Header Ads

ຈັບຢາໄອ້ 726 ກິໂລ ຂົນມານໍາລົດຕູ້ ທີ່ບັງເອີນປະສົບອຸບັດຕິເຫດຕໍາລົດຈັກ! ຄົນຂັບລົດຕູ້ຍັງລົບໜີ



ລົດຕູ້ສະຕາແລັກ ສີປອນເງິນ ບໍ່ມີປ້າຍທະບຽນ ຂົນຢາເສບຕິດ ປະເພດຢາໄອສ໌ ຈຳນວນ 29 ເປົາ ລວມມີ 726 ຖົງ ໜັກ 726 ກິໂລກຼາມ ເກີດອຸບັດຕິເຫດຕຳທ້າຍລົດຈັກທີ່ຈອດຢູ່ແຄມທາງເຂດບ້ານຄັງໄຂ ເມືອງແປກ ແຂວງຊຽງຂວາງ ແລ້ວຂັບຂີ່ຫຼົບໜີໄປໄດ້ປະມານ 3 ກິໂລແມັດ ລົດໄດ້ເສຍຫຼັກເຈີດຕຳກັບຟຸ່ມໄມ້ແຄມທາງຢູ່ເສັ້ນທາງ 7A ເຂດບ້ານດ່ອງ, ກ່ອນເຈົ້າຂອງລົດຈັກທີ່ເສຍຫາຍນຳໄປພົບເຫັນ ແລ້ວແຈ້ງໃຫ້ເຈົ້າໜ້າທີ່ເຂົ້າກວດກາຈຸດເກີດເຫດ ພົບເຫັນຢາເສບຕິດຈຳນວນດັ່ງກ່າວ.




ເຈົ້າໜ້າທີ່ ປກສ ແຂວງຊຽງຂວາງ ເປີດເຜີຍວ່າ: ເຫດການດັ່ງກ່າວເກີດຂຶ້ນໃນວັນທີ 30 ມີນາ ທີ່ຜ່ານມາ, ເຊິ່ງມີ ທ້າວ ເຈີລໍ່ ອາຍຸ 25 ປີ ບ້ານຫ້ວຍເຖົ້າ ເມືອງໜອງແຮດ ແຂວງຊຽງຂວາງ ພັກເຊົາຢູ່ເມືອງແປກ ໄດ້ຂີ່ລົດຈັກ ເວັບສີແດງດໍາ (ບໍ່ທັນຕິດປ້າຍ), ເຊິ່ງເປັນລົດຊື້ໃໝ່ ແລ້ວໄປຫາພີ່ນ້ອງຢູ່ບ້ານຍອດງື່ມ ເມືອງແປກ. ພໍໄປຮອດເຂດບ້ານຄັງໄຂ ກໍໄດ້ຈອດລົດຈັກໄວ້ຢູ່ແຄມທາງ ແລ້ວລົງລົດໄປຖ່າຍເບົາ.





ໃນເວລານັ້ນ, ໄດ້ມີລົດຕູ້ຮຸນໄດສະຕາແລັກ ຂັບຂີ່ດ້ວຍຄວາມໄວມາແຕ່ທາງເມືອງແປກ ເຈີດມາຕໍາທ້າຍລົດຈັກຂອງຜູ້ກ່ຽວຟົ້ງລົງຮອງລະບາຍນໍ້າ ແລ້ວ ລົດຕູ້ຄັນດັ່ງກ່າວ ກໍຂັບຂີ່ຫຼົບໜີໄປທາງເມືອງຄໍາ. ຈາກນັ້ນ, ໄດ້ມີລົດຟໍຈຸນເນີ ຂັບຂີ່ຜ່ານມາຈຸດເກີດເຫດ ທ້າວ ເຈີລໍ່ ຈຶ່ງຂໍຄວາມຊ່ວຍເຫຼືອຂີ່ລົດໄປນໍາ ເພື່ອຈະໄປລົງຢູ່ບ້ານຍອດງື່ມ, ພໍຂີ່ໄປປະມານ 3 ກິໂລແມັດ ຮອດເຂດບ້ານດອງ ກໍພົບເຫັນລົດຕູ້ສະຕາແລັກຄັນດັ່ງ ກ່າວຕໍາຕາຝັງແຄມທາງ ແຕ່ຜູ້ຂັບຂີ່ໄດ້ຫຼົບໜີໄປກ່ອນແລ້ວ. ຈຶ່ງແຈ້ງໃຫ້ເຈົ້າໜ້າທີ່ຕໍາຫຼວດຈະລາຈອນ ປະຈໍາປ້ອມຄັງໄຂ ເຂົ້າກວດກາພົບເຫັນ ຢາໄອສ໌ ຈຳນວນ 29 ເປົາ ລວມມີ 726 ຖົງ ໜັກ 726 ກິ ໂລກຼາມ.





ປັດຈຸບັນ, ເຈົ້າໜ້າທີ່ຕຳຫຼວດ ກຳລັງດໍາເນີນການກວດສອບຫາເຈົ້າຂອງລົດຕູ້ຄັນດັ່ງກ່າວ ເພື່ອຈະໄດ້ຕິດຕາມຕົວມາສອບສວນຫາທີ່ມາຂອງຢາໄອສ໌ ຈໍານວນດັ່ງກ່າວ ແລະ ຂະຫຍາຍຜົນຕິດຕາມຈັບຜູ້ທີ່ມີການພົວພັນໃນການຊື້-ຂາຍຢາເສບຕິດໃນຄັ້ງນີ້ ໄປດໍາເນີນຄະດີຕາມກົດໝາຍ. ຂອບໃຈຂໍ້ມູນຈາກ: ນສພ ຄວາມສະຫງົບ

No comments

Powered by Blogger.