Header Ads

ອັງເຊີນອົງພຣະບາງພຸດທະລາວັນ ກັບຄືນປະດິດສະຖານທີ່ຫໍພະບາງ



ການຫົດສົງອົງພະບາງພຸດທະລາວັນ ອົງພະທີ່ສັກສິດ ແລະ ເປັນທີ່ເຄົາລົບນົບໄຫວ້ສູງທີ່ສຸດອົງຫນຶ່ງຂອງປວງຊົນລາວທັງຊາດ ເນື່ອງໃນໂອກາດບຸນຕຸດສົງການປີໃໝ່ລາວ ພສ 2562 ໄດ້ສໍາເລັດລົງຢ່າງເປັນທາງການ ພາຍຫຼັງທີ່ໄດ້ອັງເຊີນລົງຈາກຫໍພະບາງໃນຫໍພິພິດທະພັນແຫ່ງຊາດຫຼວງພະບາງ ມາຫົດສົງຢູ່ວັດໃໝ່ ສຸວັນນະພູມມາລາມ ແຕ່ວັນທີ່ 17 ເມສາ 2019 ຜ່ານມາ.   




ພິທີອາລາດຖະນາອັງເຊີນອົງພະບາງ ກັບຄືນປະທັບທີ່ຫໍພະບາງຕາມເດີມ ແມ່ນໄດ້ຈັດຂື້ນໃນຕອນເຊົ້າຂອງວັນທີ່ 20 ເມສາ 2019, ເຊີ່ງພິທີໄດ້ເລີ່ມຕົ້ນດ້ວຍການທຳພິທີທາງສາສະໜາ ໂດຍພະເຖລານຸເຖລະນຳພາອອກຕົນຍາດໂຍມ ແລະ ຊາວພຸດທະສາ ຊະນິກະຊົນທີ່ເຂົ້າຮ່ວມ ກ່າວຄຳ ອາລາດຖະນາອົງພະບາງອັງເຊີນອົງພະບາງກັບຄືນສູ່ຫໍພະບາງ. 

ຈາກນັ້ນ ກໍ່ໄດ້ອັງເຊີນອົງພະບາງພຸດທະລາວັນ ຂື້ນປະທັບໃນຫວໍ່ເທິງລາດສະລົດ ແລ້ວໄດ້ມີຂະບວນແຫ່ ຈາກວັດໃໝ່ສຸວັນນະພູມມາລາມ ສູ່ຫໍພະບາງໃນຫໍພິພິດທະພັນແຫ່ງຊາດຫຼວງພະບາງ; ຂະບວນແຫ່ແມ່ນປະກອບດ້ວຍຂະບວນທຸງຊາດ, ທຸງສາສະໜາ, ຂະບວນເສບດົນຕີພື້ນເມືອງ, ຂະບວນພາມມະນາຈານ, ຂະບວນເປົ່າຫອຍສັງ-ເປົ່າແຄນ-ເປົ່າຄຸ່ຍ-ຕີລະຄັງ, ຂະບວນການນຳຂັ້ນແຂວງ, ຂັ້ນນະຄອນ-ເມືອງ ເຊີ່ງນຳໂດຍ ທ່ານ ຄຳຂັນ ຈັນທະວີສຸກ, ເຈົ້າແຂວງໆຫຼວງພະບາງ, ຂະບວນສຳມະເນນ-ພະສົງ, ຂະບວນພະເຖຣະ 9 ອົງ, ຂະບວນກອງຄຸມ, ບຸດສະບົກ ຫຼື ລາດສະລົດພະບາງ ແລະ ຂະບວນມວນຊົນທົ່ວໄປ. 




ແຕ່ລະຂະບວນແມ່ນ ມີເອກະລັກແບບດັ້ງເດີມ ຮັກສາໄດ້ມູນເຊື້ອທາງດ້ານວັດທະນະທຳອັນດີງາມຂອງຊາວນະຄອນຫຼວງພະບາງ ທີ່ເຄີຍປະຕິບັດກັນມາຫຼາຍເຊັ່ນຄົນ ອັນໄດ້ສ້າງຄວາມປະທັບໃຈໃຫ້ແກ່ຜູ້ທີ່ໄດ້ເຂົ້າຮ່ວມງານເປັນຢ່າງດີ; ທຸກຄົນຕ່າງກໍ່ມີຄວາມສຸກຄວາມເບີກບານມ່ວນຊື່ນ ແລະມີໃບໜ້າທີ່ຍີ້ມແຍ້ມແຈ່ມໃສ. 
ສຳລັບກິດຈະກຳການຫົດສົງອົງພະບາງ ແມ່ນກິດຈະກຳສຸດທ້າຍ ໃນການສະເຫຼີມສະຫຼອງບຸນປີໃໝ່ລາວ ທີ່ນະຄອນຫຼວງພະບາງ; ສ່ວນການຫົດສົງພະພຸດທະຮູບ ຢູ່ວັດວາອາຣາມແຫ່ງຕ່າງໆນັ້ນ ຈະຍັງຄົງດຳເນີນຕໍ່ໄປຈົນເຖີງທ້າຍເດືອນເມສານີ້.

ຂ່າວ,​ພາບ: ອາພຸດເດດ ບຸບຜາ

No comments

Powered by Blogger.