Header Ads

7 ນິໃສພາທຸກ! ຖ້າບໍ່ຢາກເປັນຫນີ້ຖ້ວມຫົວຄວນເລີກດ່ວນ



1. ຊີວິດຕິດຫລູ ຊື້ຂອງແພງ:

ເຫັນໄດ້ຊັດເລີຍວ່າປະຈຸບັນຫລາຍຄົນມີຄ່ານິຍົມຕິດຫລູ ທຸກຢ່າງຕ້ອງເບິ່ງແພງ ແບນເນມຕ້ອງເບິ່ງແພງ ຕ້ອງດື່ມກາເຟ ກິນຂະຫນົມ ກິນອາຫານຫ້າງດັງໆ ເທຮນໃດກໍາລັງຮິດ ກໍາລັງມາ ຄົນ Gen Y ບໍ່ເຄີຍພາດ ເຖິງຈະຕ້ອງແຖວຍາວຢຽດເພື່ອຊື້ສິນຄ້າທີ່ຕ້ອງການກໍ່ຍອມ ຍຸກນີ້ທຸກສິ່ງທຸກຢ່າງເບິ່ງລໍ້ຕາລໍ້ໃຈລໍ້ເງິນອອກຈາກກະເປົາໄປຫມົດ ເຊິ່ງກໍ່ຄົງບໍ່ຜິດທີ່ຫລາຍຄົນຈະມັກໃຊ້ຊີວິດແບບນີ້ ຖ້າມີເງິນຫລາຍພໍ ແລະ ບໍ່ໄດ້ໃຊ້ຈ່າຍເກີນໂຕ ແຕ່ທີ່ເຫັນສ່ວນຫລາຍມັກຈະບໍ່ແມ່ນແບບນັ້ນ ມີຫລາຍຄົນທີ່ເງິນເດືອນພຽງຫລັກຫມື່ນບາດ ແຕ່ໄປໃຊ້ຊີວິດແບບຄົນມີເງິນເດືອນຫລັກແສນບາດ ຢາກມີ ຢາກໄດ້ຄືຄົນອື່ນເຂົາ ເລີຍຕ້ອງໄປກູ້ຢືມເງິນໃນອະນາຄົດຈາກບັດເຄດິດມາ ຈຶ່ງເປັນສາເຫດສໍາຄັນເລີຍວ່າເປັນຫຍັງຄົນ Gen Y ຈຶ່ງເປັນຫນີ້ຫລາຍຂະຫນາດນີ້ ເຊິ່ງລ້າລົດໆການໃຊ້ຊີວິດຕິດຫລູແບບນີ້ລົງໄປໄດ້ແດ່ ກໍ່ຄົງບໍ່ຕ້ອງມານັ່ງເຈັບຫົວກັບຫນີ້ທີ່ຕ້ອງຈ່າຍດອກ


2. ບ້າເທັກໂນໂລຢີ້:

ສະມາດໂຟນ ກ້ອງຖ່າຍຮູບ ແກດເຈັກຕ່າງໆ ເປັນສິ່ງທີ່ຂາດບໍ່ໄດ້ເລີຍກັບຄົນ Gen Y ເຊິ່ງຂອງເຫລົ່ານີ້ລາຄາກໍ່ບໍ່ໄດ້ຖືກ ວາງຂາຍແປັບດຽວກໍ່ຕົກລຸ້ນ ຂອງເກົ່າກໍ່ລາຄາຕົກ ແຕ່ກໍ່ເຫັນຫລາຍຄົນຊື້ກັນ ບາງຄົນຊື້ມືຖືມາບຶດດຽວພໍເຫັນລຸ້ນໃຫມ່ອອກມາກໍ່ປ່ຽນກັນແລ້ວ ແລ່ນຕາມເທັກໂນໂລຢີ້ທີ່ບໍ່ໄດ້ເບິ່ງເລີຍວ່າມີຄວາມຈໍາເປັນຫລືບໍ່ ຫລາຍຄົຍເສຍເງິນຫລາຍເພື່ອຈະໄດ້ລຸ້ນທ໊ອບ ອ໊ອບຊັນສູງ ແຕ່ກັບໃຊ້ບໍ່ໄດ້ເຕັມປະສິດທິພາບ ຊື້ມາພຽງແຕ່ຕາມກະແສ ເຫັນຄົນອື່ນມີເລີຍຢາກມີ ແຕ່ລືມເບິ່ງເງິນໃນກະເປົາວ່າເກືອບບໍ່ເຫລືອ ຕ້ອງມາຫນັກໃຈຕອນຜ່ອນແຕ່ລະເດືອນອີ ແບບນີ້ກໍ່ບໍ່ໄຫວຄືກັນ


3. ຕິດໂຊຊຽວມີອັນໃດຕ້ອງອວດຕ້ອງໂຊ:

