະກູ໊ດ ແມ່ນໄດ້ເລີ່ມໃຫ້ບໍລິການມາແຕ່ເດືອນມິຖຸນາປີ 2012 ແລະໄດ້ຊະນະຫລາຍລາງວັນເຊັ່ນ: ລາງວັນສາຍການບິນລາຄາປະຢັດທີ່ດີທີ່ສຸດ(ພາກພື້ນອາຊີ-ປາຊິກຟິກ)ຕັ້ງແຕ່ປີ 2015-2018 ໂດຍ AirlineRating.com ແລະ ຕິດ 10 ອັນດັບທຳອິດຂອງສາຍການບິນລາຄາທີ່ປະຢັດທີ່ດີທີ່ສຸດໃນໂລກປີ 2015    ແລະ 2018 ໂດຍ(Skytrax).

ດ້ວຍຄວາມນິຍົມຂອງລູກຄ້າທີ່ນັບມື້ເພີ່ມຂຶ້ນ ປະຈຸບັນສະກູ໊ດ ສາມາດຂະຫຍາຍເສັ້ນບິນໄປຍັງ 67 ປາຍທາງ ໃນ 19 ປະເທດທົ່ວໂລກ ນັ້ນໝາຍຄວາມວ່າ: ສາຍການບິນສະກູ໊ດ ນອກຈາກຈະບິນໂດຍກົງໄປສິງກະໂປແລ້ວ ນັກທ່ອງທ່ຽວຈາກລາວຍັງສາມາດໄປສູ່ຈຸດຫມາຍປາຍທາງອື່ນຯໄດ້ເຊັ່ນ: ອົດສະຕຣາລີ, ເກຼັກ, ເຢຍລະມັນ, ຈີນ ແລະບັນດາປະເທດສະມາຊິກອາຊຽນ.




ສະກູ໊ດໃນປະຈຸບັນມີຝຸງບິນທີ່ທັນສະໄຫມລຳໂຕກວ້າງ ລຸ້ນໂບອິ້ງ 787     Dreamliner   ຈຳນວນ 18 ລຳ, ເຮືອບິນຕະກຸນແອບັສ  A320 30 ລຳ ນອກນີ້ຍັງມີໂບອິ້ງ 787 ອີກ 4 ແລະ ແອບັສ  A320  ຈຳນວນ 37 ລຳກຳລັງຢູ່ໃນລະຫວ່າງການສັ່ງຊື້ ຫວັງຂະຫຍາຍເສັ້ນບິນເພີ່ມອີກ 15 ສາຍທາງໃນປະເທດອິນເດຍ, ຈີນ, ມາເລເຊຍ ແລະອິນໂດເນເຊຍ ພາຍໃນເຄິ່ງປີຫລັງຂອງປີ 2020.

ທ່ານ ໂດມີນິກໂກ ເອກອັກຄະລັດຖະທູດສິງກະໂປ ປະຈຳລາວ ໄດ້ກ່າວດ້ວຍຄວາມຫມັ້ນໃຈວ່າ: ຂ້າພະເຈົ້າເຊື່ອຫມັ້ນວ່າ ລາຄາຖ້ຽວບິນປະຢັດ ແລະການລິການທີ່ມີຄຸນນະພາບຂອງສະກູ໊ດຈະຊ່ວຍເສີມສ້າງທຸລະກິດ ແລະການທ່ອງທ່ຽວສອງປະເທດລາວ-ສິງກະໂປໃຫ້ມີບາດກ້າໃໝ່. ພ້ອມດຽວກັນຄົນລາວ ແລະຄົນຕ່າງປະເທດທີ່ເຮັດວຽກຢູ່ລາວຈະມີຄວາມສະດວກຫລາຍຂຶ້ນໃນການໃຊ້ເວລາທ້າຍອາທິດ ຫລື ຊ່ວງພັກວຽກຍາວໄປພັກຜ່ອນຢູ່ສິງກະໂປໄດ້ຢ່າງສະບາຍໃຈ.

No comments

Powered by Blogger.