Header Ads

ອາລາດທະນາອັງເຊີນອົງພຣະບາງ ພຸດທະລາວັນ ລົງຫົດສົງໃນໂອກາດບຸນປີໃໝ່ລາວ:




   ໃນຕອນເຊົ້າວັນທີ່ 17 ເມສາ 2019, ປະຊາຊົນລາວບັນດາເຜົ່າ ໂດຍສະເພາະແມ່ນ ຊາວນະຄອນ ຫຼວງພະບາງ, ເມືອງມໍລະດົກໂລກ ໄດ້ຈັດຕັ້ງພິທີ ອາລາດຖະນາອົງພຣະບາງ ພຸດທະລາວັນ, ອົງພຣະທີ່ສັກສິດ ອັນເປັນທີ່ເຄົາລົບນົບໄຫ້ວ ຂອງປວງຊົນລາວທັງຊາດລົງຈາກຫໍພະບາງ ເພື່ອໃຫ້ຊາວພຸດທະສາຊະນິກະຊົນ ໄດ້ຫົດສົງ ຢູ່ວັດໃໝ່ສຸວັນນະພູມມາຣາມ ເນື່ອງໃນໂອກາດບຸນກຸດສົງການປີໃໝ່ລາວປີນີ້.

 ພິທີອາຣາດຖະນາ ດັ່ງກ່າວ ໄດ້ເລີ່ມຕົ້ນຂຶ້ນດ້ວຍການທໍາພິທີທາງສາສະໜາ, ໂດຍບັນດາພະເຖລານຸເຖລະ ໄດ້ນຳພາຊາວພຸດທະສາຊະນິກະຊົນ ກ່າວຄຳອາລາດຖະນາອົງພຣະບາງ ເຄື່ອນຍ້າຍຈາກຫໍພະບາງ ໄປປະດິດສະຖານຢູ່ຫໍສົງ ທີ່ວັດໃໝ່ສຸວັນນະພູມມາລາມ, ເພື່ອໃຫ້ປະຊາຊົນ ແລະ ແຂກພາຍໃນ ແລະ ຕ່າງປະເທດ ໄດ້ຫົດສົງ.

   ຈາກນັ້ນ, ກໍ່ໄດ້ອັງເຊີນອົງພະບາງ ຂື້ນປະທັບໃນຫວໍ່ເທິງລາດສະລົດ ແລະ ໄດ້ມີຂະບວນແຫ່ ເຄື່ອນຈາກຫໍພຣະບາງ ໃນຫໍພິພິດທະພັນແຫ່ງຊາດຫຼວງພະບາງ ສູ່ວັດໃໝ່ສຸວັນນະພູມມາລາມ, ຕັ້ງຕົ້ນຂະບວນດ້ວຍຂະບວນທຸງຊາດ, ທຸງສາສະໜາ, ຂະບວນເສບດົນຕີພື້ນເມືອງ, ຂະບວນພາມມະນາຈານ, ຂະບວນເປົ່າຫອຍສັງ, ແລະຂະບວນການນໍາເຊີ່ງນໍາໂດຍ ທ່ານສົມສະຫວາດ ເລັ່ງສະຫວັດ, ທີ່ປຶກສາຄະນະບໍລິຫານງານສູນກາງພັກ ສະໄໝທີ່ 10, ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ, ຂະບວນພະສົງສຳມະເນນ, ຂະບວນກອງຄຸມ, ທຽນອາດ, ລາດສະລົດພະບາງ ແລະ ຂະບວນມວນຊົນທົ່ວໄປ.    ແຕ່ລະຂະບວນ ແມ່ນໄດ້ສ້າງຄວາມປະທັບໃຈໃຫ້ແກ່ບັນດາແຂກທີ່ໄດ້ເຂົ້າຮ່ວມງານ ເປັນຢ່າງດີ, ໂດຍທຸກຄົນຕ່າງກໍ່ມີຄວາມເບີກບານມ່ວນຊື່ນ ມີໃບໜ້າທີ່ຍີ້ມແຍ້ມ ແຈ່ມໃສດີ.

   ພໍຮອດວັດໃໝ່ສຸວັນນະພູມມາລາມແລ້ວ, ກໍ່ໄດ້ອັງເຊີນອົງພະບາງປະທັບໃນຫໍສົງ; ຈາກນັ້ນ, ບັນດາພະເຖລານຸເຖລະ ກໍ່ໄດ້ນຳພາຊາວພຸດທະສາຊະນິກກະຊົນ ກ່າວຄຳຄາລະວະແດ່ອົງພຣະບາງ ແລະ ຟັງທໍາມະເທດສະໜາແລ້ວ ຈຶ່ງໄດ້ດຳເນີນການຫົດສົງອົງພະບາງ ຢ່າງເປັນທາງການ.
  ການຫົດສົງອົງພຣະບາງ ຈະໄດ້ດຳເນີນເປັນເວລາ 3 ມື້ 3 ຄືນ ຈົນເຖີງວັນທີ່ 20 ເມສາ ຈື່ງຈະມີພິທີອາລາດຖະນາອັງເຊີນ ອົງພຣະບາງຂື້ນປະດິດສະຖານໄວ້ຫໍພະບາງຕາມເດີມ.

  ສໍາລັບຕອນຄໍ່າ, ກໍ່ຈະມີການຄົບງັນຕາມປະເພນີ ພ້ອມທັງ ຊົມການສະແດງສິລະປະ-ວັນນະຄະດີ ຈາກນັກສະແດງຂອງໂຮງລະຄອນພະລັກພະລາມຕື່ມອີກ.

ຂ່າວ,: ອາພຸດເດດ​ ​ບຸບຜາ

No comments

Powered by Blogger.