ທຸກວັນນີ້Social Media ເກືອບຈະເຂົ້າມາເປັນສ່ວນຫນຶ່ງໃນຊີວິດຂອງເຮົາໄປແລ້ວ ມີອັນໃດຕ້ອງໂພດ ຕ້ອງອວດໃຫ້ໂລກຮູ້ ເພື່ອສະແດງໃຫ້ຄົນອື່ນເຫັນວ່າຊີວິດດູດີມີຄວາມຸກ ທັງທີ່ຈິງແລ້ວອາດຈະບໍ່ໄດ້ເປັນແບບຮູບທີ່ໂພດຫນ້າເຟດບຸກເລີຍກໍ່ໄດ້ ແຕ່ກໍ່ສືບເນື່ອງມາຈາກຊີວິດຕິດຫລູຢ່າງທີ່ບອກໄປແລ້ວໃນຂໍ້ແລກ ເຮັດໃຫ້ຫລາຍຄົນເຖິງຂະຫນາດຕ້ອງເປັນຫນີ້ເປັນສິນ ເພື່ອປົນເປີຊີວິດຂອງໂຕເອງ ຢ່າງການໄປນັ່ງກິນອາຫານຮ້ານຫລູເກືອບຈະທຸກມື້ ຊ໊ອບປີ້ງແຕ່ຂອງແບນເນມ ໃຊ້ສະມາດໂຟນລຸ້ນໃຫມ່ໆຕະຫລອດເວລາ ໄປທ່ຽວຕ່າງປະເທດທຸກຄັ້ງກໍ່ພັກໂຮງແຮມຫ້າດາວ ໂດຍທີ່ໂຕເອງບໍ່ໄດ້ມີເງິນເປັນຖົງເປັນຖັງ ແຕ່ຢາກຖ່າຍຮູບໂຊຫມູ່ ເຊິ່ງບອກເລີຍວ່າຖ້າບໍ່ຢຸດພຶດຕິກໍາແບບນີ້ບໍ່ມີທາງທີ່ຈະເກັບເງິນໄດ້ແນ່ນອນ


4. ໃຊ້ບັດເຄດິດຈົນເກີນໂຕ:

ປັນຫາຫລັກທີ່ເຮັດໃຫ້ຄົນ Gen Yເປັນຫນີ້ກັນຫລາຍຂະຫນາດນີ້ສາເຫດຫນຶ່ງກໍ່ມາຈາກບັດເຄດິດ ເຊິ່ງຮູ້ບໍ່ວ່າໃນແຕ່ລະປີມີບັດເຄດິດອອກໃຫມ່ປະມານ 2 ລ້ານບັດ ແລະ ກວ່າ 50%ເປັນການອະນຸມັດໃຫ້ກຸ່ມ Gen Yເຮັດໃຫ້ປະຈຸບັນຄົນກຸ່ມນີ້ມີບັດເຄດິດສະເລ່ຍແລ້ວ 3-4 ບັດ/ຄົນ ນໍາມາສູ່ການໃຊ້ຈ່າຍທຸກຢ່າງດ້ວຍບັດເຄດິດແບບເກີນໂຕ ອັນໃດກໍ່ຮູດໄດ້ ຮູດຫມົດ ເຊິ່ງເປັນສິ່ງທີ່ອັນຕະລາຍຫລາຍບາງຄົນໃຊ້ຈ່າຍໂດຍບໍ່ໄດ້ເບິ່ງຄວາມສາມາດຂອງໂຕເອງວ່າຈະຫາເງິນມາຊໍາລະໄດ້ຫລືບໍ່ ຕໍ່ໃຫ້ເລືອກຜ່ອນແບບ 0%ກໍ່ຕາມ ແຕ່ນີ້ຄືກັບດັກລວງຕາເຫັນໆເລີຍ ເພາະພໍເຫັນຈໍານວນເງິນທີ່ຕ້ອງຈ່າຍຕໍ່ເດືອນພຽງຫນ້ອຍດຽວກໍ່ເຮັດໃຫ້ເຮົາກ້າຊື້ ກ້າຈ່າຍຫລາຍຂື້ນ

5. ຂາດເປົ້າຫມາຍໃນການເກັບອອມ:

ຫລາຍຄົນເຮັດວຽກມີເງິນເດືອນ ແຕ່ບໍ່ເຄີຍຕັ້ງເປົ້າຫມາຍໃນການອອມເລີຍ ເຮັດໃຫ້ໃຊ້ເງິນໄປວັນໆ ໂດຍບໍ່ໄດ້ຄິດເຖິງແຜນໄລຍະຍາວ ເພາະສະນັ້ນຄົນ Gen Yທີ່ຢາກຈະມີເງິນເກັບ ບໍ່ເປັນຫນີ້ ອັນດັບແລກເລີຍຄວນຕັ້ງເປົ້າຫມາຍໃນການເກັບອອມເງິນກ່ອນ ໂດຍຕ້ອງຕອບໂຕເອງໃຫ້ຊັດເຈນວ່າເຮົາຈະອອມເງິນໄປເພື່ອອັນໃດ ແບ່ງເປັນສັດສ່ວນໃຫ້ຊັດເຈນ ແລະ ກໍາຫນົດວ່າພາຍໃນຈັກປີມີເງິນເກັບເທົ່າໃດເຊັ່ນ: ພໍເງິນເດືອນອອກກໍ່ຖອນອອກມາເລີຍຈັກ 10%ຫລາຍກວ່ານັ້ນ ແລ້ວເອົາໄປຝາກໄວ້ອີກບັນຊີຫນຶ່ງທີ່ຖອນຍາກ ລອງເຮັດແບບນີ້ທຸກໆເດືອນ ເຊື່ອເລີຍວ່າມື້ຫນຶ່ງເຮົາຈະຫົວໃຈສົດຊື່ນເມື່ອເຫັນໂຕເລກໃນບັນຊີທີ່ເພີ້ມຂື້ນເລື້ອຍໆຈົນຫນ້າຕົກໃຈ


6. ແລ່ນຕາມສິນລະປິນ:

ຄົນ Gen Yເປັນກຸ່ມທີ່ມັກໃຊ້ຊີວິດຢ່າງມີຄວາມສຸກ ຫາຄວາມສຸກໃຫ້ໂຕເອງຕະຫລອດເວລາ ຈຶ່ງເຫັນວ່າຫລາຍຄົນພໍມີເງິນແດ່ກໍ່ເອົາໄປຈ່າຍໃຫ້ກັບສິນລະປິນທີ່ໂຕເອງມັກ ເຊິ່ງກໍ່ບໍ່ຜິດອັນໃດຖ້າມັນບໍ່ຫລາຍເກີນໄປ ແຕ່ກັບບາງຄົນຈັດເຕັມທຸກຢ່າງ ທັງບັດຄອນເສີດ ທັງປ້າຍໄຟ ເຫັນອັນໃດກໍ່ຊື້ຫມົດ


7. ຢາກລວຍໄວ ແຕ່ຂາດຄວາມຮູ້ທາງການເງິນ:

ໃຜໆກໍ່ຢາກລວຍກັນທັງນັ້ນ ໂດຍສະເພາະກຸ່ມ Gen Yທີ່ມີນິໃສຢາກມີທຸລະກິດເປັນຂອງໂຕເອງຕັ້ງແຕ່ໄວຫນຸ່ມ ຫລື ບາງຄົນເລີ້ມລົງທຶນຕັ້ງແຕ່ຍັງຮຽນບໍ່ຈົບກໍ່ມີ ເຊິ່ງຖືເປັນສິ່ງທີ່ດີ ເພາະຍິ່ງເລີ້ມກ່ອນ ກໍ່ຍິ່ງໄດ້ປຽບ ແຕ່ກໍ່ພົບວ່າມີຫລາຍຄົນເລີຍທີ່ຮີບລົງທຶນ ຮີບເຮັດທຸລະກິດ ແຕ່ຂາດຄວາມຮູ້ ຄວາມເຂົ້າໃຈໃນສິ່ງທີ່ເຮັດ ສຸດທ້າຍກໍ່ບໍ່ປະສົບຄວາມສໍາເລັດດັ່ງທີ່ຫວັງ ຈຶ່ງຂໍຝາກໄວ້ວ່າການສຶກສາຫາຄວາມຮູ້ເປັນສິ່ງທີ່ສໍາຄັນຫລາຍ ຫາກຄິດວ່າໂຕເອງຍັງມີຄວາມຮູ້ບໍ່ຫລາຍພໍກໍ່ຢ່າຟ້າວຄິດລົງທຶນອັນໃດຈະດີກວ່າ ເກັບເງິນໄວ້ລໍມື້ທີ່ເຮົາພ້ອມແທ້ໆກ່ອນ ຫລື ອາດເລືອກລົງທຶນແບບທີ່ຍັງບໍ່ສ່ຽງຫລາຍໄປກ່ອນເຊັ່ນ: ຝາກເງິນໃນບັນຊີຝາກປະຈໍາ ຊື້ພັນທະບັດລັດຖະບານ ຊື້ສະຫລາກອອມຊັບ ລົງທຶນໃນກອງທຶນລວມ ຫລື ລົງທຶນໃນຮຸ້ນເປັນຜົນດີໃນຈັງຫວະດີໆກໍ່ຫນ້າຈະໄດ້

ໂດຍ > ສຸຣິດທິເດດ ບຸດດາວົງ

No comments

Powered by Blogger.